بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ گوں برتانیائی پارلیمان ءِ باسک جان مکڈونل ءَ آنلائن گپ جتگ۔آیاں اے آنلائن نیاد ءَ بلوچستان ءِ جاورانی سر ءَ گپ جتگ ءُ اے چار ءُ بہ چار کرتگ کہ چوں ماں برتانیا ءَ پہ بلوچستان ءِ زْرمبشت ءَ پلہ مرزی گیش کنگ بہ بیت ءُ آ اود ءَ سرکار منارینگ بہ بیت کہ آ بلوچستان ءِ ناگیگیں جاورانی تہ ءَ وتی کرد ءَ پیلو بہ کنت۔
بلوچ راجی زْرمبشت ءِ سرکماش ءَ آیوکیں روچاں بلوچستان ءِ بنگپ ءُ جیڑھانی سر ءَ برتانیا ءَ مراگش برجم دارگ ءِ سر ءَ ھم گپ جتگ۔
جان مکڈونل ءَ اے رد ءَ دلجمی داتگ کہ آ بلوچ راج ءِ پلہ مرزی ءَ برجاہ دار ایت ءُ داں وتی وس ءَ کمک کنت۔
اے دم ءُ درگت ءَ بلوچ راجی زْرمبشت ( بی این ایم ) ءِ دری کارانی کارگشاد پھیم ھم ساڑی بیتگ۔
آئی ءَ گْوشتگ اے نیاد ءَ گل ءِ سرکماش ءُ جان مکڈونل ءَ انچیں گامگیجانی سر ءَ ھم پتی درشانتگ کہ چہ آیاں بلوچستان ءِ سپارتی کار تیز بہ اَنت ، چہ ایشاں بازیں کارانی سر ءَ زیت گامگیج زیرگ بیت۔
جان مکڈونل بلوچ راج ءِ پلہ مرزی کنوکیں برتانیائی سیاستدانے۔ آئی ءَ باز بر ءَ تچکیں وڑے ءَ بلوچانی پلہ مرزی کرتگ ءُ بلوچستان ءَ مردمی اگبالانی لپاشگ ءِ سر ءَ پاکستان ءِ گر ءُ دار ءِ لوٹ کرتگ ۔