جنیوا : اے المی اِنت کہ میان استمان ماں پاکستانی مھترھند ءَ چیردستیں راجانی جاوراں بہ من ایت ءُ آیاں گھتر بہ کنت۔گوں ھمکاری ءَ ما پہ زوراکیانی آماچیں درسیں راجانی مزدانک، ایمنی ءُ آجوئی ءَ مھکم ءُ سانمندیں زْرمبشتے ودی کرت کن ایں۔اے گپ بلوچ راجی زْرمبشت ( بی این ایم) ءِ سرکماش ڈاکٹر نسیم ءَ راجانی سنت ءِ مردمی اگبالانی پتر ( یو این ایچ سی آر) ءِ 52 میں نیاد ءِ دم ءُ درگت ءَ پشتون پانک زرمبشت ( پی ٹی ایم) ءِ ھم گْوریں نیادے ءَ تْران کنان ءَ گْوشتگ۔
ڈاکٹر نسیم ءَ گْوشتگ 1948 ءَ چہ زورگرگ ءَ پد ، بلوچستان وڑ وڑیں مردمی اگبالانی لپاشکاری ءِ آماچ اِنت کہ اے جاور پہ ھندی ءُ میان استمانی مردمی اگبال پانکیں گلاں بے تاھیری ءِ انگیز اِنت۔ زور بیگواھی ، چہ آمیدگس ءِ پرمان ءَ ڈن کوش ، آزار دئی ، ناروائیں کردگار، درشان ءُ مچی کنگ ءِ آزاتی ءِ سر ءَ پابندی ، مردمی اگبالانی گوں سک دلی ءَ بگیری اَنت۔بلوچستان ءُ پشتونھوا ءَ زور بیگواھی ھمروچیگیں کار جوڑ بیتگ اَنت۔ سیاسی باسک، اھوالکار ءُ نودربرانی پجیگ ءَ بازیں مردم مھترھند ءِ پھزدار یا آیانی کاسگ چٹانی پارست ءَ آوار جنگ بہ اَنت۔چہ ایشاں باز زور بیگواہ اِنت ءُ آیانی کھول مزدانک ءِ شوھاز ئیگ اَنت۔پاکستانی سرکار ءَ درشان ءِ آجوئی ءُ مچی کنگ ءِ سر ءَ پابندی جتگ، گچینی پہ ھما مردماں کہ مھترھند ءِ شونداتانی سر ءَ ایراد گر اَنت یا وتی آجوئی ءِ پلہ مرزی کن اَنت۔
آئی ءَ ماں چیردستیں دمگاں مردمی اگبالانی انیگیں جاورانی ندارگ کشی کنان ءَ گْوشتگ مردمی اگبالانی اے بگیریاں مردمانی تہ ءَ ترس ءُ ناپھریز بیگ ءِ مارشت ودی کرتگ۔ گچینی ھما مردم کہ مھترھند ءِ شونداتانی سر ءَ ایراد گر اَنت۔اے بگیریانی گر ءُ دار ءَ ، ءُ سانمندیں مردم ءُ آیانی کھولاں مزدانک دیگ ءَ بے سوب بیگ ءَ پد پاکستانی سرکار ایر جنگ بیت۔داں اد ءَ کہ نامداریں سیاستدان چوش کہ الی وزیر پاکستانی راجی پارلیمان ءِ باسک ، کہ پی ٹی ایم ءُ وزیرستان ءِ ھند ءِ جھگیری کنت ، ناراھیں زندان ءُ ناروائیں کردگار ءِ دیمپان بیتگ۔چہ ایشی ءَ آ دگہ انچائیں بلوچ، پشتون ، سندی ، کشمیری یا گلگت بلتستانی مردمانی جاور ءِ گمان کنگ بیت گوں آیاں چی بیگ ءَ اِنت یا بیت کنت۔
