جنیوا: بلوچ راجی زْرمبشت ( بی این ایم) ءِ سرکماش ڈاکٹر نسیم ءَ گْوشتگ کہ چین ءُ پاکستان ءِ ھم سنتی ناں ایوک ءَ پہ روکپتی سیتاں بیھارے بلکیں اے سنت بلوچ ءِ بنکی مردمی اگبالانی سر ءَ ھم تچکے ءَ ارش کنت۔
آئی ءَ اے گپ راجانی سنت ءِ مردمی اگبالانی پتر ءِ 52 می نیاد ءِ دم ءُ درگت ءَ ھمگْور ءَ بیتگیں مراگشے ءَ تْران کنان ءَ گْوشتگ۔اے نیاد گوں راجانی سنت ءِ ترامگیجاں شورکاری بستار ءَ کار کنوکیں درسرکاری گل (این جی اوز) پہ تھمارشتی آجوئی ءَ ، گل ءُ مردمانی میان ءَ ھمگرنچی کیپ (Coordination des Associations et des Particuliers pour la Liberté de Conscience ) ءِ چیردستی ءَ برجم دارگ بیتگ اَت۔
آئی ءَ وتی تْران ءَ گْوشتگ چہ ھما روچاں کہ اے دمگ پاکستان ءَ زور گیپتگ ، بلوچستان ءِ مردم پہ وتی ھمروچیں زندمان ءِ گوازینگ ءَ جھد کنگ ءَ اَنت۔پاکستان ءِ زوراکیں کارپداں مئے گزرانک، ربیدگ، دودمان ءُ زبان گار ءُ گمساری ءِ کنڈ ءَ رسینتگ اَنت۔بلوچستان ءِ گیشتر مردم کوھستگاں زندگی کنگ ءَ بیتگ اَنت ءُ آیانی زند ءِ گزران مالداری ءِ سر ءَ اَت۔ بلے ، چہ لشکرکشیانی گیش بیگ ءَ ، آیانی نگن پچگ گرگ بیتگ ، ءُ آ وتی کوہ ءُ کوچگانی یلہ کنگ ءَ لاچار بیتگ اَنت۔
چیئرمین ڈاکٹر نسیم ءَ چین ءُ پاکستان ءِ نام گیپتیں گزرانکی راھداری ءِ سر ءَ ترندیں ایراد گران ءَ گْوشتگ چہ ایشی ءَ پیش، پاکستان بلوچستان ءَ تیوک ءَ مردمی اگبالانی بگیری کنگ ءَ اَت،بلے نی چین ھم اے زور ءَ گیش کنگ ءُ وتی نام گیپتیں دیمروی شورانی منڈینگ ءَ گوں آئی ءَ ھمدست اِنت، کہ دمگے ءُ دگے ءِ کارشور ، چین پاکستان گزرانکی راھداری ( سی پیک) ءِ بھر اِنت۔اے کارشور ءِ زور منڈینگ ءِ آسر ءَ بلوچستان ءَ اے کشک ءِ سر ءَ نندوکیں ھزاراں ھندی مردم لڈ اتگ ءُ آ زور بیگواہ کنگ بیتگ اَنت۔سی پیک ءِ راہ ءِ تچک کنگ ءَ بازیں کوچگ بن دیگ بیتگ ءُ پہ چینی سیتانی پھریزگ ءِ نام ءَ لشکری بنجل ءُ پانگس جوڑ کنگ بیتگ، وھدے کہ راستی ایش اِنت اے لشکری کارمند رسترگونگ ءَ مردمی اگبالانی لپاشگ ءِ زمہ وار اَنت۔ چین ءُ پاکستان ءِ ھم سنتی ناں ایوک ءَ پہ روکپتی سیتاں بیھارے بلکیں اے سنت بلوچ ءِ بنکی مردمی اگبالانی سر ءَ ھم تچکے ءَ ارش کنت۔
