بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ پاکستان ءُ ھندوستان ءِ انگیں گر ءُ چیلانی سر ءَ درائینتگ ھندوستان ءُ پاکستان ءِ میان ءَ اے جیڑہ ایوک ءَ دو مھترھندانی میان ءَ نہ اِنت بلکیں ھندوستان ءِ بھر کنگ ءِ ھما گْوستانکی ویل ءِ برجاھی اِنت کہ بلوچستان ءِ پجیگ ءَ سرجمیں دمگ ایشی ءِ تاوانانی دیمپان اِنت۔ ھندوستان ءِ بھر ءُ بانگ ءَ کْوھنیں مھترھند ، راج ءُ دیرمانیں ایمنی ، داشت ءِ گت ءُ گمان پہ مدامی آدرو کرت اَنت۔ایشی ءِ پد ءَ اے دمگ ءَ جاھے گرم ءُ جاھے سارتیں جنگ ءِ جمبر پہ مدامی ساھیل اَنت۔
آئی ءَ گْوشتگ چہ ھندوستان ءِ نیمگ ءَ پاکستان ءِ سر ءَ بیوکیں کسان ءُ مانگیش اتگیں بیڑ ، جنگ بندی ءِ جار ءُ سوب ءُ پروش ءِ ککارانی تہ ءَ اے پرارزشتیں گپ ڈالچار بیگ ءَ اِنت کہ بلوچ ، پشتون ، سندی ءُ کشمیری راج ءَ اے جنگ ءِ سر ءَ تچکیں دیدانکے زرتگ کہ اے جنگ پاکستانی پنجاب شاھی ءُ ھندوستان ءِ میان ءَ اِنت ، چیردست راج چہ ایشی ءَ یک کر اَنت۔
ڈاکٹر نسیم ءَ گْوشتگ اگاں ھندوستان پہ راستی ءَ اے دمگ ءَ پاداریں ایمنی ، دیمروئی ءُ پاکستان ءِ ناشرکاریاں پہ مدامی آسر کنگ لوٹ ایت گڑا آئی ءَ ایوک ءَ کسانیں لشکری بیڑانی سر ءَ اوست بندگ نہ لوٹ ایت بلکیں دمگ ءِ بنکی سیاسی ساچ ، زیردستیں راجانی بستار ءُ دمگی آمید ءِ پد ءَ تچکیں شوندات ءُ راھے گیشنگی اِنت۔ ابید چہ مگیم ءُ شیشاریں سیاسی ءُ جنگی چار ءُ ٹپاس ءَ ایٹمی سلحہ داروکیں پاکستان رنگیں لیکھی ترندروئیں مھترھند ایوک گوں کسانیں بیڑاں نزور کنگ نہ بیت۔
ڈاکٹر نسیم ءَ گْوشتگ ماؤنٹ بیٹن ءِ شور انچیں کاٹارے کہ مروچی ھم ھندوستانی دمگ ءِ سینگ ءَ پیوست اِنت ءُ چہ آئی ءَ یکشل ءَ ھون رچگ ءَ اِنت۔داں وھدے اے گْوستانکی زوراکی ءُ ردی منگ مہ بیت ، انیگیں جاور ءِ راستیں چار ءُ ٹپاس ءُ گر ءُ دار بیت نہ کنت۔ پاکستان ناابرمیں مھترھندے ، کہ کْوھنیں راجانی زمینانی سر ءَ کینگ ءُ کستی ئیں لیکہ ءُ زورشاھی شورانی رد ءَ برجاہ اِنت۔مھترھند ، آئی ءِ درسیں وس ءُ واک گوں ایمٹی سلحاں انچیں ترندروئیں لشکر ءِ دست ءَ اِنت کہ ناں ایوک ءَ ھندوستان بلکیں پہ سرجمیں دمگ ءُ جھانی ایمنی ءَ یکشلیں بیھارے۔
آئی ءَ گْوشتگ ماں پھلگام ءَ چہ پاکستانی مھترھند ءِ کمک ءَ بیتگیں ناشرکاریں ارش کہ آئی ءِ تہ ءَ بے میاریں مردم کشگ بیتگ اَنت ، ھمے شوندات ءِ دْرچ اِنت کہ آئی ءِ تہ ءَ ناشرکاری پاکستان ءِ تھی ءُ دری شونداتانی بنکی پلپا اِنت۔ اے مھترھند ناشرکاری ءِ رودم جاہ اِنت ءُ اے ناشرکاری ءَ مھترھندی تک ءَ مالی ، لیکھی ءُ لشکری کمک ھست۔داں اد ءَ جھانی ناشرکار مولانا مسعود اظھر ءِ نزیکیں مردمانی کوش ءَ پد ھم پاکستانی لشکر ءِ سروگان روچ ء رامانی آیانی جنازہ ءَ گون بیتگ اَنت ، چہ ایشی ءَ اے کلوہ رس ایت کہ مھترھندی ناشرکاری اوشتگ ءِ وڑ ءَ نہ اِنت۔
بی این ایم ءِ سرکماش ءَ گْوشتگ دمگ ءَ ناشرکاری ءِ آسر کنگ ، ایمنی ، داشت ءُ پاداریں دیمروئی ءِ ھچ راہ داں ھما وھد ءَ کارامد نہ بیت کہ 14 اگست 1947 ءِ گْوستانکی سیاسی ردی منگ مہ بہ اَنت ءُ نا ابرمی مھترھند ءِ ساچشتی اڑاند ءِ سنگینیں چار ءُ ٹپاس کنگ مہ بیت ، دمگ ءِ چیردستیں راج ، گچینی بلوچستان ءِ گْوستانکی بستار ، راجی پجار ءُ آجوئی ءِ جھد دیناداسی منگ مہ بہ اَنت۔ھمے تیوکیں راہ اِنت کہ اے دمگ ءَ چہ مدامی ئیں جنگ ، ناشرکار ی ءُ بے تاھیری ءَ در کنت ءُ پر ایمن ، آمید ءُ دیمروئی کنوکیں باندات ءِ نیمگ ءَ برت کنت۔
