بی این ایم ءِ اگدہ داری پتر ءِ سیمی نیاد : ما پاکستانی زوراکیاں تیوک ءَ گوں تْرام اتگیں راجی زْرمبشت ءَ داشت کن ایں۔ ڈاکٹر نسیم

بلوچ راجی زْرمبشت ( بی این ایم ) ءِ سرکماش ڈاکٹر نسیم ءِ پاگواجھی ءَ گل ءِ اگدہ داری پتر ءِ سیمی نیاد بیتگ۔ اے نیاد ءَ جتائیں بنگپ ، دمگی ءُ میان استمانی جاور ءِ سر ءَ چمشانک دیگ ءُ بروردی شرگداری ءَ پد لھتے پرارزشتیں شور کنگ بیتگ۔

نیاد ءِ تہ ءَ سرکماش ڈاکٹر نسیم ءَ بلوچستان ءِ بے وڑیں جاورانی پژدر ءَ گل ءِ دیمروی ءِ سر ءَ دلجمی درشان کرتگ ءُ گْوشتگ بلوچ گلزمین ءَ بی این ایم پہ وتی سرگرمیانی برجاہ دارگ ءَ بازیں جیڑھانی دیمپانی اِنت بلے اے جیڑھاں پد ھم گل ءَ وتی نوکیں شور ءُ شونداتانی رد ءَ جتائیں رنگ ءُ دْروشماں وتی ھستی پھریز اتگ۔

آئی ءَ گْوشتگ چوناھیں ھم جاور بہ بہ اَنت بی این ایم گوں وتی لیکھی ھمبلاں دیم ءَ جزگ ءِ کوشست کنت پرچا کہ تیوک ءَ گوں تْرام اتگیں زْرمبشتے ءَ ما پاکستانی زوراکیانی دیم ءَ داشت کن این ءُ زْرمبشت ءِ تْرامگ ءِ گھتریں راہ گل ءِ پرکار کنگ اِنت۔

سرکماش ءَ گْوشتگ بلوچستان ءِ مردماں چہ پاکستانی گچینکاریاں وت ءَ گستا داشتگ ءُ بلوچ آجوئی لوٹوکانی پلہ مرزی کرتگ۔ بلوچانی دل ءَ مھتر ھند ءَ وتی ھما ترس کہ نندارینتگ اَت آ نی آسر بیتگ۔تربت ءَ ملک ناز ءِ شھیدی ءَ پد بلوچستان ءَ ھما بیداری ودی بیتگ ءُ ھما رنگ ءَ کہ راج ءَ گْوستانکی گھگیری ءِ درانگازی کرتگ ، آ برجاہ اَنت۔

آئی ءَ روکپتی بلوچستان ءَ شمسر ویل ءَ شھید بیتگیں بی این ایم ءِ راجمان پتر ءِ باسک شھید چیئرمین دوستا ءِ شھیدی ءِ بارہ ءَ گپ جتگ ءُ گْوشتگ روکپتی بلوچستان ءَ پاکستانی لشکر ءِ ارش ءَ سرجمیں کھولے شھید بیتگ۔اے بلوچستان ءِ پردردیں جاورانی تہ ءَ دلپدردیں ھالے اَت۔اے راہ ءَ شھیدی ھست بلے اے رنگیں تاوانانی درد چد ءُ گیشتر اِنت۔

’’ پاکستانی مھترھند یکشل ءَ بلوچاں کشگ ءَ اِنت ءُ شمسر ویل اے زوراکی ءِ تہ ءَ نوکیں رنگ ءِ گیشی یے۔‘‘