آئی ءَ ماں بلوچستان ءَ مردمی اگبالانی انیگیں جاور سھرا کنان ءَ گْوشتگ ایوک ءَ پروری 2023 ءَ 39 کس زور بیگواہ کنگ بیتگ کہ ایشانی تہ ءَ دو جنین رشیدہ زھری ءُ ماھل ھم ھوار اَت۔ماھل یک برے زور بیگواہ کنگ بیتگ ءُ پد ءَ آئی ءِ سر ءَ جنگی گل ءِ باسک بیگ ءِ دروگیں بھتام جنگ بیتگ۔آ گوں وتی وسیگ ءُ دو جنک زھگاں آوار جنگ بیتگ اَت، ءُ درس داں 24 ادار ءَ زور بیگواہ کنگ بیتگ اَنت ، آ دگہ یلہ دیگ بیتگ اَنت بلے ماھل زور بیگواہ بیتگ۔بلوچ ءِ ترندیں زھرشانی ءُ روانکاں پد ھپتگے ءَ رند آ آمیدگس ءَ آرگ بوت ۔ ھمے پیم رشیدہ زھری گوں آئی ءِ لوگواجہ ءُ چکانی ھمراہ آوار جنگ بیتگ۔اگاں کہ رشیدہ 11 روچ آزار دیگ ءَ پد یلہ کنگ بیتگ بلے آئی ءِ لوگواجہ رھیم زھری دنیگت زور بیگواہ اِنت۔دگہ دلپدردیں ویلے ماں آواران ھنکین ءِ ھند گیشکور ءَ بیتگ، اے دادبکش ء مسکان ءِ گوں بے دردی ءَ کوش ءِ ھال اَت۔آ لشکری بنجل ءَ لوٹائینگ ءَ پد سکا آزار دیگ بیتگ، وھدے یلہ اش داتگ آئی ءَ ٹپانی درد نہ سگ اتگ اَنت ءُ بیران بیتگ۔
آئی ءَ پاکستان ناں ایوک ءَ پہ دمگ ءَ بلکیں پہ جھان ءَ بیھارے لیک اتگ ، آئی ءِ گْوشگ اَت پاکستان ناں ایوک ءَ پہ بلوچستان ءَ بلکیں پہ سرجمیں دمگ ءِ ایمنی ءُ ساکمی ءَ ٹوھیں بیھارے۔اے المی اِنت کہ راجانی سنت ءُ دگہ میان استمانی واک جھان ءِ بے پانکی ءُ مردمی جانانی تاوان ءِ بنیادی پارستاں نشان بہ دنت ءُ پہ آیانی گر ءُ دار ءُ دیمپانی ءَ یک جْوانیں شونداتے بہ ٹاھین ایت۔اے دمگ ءَ داں ھما وھد ءَ ایمنی ءُ ساکمی نہ رس ایت داں کہ پاکستان ناشرکاری ءَ رودینگ ءُ پلہ مرزی کنگ ءَ اِنت۔پاکستان ءِ مزھبی جنگولیں داردستگ جوڑ کنگ ءُ کارمرد کنگ ءِ شونداتانی پد ءَ گیشتر دست ءَ کسملیکیں جنگول ءُ اسلامی ترندرو واکدار جوڑ کنگ بیتگ اَنت، کہ آسر ءَ پہ میان استمانی ایمنی ءَ بیھارے۔پاکستان ءِ ھیل داتگیں ترندرواں یورپ، میانی رودرتک ءَ بہ گراں داں ھندوستان ءَ ناشرکاریں ارش کرتگ۔دودمانداریں جھان ءَ اے ترسناکیں مزھبی گنوکانی بگیری ءَ جنگ کنوکیں راج ءُ ھندی زْرمبشتانی پلہ مرزی کنگی اِنت۔بلوچ، سندی ءُ پشتون رنگیں راج سداں سال کْوھنیں سیکولریں دودماناں چہ مزھبی ترندروانی پنجگ ءَ پھریزگ ءِ جھد کنگ ءَ اَنت۔میان استمان ءَ اے چست بیتگیں جیڑہ ءِ نیمگ ءَ دلگوش کنگ لوٹ ایت ءُ دمگ ءَ پہ آجوئی ءَ جنگ کنوکانی کوشستانی پلہ مرزی کنگی اِنت۔
ڈاکٹر نسیم ءَ گْوشتگ بلوچ وتی لبرل ءُ سیکولریں ربیدگانی پھریزگ ءَ پاکستان ءِ لیکھی بنیاد ءَ اسلامی لشکر ءُ آئی ءِ مزھبی داردستگانی بگیری ءَ جھد کنگ ءَ اَنت۔نی ھما وھد اتکگ کہ میان استمان اے گپ ءَ بہ من ایت کہ بلوچستان ءِ جیڑہ تیوک ءَ دمگی جیڑھے نہ اِنت بلکیں جھانی جیڑھے۔جھان چین ءِ بالادستی ءُ گیش بیوکیں اسلامی ترندروی ءِ بگیری ءِ جنگ ءَ بلوچ راج ءِ ھمکوپگ بہ بیت۔اے گوں اے ھمے گپ ءَ بندوک اِنت کہ بلوچستان ءَ مردمی اگبالانی ٹوھیں بگیریاں پد ھم یورپ ءَگوں پاکستان ءَ وتی گزرانکی سیادی ءُ مسام برجاہ داشتگ اَنت۔