جرمنی : بلوچ راجی زْرمبشت ( بی این ایم) ءِ سرکماش ڈاکٹر نسیم ءَ گْوشتگ دگہ زوراکیاں ابید پاکستان مئے چاگرد ءَ دینی پیر ودی کنگ ءُ دینی ستکانی بنیاد ءَ جنگ ءِ ھم کوشست کرتگ بلے بلوچ راجدوستی ءَ اے درستانی دیم داشتگ۔
آئی ءَ ماں تربت ءَ روپ برکت ءِ کوش ءِ درور داتگ ءُ گْوشتگ ملایاں آئی ءِ سر ءَ ھرچ بھتامے جتگ بلے مردماں زانتگ کہ ملا پندل ساز اَنت۔ مردماں ملا ءِ بگیری ءَ در اتکگ ءُ زھرشانی کرتگ، مردم سوگہ اَنت کہ اد ءَ مئے چاگرد ءِ پولنگ کنگ ءَ مھترھند (ریاست) پندل سازگ ءَ اِنت۔
ڈاکٹر نسیم ءَ اے گپ برجاھیں ماہ ءَ بی این ایم جرمنی تک ءِ سواد ءِ میان ءَ گوں گل ءِ باسکاں بیتگیں نیاداں درشانتگ اَنت۔ آئی ءَ اے میان ءَ برلن بنزہ ، ھنوپر بنزہ ، زرباری راین ویسٹپالن بنزہ ، کیمنٹس بنزہ ءُ گوں بریمن بنزہ ءِ باسکاں جتائیں نیاداں گپ ءُ تْران کرتگ۔ اے سواد ءَ بی این ایم جرمنی تک ءِ سروک ازگر الی ھم گوں آئی ءَ ھمراہ بیتگ۔ اے نیاداں باسکاں چہ سروکاں بنجاھی کار، چاگردی رسانکدر ءِ جیڑہ ءُ بلوچستان ءَ آجوئی ءِ جنگ ءَ بارہ ءَ جست کرتگ ءُ ڈاکٹر نسیم ءُ ازگر الی ءَ جستانی پسو داتگ۔اے سواد داں 16 اگست ءَ برجاہ بیتگ۔
ڈاکٹر نسیم بلوچءَ تران کنان ءَ گْوشتگ کہ گل ءِ گْوستگیں راجمان پتر ءَ بی این ایم ءِ آئین ءِ تہ ءَ انیگیں جاوران ردءَ مٹی آرگ بوتگ داں پارٹی ادارتی بنیادءَ دیمروی بہ کنت۔ رسانک، مردمی اگبال، چاگردی گھبود، دری کارانی تک ، زرمبشءُ پانکءِ رنگ ءَ جھل ءَ پتر ءُ ادارہ جوڑ کرتگ کہ اگاں باند ءَ دگہ اگدہ دار کا اَنت کئیت گڑا جھل ءِ ادارہ گوں رکارڈ ءُ کاراں آیانی دست ءَ دیگ بہ اَنت۔
آئی ءَ گْوشتگ چوناھا پارٹی وت ہم ادارھے ، جزاں پارٹیءُ ادارہ دیمءَ بر ااَنت پمیشکا مروچی مئے جھد گیشتر توانمند اِنت، اے توانمندی ءِ انگیز پارٹی ءِ ادارہ اَنت۔
پاکستانءِ زوراکیءُ بلوچ دودءُ ربیدگءِ ولگوج کنگءِ پاکستانی شوندات ءِ سر ءَ آئیءَ گْوشتگ کہ جنگءُ کشگ، گارءُ زور بیگواہ کنگ چہ پاکستانءِ نیمگءَ تیز کنگ بوتگ۔ دژمنءِ مول بلوچ راجءَ را ترسءِ آماچ کنگ اِنت۔ پاکستان گمان کنت کہ بلوچ راج گوں چوشیں زوراکیاں پد وتی سرڈگار ءِ یلہ دیگ ءُ دستانی چست کنگ ءَ ساڑی بیت۔ بلے وھد ءَ گواچن کرتگ کہ بلوچ گوں راجدوستی ءِ لیکہ ءَ مھترھند ءِ درستیں پندلاں ولگوج کنان ءَ دیمءَ روگءَ اِنت۔ بی ایس او آزاد، بی این ایم ءُ جنگی گلاں سازمان ٹاھینتگ ءُ جھد مگیم کرتگ۔