آئی ءَ گْوشتگ من چہ راجانی سنت ءِ نیمگ ءَ اے گامگیج ءِ ارزشت ءِ سر ءَ زور دیگ لوٹ آں کہ آ بلوچستان ، پشتونھوا ءُ دگہ زوراکیانی آماچیں راجانی مردمی اگبالابی بگیری ءِ گر ءُ دار ءَ مادنیں گامگیج بہ زیر ایت۔ جاور ءِ آمیدیں (منصفانہ) چار ءُ ٹپاس ءِ دلجم کنگ ءَ ، پہ راجانی سنت ءُ دگہ میان استمانی تْرامگیجاں اے المی اِنت کہ آ مردمانی دید ءُ گزارشاں (گزارش : رپورٹ) ھوار بہ گیج اَنت ، ھما کہ چہ مردمی اگبالانی لپاشگ ءَ چہ درساں گیش سانمند اَنت۔
سرکماش ڈاکٹر نسیم ءِ رد ءَ میان استمان ءِ بے تواری ءَ پاکستان پہ زوراکی کنگ ءَ بے مھار کرتگ، آئی ءَ گْوشتگ میان استمان ءَ مردمی اگبالانی جاور ءِ گر ءُ دار ءَ پرکاریں کردے پیلو کنگ لوٹ ایت۔ اے رد ءَ میان استمان ءِ بے تواری ءَ پاکستانی سرکار وتی زوراکی ءُ مردمی اگبالانی لپاشگ ءِ شونداتانی گوں بے مھاری ءَ برجاہ دارگ ءِ موہ داتگ۔
آئی ءَ پاکستانی زوراکیانی بگیری ءَ میان استمانی پلہ مرزی سانمند لیک اتگ ءُ گْوشتگ پہ زوراکیانی آماچیں راجانی گھبود ءَ کارکنوکیں پی ٹی ایم ءُ دگہ گلاں پہ وتی توار ءِ چست کنگ ءُ جاورانی مٹائینگ ءَ میان استمانی پلہ مرزی پکار اِنت۔
آئی ءَ اے درگت ءَ زوراکیانی آماچیں راجانی میان ءَ ھم سنتی ءُ یکجھتی ءِ سر ءَ زور داتگ ءُ گْوشتگ ماں پاکستان ءَ ناں ایوک ءَ بلوچ ءُ پشتون بلکیں سندی ، کشمیری ءُ گلگت بلتستانی ھم زوراکیانی دیمپان اَنت ءُ آ چہ وتی پجار ، ربیدگ ءُ زباناں زبھر کنگ بیتگ اَنت۔مئے سیاسی ءُ چاگردی سرگرمی گٹگیر کنگ بیتگ اَنت ءُ ھما مردم کہ اے زوراکیانی بگیری ءَ توار چست کن اَنت آوار جنگ ، زور بیگواہ ءُ کشگ بہ اَنت۔
’’ ھمے پیم زوراکیانی جاور ءَ اے ھم المی اِنت کہ ما وتی دژمن ءِ بگیری ءَ ھم سنتیں سنگر ءِ وتی گْوستانکی روتگاں ھمگرنچ بہ این ءُ پجیگ ءَ کار بہ کن ایں۔‘‘
آئی ءَ بلوچ ءُ پشتون گْوستانکی سیادانی بنیاد ءَ دری زورگر ءِ بگیری ء ھم سنتیں جھد ءِ پیشکش کرتگ ءُ گْوشتگ بلوچ ءُ پشتون ’ربیدگ ، زبان ءُ گْوستانکی سیادیانی‘ پرگنجیں گْوستانکے دار اَنت ءُ چہ سدھکاں آیانی نزیکی ءُ وت ماں وتی سیادی اَنت۔آ انگریز رنگیں ارش کنوک ءُ زورگرانی بگیری ءَ جنگ ءُ ایمنی ءِ وھداں یک دومی ءِ ھم کوپگ بیتگ اَنت ءُ ھر وھد ءَ پکار بیتگ آیاں پہ یک دومی ءَ وتی دروازگ پچ کرتگ اَنت۔ سویت سنت ءُ اوگان جنگ ءِ زمانگ ءَ بازیں اوگان درانڈیھ بلوچستان ءَ باھوٹ بیتگ ءُ ھمے پیم بلوچ درانڈیھاں چہ اوگانستان ءِ مردمانی پلہ مرزی ءَ ماں اوگانستان ءَ پہ وت ءَ نوانیں بندر شوھاز کرتگ۔