آئی ءَ گْوشتگ چہ پاکستانی زوراکیاں لڈ ءُ بار کرتگیں ھزاراں کھول ھمساھگیں ڈیھاں ناگیگیں جاوراں زند گوازینگ ءَ اَنت۔ آ اود ءَ آیاں میان استمانی تک ءَ پہ درانڈیھاں جوڑ کنگ بیتگیں تْرامگیج ءِ چیردستی ءَ ’درانڈیھ ‘ ءِ بستار دیگ نہ بیتگ۔ اے مئے واھگ ءُ کوشست اِنت کہ آیاں درانڈیھ منگ بہ بیت ءُ آ اود ءَ آیاں ھما اگبال بہ رس اَنت کہ راجانی سنت ءَ گیشینتگ اَنت ءُ سرجمیں جھان اش من ایت۔

بلوچستان ءَ مردمی اگبالانی رد ءَ بی این ایم ءِ کوشستانی بارہ ءَ گپ جنان آئی ءَ گْوشتگ بی این ایم بلوچستان ءِ راجی ، سیاسی ءُ مردمی اگبالانی سر ءَ یکشل ءَ گپ ءُ تْران کنگ ءَ اِنت۔ نیدرلینڈز ءَ بی این ایم ءَ ماں بلوچستان ءَ مردمی اگبالانی سر ءَ سیمی میان استمانی پتر داتگ۔ راجانی سنت ءِ نیاد ءِ میان ءَ آ اود ءَ گپ ءُ باوست کرتگ ءُ اے سالی مارچ ءِ ماہ ءَ پد راجانی سنت ءِ نیادانی دْرچ ءَ ھم جنیوا ءَ چہ بی این ایم ءِ نیمگ ءَ مراگش ایر کنگ بیت۔

• مارا پہ بلوچستان ءِ آجوئی ءَ چہ وتی انیگیں کوشست ءُ کاراں گیشتر کار کنگی اِنت۔ دل مراد

گوں اگدہ داری پتر ءَ تْران کنان سرکارگشاد دل مراد ءَ گْوشتگ بلوچ راجی سیاست ءِ تہ ءَ بلوچ راجی زْرمبشت ( بی این ایم ) ءِ سھرائیں کردے۔راجی آجوئی ءِ زْرمبشت ءَ بی این ایم تیوکیں گلے کہ آئی ءِ جوڑ کنوکیں سروکاں بہ گر اگدہ دار ، بنجاھی پتر ءُ باسکاں مزنیں کچے ءَ وتی سر نْدر کرتگ اَنت۔گل ءِ سروک ، باسکانی دیمونیاں دیم ءَ ایر کنگ ءُ گوں یکجاھی ءَ کار کنگی اِنت۔آشوبی گلاں مدام شریں شوندات ، وت ماں وتی منگہ ءُ یکجاھی کار کنگ ءَ جْوانیں بروردے رس ایت۔ما گل ءِ تہ ءَ مدام ھمدستی ءَ کار کنگ ءُ وت ماں وتی منگہ ءِ دید ءُ زانگ ءِ سر ءَ کار کرتگ، اے مئے گل ءِ دودانی ارزشتی ئیں بھرے۔

آئی ءَ گْوشتگ مارا وڑ وڑیں جیڑھانی دیمپانی اِنت چہ ایشاں مھترھند ءِ زوراکی ، درانڈیھیں بلوچانی جیڑہ ، رنگیں جیڑہ ھست اَنت بلے ما اے گوں شونداتاں اے جیڑھاں مھار کرت کن ایں یا وتی تاواناں کم کرت کن ایں۔ گوں شریں کاربولکاں مئے کار کنگ ءِ بودشت ءِ تہ ءَ سھرائیں رنگے ءَ گیشی کئیت۔بی این ایم گوں وت ءَ نزیکیں گلاں سیادیانی سرسبزینگ ءِ کار کنگ ءَ اِنت امیت ھمیش اِنت کہ چہ کْوھنیں سیادیانی سرسبزینگ ءَ ما جْوانیں رنگے ءَ پہ راجی جھد ءَ کار کرت کن ایں۔