ڈاکٹر نسیم ءُ ازگر ءَ تْران کنان گْوشتگ مارا پہ آجوئیءِ روچ ءُ چہ آئی ءَ پد آجوئی ءِ دارگ ءَ مروچی چن ءُ لانچ کنگی اِنت۔ اگاں ما نزوری پیش داشت گڑا ما پیسریگیں وڑ ءَ وتی آجوئی ءِ داشت نہ کن ایں۔ پرچا کہ پاکستانءَ ایوک ءَ مئے زمین نہ برتگ، بلکیں زمین ءِ پجیگ ءَ مئے زبان، دود ءُ ربیدگ ئِے ھم برتگ اَنت۔ مروچی ما وتی وتی زبانءُ دودءُ ربیدگ ءِ پھریزگ ءِ ھم جھد کنگ ءَ ایں۔ داں کہ ما آجوئی نہ بیتگ مارا پہ وتی زبانانی داتگ ءَ ھم جنگ کنگی اِنت۔ مروچی بی این ایم زبانانی سرءَ ھم کارءَ اِنت۔ زْرمبش ھم روچ بلوچی زبانءَ ریڈیو ءَ ھال شکسائیت ، نبشتانک ءُ ھال شنگ کنت۔ زْرمبشءِ کچ ءَ کس بلوچی نکان شنگ کنگءَ نہ انت۔ چہ ایشی ءَ زبان دیم ءَ روگءَ اِنت ءُ مردماں بلوچ جز ءِ بارہ ءَ سرپدی ھم رسگ ءَ اِنت۔
بلوچ جنیانی دیمونی ارش ءُ بی این ایم ءِ شوندات ءِ سر ءَ ڈاکٹر نسیم ءَ گْوشتگ کہ بی این ایم ءِ آئین ءِ تہ ءَ ھست کہ آ درستیں آجوئی لوٹوکیں گلانی پلہ مرزی کنت۔ بلے اے مئے اگبال اِنت کہ ما ھمے گلانی راہ ءُ راھبند یا راہ کار ءِ سر ءَ ایراد ءُ شرگداری کرت کن ایں، داں آجوئی ءِ جھد ءَ تاوان مہ رس ایت
ھم سنتی ءِ جستانی سر ءَ پسہ دیان ءَ آئی ءَ گْوشتگ کہ ما اے رد ءَ گامگیج زرتگ ءُ ھرچی کہ بیت کنت آئی ءِ سر ءَ وتی گپ ءُ سسا دیم ءَ ایر کرتگ اَنت۔
درانڈیھیں سرکار بارہ ءَ جستانی پسو ءَ ڈاکٹر نسیم ءَ گْوشتگ کہ اے انچیں کارے کہ چہ درساں پیش ڈیھے اے سرکار ءِ منگ ءَ ساڑی بہ بیت ءُ تو جتائیں ڈیھاں وتی سپارتجاھاں پچ کرت بہ کن ئے۔ پہ ایشی ءَ آجوئی ءِ جھد ءَ ھواریں درسیں بائیوار یکجا کنگی اَنت، اے یک مردم یا یک گلے ءِ کارے مہ بیت۔ اد ءَ گیشتریں بائیوارنی یکجا ءُ ھوار بیگ المی اِنت۔ اگاں ناں جھان ایشی ءَ مشکرا ءُ وھد ءِ تیلانک دیگ ءِ نیمونے سرپد بہ بیت ءُ کس گوں سنگینی دلگوش نہ دنت۔
