بلوچ راجی زْرمبشت ( بی این ایم ) ءِ چارمی بنجاھی پتر ءِ نیاد ءَ گْوستگیں دری کارانی کارگشاد ءِ دزکشی ءِ پد ءَ ھورک بیتگیں اگدہ ءِ سر ءَ ’ پھیم ‘ بی این ایم ءِ دری کارانی کارگشاد گچین بیتگ۔چہ ایشی ءَ پیش آ بی این ایم ءِ دری کارانی تک ءِ راھوتکار ءُ بنجاھی پتر ءِ باسک اَت۔
پھیم ءَ وتی سیاسی پند چہ بلوچ نودربر گل ( آزات ) ءَ بندات کرت ءُ آئی ءِ بنجاھی پتر ءِ باسک گچین بوت۔اے میان ءَ بی ایس او ءِ جتائیں بھرانی میان ءَ ھم سنتی ودی کنگ ءَ آئی ءِ سھرائیں کردے اَت۔
چہ وانگجاہ ءَ پد آئی ءَ گھبودی کارانی تہ ءَ بھر زرت ءُ سال 2007 ءَ بی این ایم ءِ باسک جوڑ بوت۔پہ اپریل 2022 ءِ راجمان پتر ءَ آ پتر ءِ باسک گچین بوت۔ گل ءِ گچینکاریانی تہ ءَ بھر ئِے زرت ءُ بنجاھی پتر ءِ باسک گچین بیگ ءَ سوبین بوت۔اگست 2023 ءَ بلوچ راجی زْرمبشت ( بی این ایم ) ءِ دری کارانی تک جوڑ کنگ بوت ءُ پھیم آئی ءِ بنداتی راھوتکار نامینگ بوت۔
آئی ءَ راجانی سنت ، برتانیا ءِ پارلیمان ءُ دگہ پتر ءُ نیاداں بلوچ راج ءِ جھگیری کرت ءُ میان استمانی تک ءَ گل ءِ سپارتکاری ءِ دیمروئی ءَ پرکار اَت۔
آئی ءَ چہ پورٹسماؤت زانشتجاہ ءَ ’ جینڈر اسٹیڈی ‘ ءَ ماسٹر کرتگ۔ مردمانی شپکی ، بلوچستان ءِ تہ ءَ بے لوگ بیتگیں مردم ، جنینانی وتکواکی آئی ءِ وانگ ءُ زانگی پٹ ءُ پولانی بنکی بنگپ اَت اَنت۔
آئی ءِ دری کارانی کارگشاد گچین بیگ ءِ سر ءَ بنجاھی پتر ءِ باسکاں اے اوست درشانتگ کہ پھیم دری کارانی کارگشاد ءِ بستار ءَ بلوچ زْرمبشت ءِ سپارتکاری ءَ دیم ءَ بارت۔
بنجاھی پتر ءِ نیاد گل ءِ سرکماش ڈاکٹر نسیم ءِ سروکی ءَ یکشل ءَ داں دو روچ ءَ برجاہ بیتگ کہ آئی ءِ تہ ءَ گل ءِ کارکرد ءِ گھتری ءَ پرارزشتیں شور کنگ بیتگ ۔ اے شور سرکولر ءِ پارست ءَ گل ءِ ھنکین ءُ تکاں ( چیپٹر) دیم دیگ بہ اَنت۔