درچتگ ءُ ارزشتمند لیکگ بیتگیں کارشورانی مسام (جی پی ایس پلس)چہ پاکستان ءَ مردمی اگبالانی راھبند ءُ ربیدگانی برجاہ دارگ ءُ آیاں منگہ دیگ ءِ لوٹ ءَ کنت۔ما یورپ ءَ زور دئے ایں کہ آ دیم ءِ نیاد ءَ ناں ایوک ءَ بلوچستان ءِ ناگیگیں جاور ءَ دیم ءَ بہ یار ایت بلکیں پاکستان ءِ کارپدانی سر ءَ آئی ءَ جست ءُ پد کنگ ءَ مادنیں گامگیج بہ زیر ایت۔بلوچستان ءِ مردمانی بنکی اگبال ءُ مڑاہ ءِ منگہ دیگ ءَ پاکستان ءِ جی پی ایس پلس بستار ءَ دیم ءَ برگ ءِ نیاد گوں ڈکاں بندوک بہ بیت یا بجینگ بہ بیت۔بلوچ ءَ باز تاوان دیستگ نی وھد اتکگ کہ یورپ زوراکانی بگیری ءَ ترندیں دیدانکے بہ دار ایت ءُ گوں زیردستاں یکجھتی ءِ درشان ءَ بہ کنت۔
آئی ءَ شیوار کرتگ، اگاں میان استمان پاکستان رنگیں زوراک ءُ مزھبی تنگدیدیں لیکھانی سر ءَ جوڑ بیتگیں ڈیھانی پلہ مرزی ءَ برجاہ بہ دار ایت گڑا چہ ایشی ءَ میان استمانی ناشرکاری گیشتر ترسناکیں کچے ءَ گیش بیت ءُ برجاہ مان ایت۔
چیئرمین بی این ایم ءَ گْوشتگ یک رندے بلوچ راج وتی چہ مادناں سرچکاریں سرزمین ءِ واکدار بیت ءُ آیانی زیردستیں راجی مھترھند (ریاست) ءِ آجوئی بہ سبز ایت گڑا آیانی دیمروی دوستیں ربیدگ، آزاتیں گلگ ءُ مردمی ھمددری ءِ شوندات بلوچستان ، ھمساھگیں ڈیھ ءُ پہ سرجمیں جھان ءِ پاداریں ایمنی ءُ دیمروی ءَ کردے پیلو کرت کن اَنت۔
آئی ءَ گوں میان استمان ءَ لوٹ کرتگ کہ آ یک دیمروی دوست، سیکولر چاگرد ، آزاتیں گلگ ءُ انسانی ھمدردی ءِ پجیگ ءَ بلوچ راج ءَ وتی سرزمین ءِ واھند بیگ ءَ کمک بہ کن اَنت۔
بی این ایم ءِ چیئرمین ڈاکٹر نسیم ءِ راجانی سنت ءِ مردمی اگبالانی پتر ءِ میان ءَ ھمگْوریں مراگشے ءَ سرجمیں تْران :
چہ درساں پیش من تْرامکارانی منت ءَ گرگ لوٹ آں کہ آیاں من ءَ اے پتر ءَ لوٹ اتگ۔
نی من زورگپتیں بلوچستان ءِ جاور ءُ پاکستانی لشکر ءِ زوراکیانی سر ءَ کسانیں چمشانکے دئے آں۔
وھدے کہ ما بلوچستان ءِ نام ءَ اش کن ایں گڑا اے گیشتر گوں رنجاں ھمگرنچ بیت۔چہ ھما روچاں کہ اے دمگ پاکستان ءَ زور گیپتگ ، بلوچستان ءِ مردم پہ وتی ھمروچیں زندمان ءِ گوازینگ ءَ جھد کنگ ءَ اَنت۔پاکستان ءِ زوراکیں کارپداں مئے گزرانک، ربیدگ، دودمان ءُ زبان گار ءُ گمساری ءِ کنڈ ءَ رسینتگ اَنت۔بلوچستان ءِ گیشتر مردم کوھستگاں زندگی کنگ ءَ بیتگ اَنت ءُ آیانی زند ءِ گزران مالداری ءِ سر ءَ اَت۔ بلے چہ لشکرکشیانی گیش بیگ ءَ ، آیانی نگن پچگ گرگ بیتگ ، ءُ آ وتی کوہ ءُ کوچگانی یلہ کنگ ءَ لاچار بیتگ اَنت۔