آئیءَ گْوشتگ کہ زیردستی ءِ مارشت، ءُ گوں مھکمی ءَ جھد ءَ بندوکی ترا نہ ھل اَنت کہ تو اے راہ ءَ یا اے جھد ءَ یلہ بہ دئے۔ ھما روچ ءَ ما وتی مارشت کشت اَنت، ہما مئے نزوری ءِ روچ بیت۔ گل ءِ مراگشاں ھور بوگ، آگاھی پتر ءُ ھیلکاری نیاداں بھر زورگ، گل ءَ پوڑی دیگ، اے انچیں کار اَنت کہ ترا گوں تئی گل ءُ جھد ءَ ھمگرنچ کن اَنت۔ھمے وڑ ءَ تو ڈسپلن ءِ ھم پابند بہ ئے۔ گلانی تہ ءَ ڈسپلن ءِ پابندی سک ارزشت دار ایت ءُ سک المی اِنت۔ پارٹی آئین ءُ راھبند اچ سرکماش ءَ بہ گر داں باسک ءَ درستاں منگی اَنت۔ھرچ کسءَ چونیں ھم ردی یے کنت، آئی ءَ آئین ءِ رد ءَ ھما کچیں سزایے دیگ بیت۔
ڈاکٹر نسیم ءَ گْوشتگ کہ درانڈیھ بوگ ءِ شور ارزانیں شورے نہ اِنت۔ اے شور ءِ پشت ءَ ھم مھکمیں بندوکی یے ھست اِنت۔ اے بہ گند ئے شمئے زند ءِ گْرانتریں شور اِنت بلے پہ راج ءِ سیتاں اے گامگیج زورگ بوتگ۔ مروچی ما درست اد ءَ ھم وتی کرد ءَ پیلو کنگ ءَ ایں، انچوش دگہ بازیں راجانی درانڈیھ ءَ نشتگیں مردم پہ وتی راج ءَ جھد کنگ ءَ اَنت۔ پد ءَ مئےدرانڈیھ ءَ نشتگیں مردمانی جاور دگر اِنت پرچا کہ ما لٹ وارتگ، بزگ ءُ زیردست جوڑ کنگ بیتگیں مردم ایں پمیشکا مئے زمہ واری گیشتر بہ اَنت۔ مارا وتی زند گوازینگ ءِ توجیل ھم کنگی انت ءُ راجی جھد ءِ تہ ءَ ھم وتی کرد پیلو کنگی اِنت۔
آئیءَ گْوشتگ کہ پاکستان مئے سیکولریں دود ءُ ربیدگاں ولگوج کنگ کوشست ءَ اِنت۔ پاکستان گْوش ایت کہ شما شریں مسلمان نہ اِت، بہ یا اِت ما شمارا شریں مسلمان جوڑ کن ایں۔ بلے راستی ایش اِنت کہ پاکستان ءُ آئی ءِ تْرام (نظام) زیک جوڑ بوتگ انت۔ بلوچ چہ ھزاراں سالاں ھست اِنت ءُ چہ سداں سالاں مسلمان اِنت۔ ما آدگہ راجانی وڑ ءَ دین ءُ ستکانی بنیاد ءَ بھر ایں۔ بلوچانی تہ ءَ ھندو ءُ دگہ دین ءِ منوک ھم ھست اِنت کہ سداں سال اِنت ھمد ءَ نشتگ اَنت ءُ بلوچی زبان ءُ دود ءُ ربیدگ اش زرتگ اَنت۔
آئی ءَ گْوشتگ بی ایس او آزاد ءُ بی این ایم ءِ جوڑ بوگ، پد ءَ بلوچ جنگی گلانی ادارھانی بنیاد ءَ دیم ءَ آیگ ءَ آجوئی ءِ جھد ءَ مھکمیں بنیادے داتگ۔ پمیشکا اے گھگیری ءَ چہ دو دھکءَ گیش اِنت کہ برجاہ انت۔ اگاں گل مہ بوتین اَنت گڑا پیسرگیں گھگیری ءِ وڑ ءَ اے گھگیری ھم زیت آسر بیتگ اَت۔آجوئی ءِ جھد ھم ھمے پیم بیت کہ تو گوں دژمن ءَ وتی گھگیری ءَ شول دئے، آئی ءَ دم برائین ءُ پْروش دئے۔یا روچے آ باور کنت کہ بلوچ پہ زور ءَ وتی گلزمین ءَ یلہ کنگ ءَ زیردستی ءِ منگ ءَ ساڑی نہ اِنت ، آ لاچار بیت ءُ تئی ڈیھ ءَ یلہ دنت۔
