راجانی سنت ءِ پتر چہ پاکستانی لشکراں آیانی کرتگیں میارانی جست ءَ بہ کنت- ڈاکٹر نسیم

جنیوا: بلوچ راجی زْرمبشت (بی این ایم) ءِ سرکماش ڈاکٹر نسیم ءَ راجانی سنت ءِ میان استمانی اگبالانی پتر (یو این ایچ سی آر ) ءِ 52می نیاد ءَ گپ جنان ءَ بلوچستان ءَ مردمی اگبالانی بگیری ءِ سر ءَ پاکستانی لشکر ءِ جست ءُ پرس کنگ ءِ لوٹ کرتگ۔

ڈاکٹر نسیم ءَ گْوشتگ، ’’ من چہ راجانی سنت ءَ دزبندی کن آں کہ پاکستانی پھزداراں 21می سدھک ءَ ماں جھان ءَ مردمگری ءِ بگیری ءَ آئی ءِ میارانی سر ءَ جست بہ کنت۔‘‘

بی این ایم ءِ چیئرمینءَ گْوشتگ، 2023 ءِ بنداتی دوئیں ماھاں پاکستانی لشکر ءَ چہ بلوچستان ءَ 80 کس آوار جتگ چہ ایشاں دو جنین ءُ 18 نودربر ھوار بیتگ ، آ چون اَنت ءُ کج ءَ اَنت آیانی کھول سھی نہ اَنت۔

آئی ءَ یونیورسل پیریڈک ری ویو ءَ پاکستان ءِ ٹاپار رد کرتگ ءُ گْوشتگ جنوری ءَ ، وتی یونیورسل پیریڈک ری ویو (یو پی آر) ءَ ، پاکستان ءَ آ اود ءَ مردمی اگبالانی سازگاریں جاورانی دروگیں ٹاپار جتگ۔وھدے کہ راستی ایش اِنت کہ پاکستانی لشکر بلوچستان ءَ چہ وتی بدیں کارپداں میار زیرگ ءَ اَنت۔اے کارروائیاں زور بیگواھی ءُ چہ آمیدگس ءِ پرمان ءَ ڈن مردمانی کوش ھوار اَنت۔

آئی ءَ یو پی آر ءِ 42می نیاد ءَ ھما ڈیھانی کرد ساڑاتگ کہ آیاں پاکستان ءِ سر ءَ زور داتگ کہ آ زور بیگواھیاں بہ دار ایت، آئی ءَ گْوشتگ راجانی سنت ءَ یو پی آر ءِ 42می نیاد ءِ میان ءَ ھندوستان، ازرائیل ، ھالینڈ ، اٹلی ءُ پیراگوئے ءَ ماں پاکستان ءَ زور بیگواھیانی دارگ ءِ سر ءَ زور داتگ۔ اے نیاد ءَ آیاں کمتریں کچ ءَ ماں پاکستان ءَ نندوکیں مزھبی ٹکانی بارہ ءَ وتی بے تاھیری درشان کرتگ اَت۔ ما آیانی اے راھبندی دیدانک ءَ وش اتک گْوش این ءُ ساڑا ایں۔

یو این ایچ آر سی ءِ 52میں نیاد ءَ چیئرمین ءِ سرجمیں تْران

مڑھداریں گوشداروکاں!

ما شمئے دلگوش ءَ پاکستانی چیریں واکانی دست ءَ بلوچ راج ءِ بگیری ءَ مردمی اگبالانی مزنیں کچے ءَ لپاشگ ءِ نیمگ ءَ پرینگ لوٹ ایں۔

جنوری ءَ ، وتی یونیورسل پیریڈک ری ویو (یو پی آر) ءَ ، پاکستان ءَ آ اود ءَ مردمی اگبالانی سازگاریں جاورانی دروگیں ٹاپار جتگ۔وھدے کہ راستی ایش اِنت کہ پاکستانی لشکر بلوچستان ءَ چہ وتی بدیں کارپداں میار زیرگ ءَ اَنت۔اے کارروائیاں زور بیگواھی ءُ چہ آمیدگس ءِ پرمان ءَ ڈن مردمانی کوش ھوار اَنت۔

اے رد ءَ راجانی سنت ءَ یو پی آر ءِ 42می نیاد ءِ میان ءَ ھندوستان، ازرائیل ، ھالینڈ ، اٹلی ءُ پیراگوئے ءَ ماں پاکستان ءَ زور بیگواھیانی دارگ ءِ سر ءَ زور داتگ۔ اے نیاد ءَ آیاں کمتریں کچ ءَ ماں پاکستان ءَ نندوکیں مزھبی ٹکانی بارہ ءَ وتی بے تاھیری درشان کرتگ اَت۔ ما آیانی اے راھبندی دیدانک ءَ وش اتک گْوش این ءُ ساڑا ایں۔

2023 ءِ بنداتی دوئیں ماھاں پاکستانی لشکر ءَ چہ بلوچستان ءَ 80 کس آوار جتگ چہ ایشاں دو جنین ءُ 18 نودربر ھوار بیتگ ، آ چون اَنت ءُ کج ءَ اَنت آیانی کھول سھی نہ اَنت۔من چہ راجانی سنت ءَ دزبندی کن آں کہ پاکستانی پھزداراں 21می سدھک ءَ ماں جھان ءَ مردمگری ءِ بگیری ءَ آیانی میارانی سر ءَ جست بہ کنت۔

منتوار