بلوچ راجی زْرمبشت ( بی این ایم ) ءِ سرکماش ڈاکٹر نسیم سفارتی ءُ سیاسی تر ءُ تاباں ماں برتانیا ءَ سر بیتگ۔اے تر ءُ گردانی تہ ءَ آ ماں برتانیا ءِ پارلیمان ءِ ’ جوبلی روم ‘ ءَ گوں برتانیا ءِ پارلیمان ءِ باسکاں بلوچستان ءِ جیڑہ ءِ سر ءَ گپ جنت۔ اے تر ءُ گردانی تہ ءَ بی این ایم ءِ سرکماش گل ءِ دگہ بنجاھی راھشونانی پجیگ ءَ گوں جتائیں بلوچ راجدوستیں گلانی راھشون ، رسانککار ءُ نامی ئیں بلوچاں گندک کنت۔
بی این ایم ءِ دری کارانی کارگشاد فھیم ءِ رد ءَ ، بی این ایم چہ برتانیا ءِ پارلیمان ءِ باسک جان میکڈونل ءِ کمک ءَ گوں برتانیا ءِ راھبند جوڑ کنوکاں پہ بلوچستان ءِ سیتاں گپ جنت ءُ آیاں وادار کنت کہ آ بلوچ ءِ پلہ مرزی بہ کن اَنت۔پہ ایشی ءَ 30 اپریل ءِ نیم روچ ءِ ’ 2 ءَ بہ گر داں بیگاہ ءِ 4 ‘ ءَ نیادے برجم بیت ، اے نیاد ءِ تہ ءَ بی این ایم ءِ جھگیراں ابید زور بیگواھیں مردمانی کھول ءِ مردم ھم بلوچستان ءِ مردمی اگبالانی جیڑھانی سر ءَ گپ جن اَنت۔
بی این ایم ءِ کستریں کمک سرکارگشاد حسن دوست ءَ گْوشتگ سرکماش ڈاکٹر نسیم برتانیا ءَ سر بیتگ ءُ وتی کارشور ءِ رد ءَ گندک ئِے بندات کرتگ اَنت۔کوشست ھمیش اِنت کہ اے گند ءُ نندانی تہ ءَ سفارتی سرگرمیانی پجیگ ءَ گوں بلوچ زْرمبشت ءَ بندوکیں دگہ گل ءُ نامی ئیں مردماں راھوت ھم شرتر بہ بہ اَنت۔اے کار ءِ پژدر بلوچ آجوئی لوٹوکیں گلانی میان ءَ ھم آھنگی ودی کنگ اِنت ، انچوش کہ شھمیر واجہ غلام محمد ءِ سیاسی کرد ءُ سنچ بیتگ ءُ اے کار بی این ایم ءِ مسام ءِ ھم پرارزشتیں بھرے۔
بی این ایم ءِ جارکش ءِ رد ءَ ، سرکماش ڈاکٹر نسیم ءِ چہ اے تر ءُ تاباں ناں ایوک ءَ سفارتی تک ءَ سوبمندی ءِ اوست ھست بلکیں جتائیں بلوچ راھشونانی میان ءَ ھم وت ماں وتی راھوتانی تہ ءَ گھتری کیت۔پمیشکا اے تر ءُ تاب راجمان پتر ءَ پد چہ چیئرمین پر ارزشت تریں سیاسی تر ءُ تاباں یکے کہ چہ ایشی ءَ ماں شریں بروردے ءِ اوست دار این ءُ مئے سیاسی کار ءُ کردانی سر ءَ ایشی ءِ دیرمان سان پشت کپ اَنت۔
