ایردستیں راجاں زورگری ءِ بگیری ءَ ھمدستی ءَ جھد کنگی اِنت۔ ڈاکٹر نسیم

جنیوا ، سوئزرلینڈ : پشتون پانک زْرمبشت ( پی ٹی ایم ) ءِ ماں جنیوا ءَ برجم دارگ بیتگیں نیادے ءَ تْران کنان بلوچ راجی زْرمبشت ( بی این ایم ) ءِ سرکماش ڈاکٹرنسیم ءَ ایردستیں راجانی سرڈگار ءِ زورگری ءِ بگیری ءَ ھم دست ءُ ھواریں جھد ءِ لوٹ ءِ سر ءَ زور داتگ۔

اے نیاد ماں جنیوا ءَ راجانی سنت ءِ مردمی اگبالانی پتر ءِ 54 می نیاد ءِ دم ءُ درگت ءَ لوٹائینگ بیتگ اَت۔ ایشیءِ تہ ءَ بلوچ راج ءِ جھگیری کنان ءَ بی این ایم ءِ سرکماش ءَ بھر زرتگ ، گوں پشتون راج ءَ یکجھتی کرتگ ءُ ھم بندیں سیادی سبزینتگ اَنت۔

چیئرمین ءَ بلوچ ءُ پشتون راج ءِ جیڑہ، درد ءُ آیانی سر ءَ گْوستگیں تباھی ءِ سھرا کنگ ءِ کوشستانی سر ءَ گپ جنان ءَ گْوشتگ زوراکی ءُ دلپدردی اِنت کہ جنیوا ءَ ما پہ وتی وشنودی ءُ مراگاھے ءَ بھر زیرگ ءَ نے اتکگ ایں بلکیں میان استمانی گلانی دیم ءَ دزبندی کنگ ءَ مچ بیتگ ایں۔

سرکماش ءَ بلوچ ، پشتون ، سندی ءُ کشمیر ءِ مردمانی مڈیانی سر ءَ چہ پجار ءُ راھنبدی بستار ءَ زبھر ایں مھترھند ءِ زورگری ءِ سر ءَ گپ جنان پاکستان ءِ واکداری تْرام ءِ سر ءَ ایراد گیپتگ ، آ اود ءَ لشکر سکا بالادست اِنت کہ آجوئی ءِ زْرمشبتانی ایرموشگ ءَ ایردستیں راجانی مڈیاں دری واکاں دیگ ءَ اِنت۔

وتی مردمانی زور بیگواھی ءُ آیاں زندانی کنگ ءِ سر ءَ گپ جنان چیئرمین ءَ گیشینتگ کہ ’ بیگواھیں مردم‘ ءِ گالبند پہ مئے مردماں راست نہ بیت کہ مئے چمانی دیم ءَ آوار جنگ بہ اَنت۔ آئی ءَ چہ میان استمان ءَ لوٹ کرتگ کہ آ اے راستی ءَ بہ زانت ءُ بلوچ ، پشتون ءُ سندیانی سر ءَ بیوکیں رستری زوراکیانی بگیری بہ کن اَنت۔

سرکماش ءَ وتی گْوشتانک ءَ بلوچ ءُ پشتون راجانی میان ءَ گْوستانکی، زمینی ءُ ربیدگی سیادی سھرا کرتگ اَنت ءُ درائینتگ بلوچ ءُ پشتون راجاں بھر کنگ ءُ آیانی میان ءَ اڑاند ودی کنگ ءِ کوشستانی بگیری ءَ دوئیں راج ھم سنت بہ بہ اَنت۔چہ مئے پیراں رس اتگیں ربیدگی مڈیانی ارزشت ءَ بہ زان اَنت ءُ ایشاں پولے ءِ رنگ ءَ کارمرد بہ کن اَنت کہ مارا مئے رژناھیں باندات ءِ شوھاز ءَ ھم سنت کن اَنت۔

گڈی ءَ آئی ءَ یکیں دژمن ءِ بگیری ءَ یکجاھیں جھد ءِ سر ےَ زور دات ءُ چہ درسیں بھرزیروکاں ھم سنتی ءُ یک دومی ءِ کمک کنگ ءِ گْوشت۔ آئی ءَ چہ پشتون راج ءَ پہ پاکستانی لشکر ءَ پشتونانی بھرتی کنگ ءِ بگیر ءَ باوست ھلائینگ ءِ ھم لوٹ کرت پرچا کہ پاکستان براتیں راجاں یک دومی ءِ بگیر ءَ کارمرد کنگ ءَ اِنت۔ سرکماش ءَ اے ستک ءِ درشان کرت کہ گوں یکجاھیں کوشستاں چہ پاکستان ءَ آجوئی گرگ بیت۔