ایوک ءَ پروری 2023 ءَ 39 کس زور بیگواہ کنگ بیتگ کہ ایشانی تہ ءَ دو جنین رشیدہ زھری ءُ ماھل ھم ھوار اَت۔ماھل یک برے زور بیگواہ کنگ بیتگ ءُ پد ءَ آئی ءِ سر ءَ جنگی گل ءِ باسک بیگ ءِ دروگیں بھتام جنگ بیتگ۔آ گوں وتی وسیگ ءُ دو جنک زھگاں آوار جنگ بیتگ اَت، ءُ درس داں 24 ادار ءَ زور بیگواہ کنگ بیتگ اَنت ، آ دگہ یلہ دیگ بیتگ اَنت بلے ماھل زور بیگواہ بیتگ۔بلوچ ءِ ترندیں زھرشانی ءُ روانکاں پد ھپتگے ءَ رند آ آمیدگس ءَ آرگ بوت ۔ ھمے پیم رشیدہ زھری گوں آئی ءِ لوگواجہ ءُ چکانی ھمراہ آوار جنگ بیتگ۔اگاں کہ رشیدہ 11 روچ آزار دیگ ءَ پد یلہ کنگ بیتگ بلے آئی ءِ لوگواجہ رھیم زھری دنیگت زور بیگواہ اِنت۔
دگہ دلپدردیں ویلے ماں آواران ھنکین ءِ ھند گیشکور ءَ بیتگ، اے دادبکش ء مسکان ءِ گوں بے دردی ءَ کوش ءِ ھال اَت۔آ لشکری بنجل ءَ لوٹائینگ ءَ پد سکا آزار دیگ بیتگ، وھدے یلہ اش داتگ آئی ءَ ٹپانی درد نہ سگ اتگ اَنت ءُ بیران بیتگ۔چہ ایشی ءَ پیش، پاکستان بلوچستان ءَ تیوک ءَ مردمی اگبالانی بگیری کنگ ءَ اَت،بلے نی چین ھم اے زور ءَ گیش کنگ ءُ وتی نام گیپتیں دیمروی شورانی منڈینگ ءَ گوں آئی ءَ ھمدست اِنت، کہ دمگے ءُ دگے ءِ کارشور ، چین پاکستان گزرانکی راھداری ( سی پیک) ءِ بھر اِنت۔اے کارشور ءِ زور منڈینگ ءِ آسر ءَ بلوچستان ءَ اے کشک ءِ سر ءَ نندوکیں ھزاراں ھندی مردم لڈ اتگ ءُ آ زور بیگواہ کنگ بیتگ اَنت۔سی پیک ءِ راہ ءِ تچک کنگ ءَ بازیں کوچگ بن دیگ بیتگ ءُ پہ چینی سیتانی پھریزگ ءِ نام ءَ لشکری بنجل ءُ پانگس جوڑ کنگ بیتگ، وھدے کہ راستی ایش اِنت اے لشکری کارمند رسترگونگ ءَ مردمی اگبالانی لپاشگ ءِ زمہ وار اَنت۔ چین ءُ پاکستان ءِ ھم سنتی ناں ایوک ءَ پہ روکپتی سیتاں بیھارے بلکیں اے سنت بلوچ ءِ بنکی مردمی اگبالانی سر ءَ ھم تچکے ءَ ارش کنت۔
بلوچ وتی لبر ءُ سیکولریں ربیدگانی پھریزگ ءَ پاکستان ءِ لیکھی بنیاد ءَ اسلامی لشکر ءُ آئی ءِ مزھبی داردستگانی بگیری ءَ جھد کنگ ءَ اَنت۔نی ھما وھد اتکگ کہ میان استمان اے گپ ءَ بہ من ایت کہ بلوچستان ءِ جیڑہ تیوک ءَ دمگی جیڑھے نہ اِنت بلکیں جھانی جیڑھے۔جھان چین ءِ بالادستی ءُ گیش بیوکیں اسلامی ترندروی ءِ بگیری ءِ جنگ ءَ بلوچ راج ءِ ھمکوپگ بہ بیت۔اے گوں ھمے گپ ءَ بندوک اِنت کہ بلوچستان ءَ مردمی اگبالانی ٹوھیں بگیریاں پد ھم یورپ ءَگوں پاکستان ءَ وتی گزرانکی سیادی ءُ مسام برجاہ داشتگ اَنت۔درچتگ ءُ ارزشتمند لیکگ بیتگیں کارشورانی مسام (جی پی ایس پلس)چہ پاکستان ءَ مردمی اگبالانی راھبند ءُ ربیدگانی برجاہ دارگ ءُ آیاں منگہ دیگ ءِ لوٹ ءَ کنت۔ما یورپ ءَ زور دئے ایں کہ آ دیم ءِ نیاد ءَ ناں ایوک ءَ بلوچستان ءِ ناگیگیں جاور ءَ دیم ءَ بہ یار ایت ءُ بلکیں پاکستان ءِ کارپدانی سر ءَ آئی ءَ جست ءُ پد کنگ ءَ مادنیں گامگیج بہ زیر ایت۔بلوچستان ءِ مردمانی بنکی اگبال ءُ مڑاہ ءِ منگہ دیگ ءَ پاکستان ءِ جی پی ایس پلس بستار ءَ دیم ءَ برگ ءِ نیاد گوں ڈکاں بندوک بہ بیت یا بجینگ بہ بیت۔بلوچ ءَ باز تاوان دیستگ نی وھد اتکگ کہ یورپ زوراکانی بگیری ءَ ترندیں دیدانکے بہ دار ایت ءُ گوں زیردستاں یکجھتی ءِ درشان ءَ بہ کنت۔
پاکستان ناں ایوک ءَ پہ بلوچستان ءَ بلکیں پہ سرجمیں دمگ ءِ ایمنی ءُ ساکمی ءَ ٹوھیں بیھارے۔اے المی اِنت راجانی سنت ءُ دگہ میان استمانی واک جھان ءِ بے پانکی ءُ مردمی جانانی تاوان ءِ بنیادی پارستاں نشان بہ دنت ءُ پہ آیانی گر ءُ دار ءُ دیمپانی ءَ جْوانیں شونداتے بہ ٹاھین ایت۔اے دمگ ءَ داں ھما وھد ءَ ایمنی ءُ ساکمی نہ رس ایت داں کہ پاکستان ناشرکاری ءَ رودینگ ءُ پلہ مرزی کنگ ءَ اِنت۔پاکستان ءِ مزھبی جنگولیں داردستگ جوڑ کنگ ءُ کارمرد کنگ ءِ شونداتانی پد ءَ گیشتر کسملیکیں جنگول ءُ اسلامی ترندرو واکدار جوڑ کنگ بیتگ اَنت، کہ آسر ءَ پہ میان استمانی ایمنی ءَ بیھارے۔پاکستان ءِ ھیل داتگیں ترندرواں یورپ، میانی رودرتک ءَ بہ گراں داں ھندوستان ءَ ناشرکاریں ارش کرتگ۔دودمانداریں جھان ءَ اے ترسناکیں مزھبی گنوکانی بگیری ءَ جنگ کنوکیں راج ءُ ھندی زْرمبشتانی پلہ مرزی کنگی اِنت۔بلوچ، سندی ءُ پشتون رنگیں راج سداں سال کْوھنیں سیکولریں دودماناں چہ مزھبی ترندروانی پنجگ ءَ پھریزگ ءِ جھد کنگ ءَ اَنت۔میان استمان ءَ اے چست بیتگیں جیڑہ ءِ نیمگ ءَ دلگوش کنگ لوٹ ایت ءُ دمگ ءَ پہ آجوئی ءَ جنگ کنوکانی کوشستانی پلہ مرزی کنگی اِنت۔
یک رندے بلوچ راج وتی چہ مادناں سرچکاریں سرزمین ءَ واکدار بہ بیت ءُ آیانی زیردستیں راجی مھترھند ءِ آجوئی بہ سبز ایت گڑا آیانی دیمروی دوستیں ربیدگ، آزادتیں گلگ ءُ مردمی ھمددری ءِ شوندات بلوچستان ، ھمساھگیں ڈیھ ءُ پہ سرجمیں جھان ءِ پاداریں ایمنی ءُ دیمروی ءَ کردے پیلو کرت کن اَنت۔ بہ یا اِت یک دیمروی دوست، سیکولر چاگرد ، آزاتیں گلگ ءُ انسانی ھمدردی ءِ پجیگ ءَ بلوچ راج ءَ وتی سرزمین ءِ واھند بیگ ءَ کمک کن ایں۔
اگاں دومی نیمگ ءَ میان استمان پاکستان رنگیں زوراک ءُ مزھبی تنگدیدیں لیکھانی سر ءَ جوڑ بیتگیں ڈیھانی پلہ مرزی ءَ برجاہ بہ دار ایت گڑا چہ ایشی ءَ میان استمانی ناشرکاری گیشتر ترسناکین کچے ءَ گیش بیت ءُ برجاہ مان ایت۔
شمئے وھد دیگ ءِ منتوار