آئی ءَ گْوشتگ زْرمبشت ءِ تہ ءَ انچیں ھمے باریگے اتکگ اَت کہ گْوستگیں لھتے سالاں گوں راجی زْرمبست ءَ بندوک بیگ ءَ پد ھم مھترھندی بیڑانی پد ءَ درشان ءِ جاور ءِ تہ ءَ پدریں رنگے ءَ مٹی اتکگ بلے مھترھندی زوراکی ءُ جنگی میارانی انچیں ویل بیتگ اَنت کہ بلوچ چاگرد پچ لرز اتگ۔ زوراکی ءُ چکچینی ءِ اے دْرچ ءَ بلوچ چاگرد ءِ تہ ءَ ترس آسرینتگ ءُ نوکیں جنبش ءُ جوشے دیم ءَ اتکگ۔ وھدے بالاچ مولابکش ءِ ویل بوت گڑا اد ءَ نوکیں زْرمبشتے بنا بوت ، چہ مکران ءَ بنا بیتگیں زرمبشت ءِ دْرچ مزنیں دیرپندیں روانکے جوڑ بوت ، بلوچ گلزمین ءِ جتائیں ھنداں بلوچستان ءِ سیمسری دمگ ڈیرہ گازی ھان ءُ سنگر ( تونسہ ) ءَ روان پنجاپ ءَ پتر اِت ءُ نوک آبادی ءُ زورگر ءِ بنجل اسلام آباد ءِ اھوالکاری گس ءِ دیم ءَ نندانک جت۔

دل مراد ءَ گْوشتگ کہ اے پدر اِنت کہ پاکستان زمہ واریں مھترھندے نہ اِنت ، نہ وتی راھبند ءَ مان آر ایت ناں میان استمانی راھبنداں۔پاکستانی لشکر بلوچستان ءَ مردمی اگبالاں لپاشگ ءَ اِنت، نزیکیں روچاں پاکستان ءِ زوراکی ، چکچینی ءُ مچی ڈنڈ دیگ ءِ شوندات ءِ تہ ءَ کمی آیگ ءِ گمان کم اِنت بلے زْرمبشت ءَ ھواریں درسیں گلانی ھمے ڈبو اِنت کہ آ پاکستانی زوراکی ءَ جھان ءِ دیم ءَ پدر بہ کن اَنت ءُ بلوچ راج ءَ گیشتر بہ تْرام اَنت ءُ مگیم بہ کن اَنت۔بلوچ دیرپندیں روانک ءَ ھمے کلوہ زرتگ ءُ اسلام آباد ءَ شتگ داں پاکستان ءُ جھان ءَ سرپد بہ کنت کہ پاکستانی لشکر ماں بلوچستان ءَ چونیں جنگی میار کنگ ءَ اِنت۔

آئی ءَ گْوشتگ دیرپندیں بلوچ روانک ءَ بے گر ءُ دار نندانک ءَ کلگ، وتی گپانی جنگ ءِ موہ دیگ ءِ جاہ ءَ پاکستان ءَ وتی نوک آبادی کردار گیشتر سھرا کرت، دیرپندیں روانک ءِ بھر زیروکانی پہ زور ڈیھ ءَ در کنگ ءِ کوشست کرت ، مزنیں کچے ءَ مردم دزگیر کرت اَنت، ھرچ وڑیں آزار داتگ بلے بھر زیروکاں گوں بھادری ءُ مزن جگری ءَ اے درسیں زوراکیانی دیم ءَ وتی گدان جت، میان استمانی رسانک ، برتانیا ءِ پارلیمان ءِ باسکاں بلوچ جیڑہ ءِ نیمگ ءِ دلگوش گْور کرت۔ اے مزنیں سوبمندی اَت اَنت چوش کہ اسلام آباد ءَ بلوچ ءِ کلوہ مان نے آرتگ گڑا روانک ءِ چن ءُ لانچ کنوک واتر بوت اَنت ءُ بلوچ راج ءَ گْوشت اش کہ اسلام آباد بلوچستان ءَ زیردست سرپد بیت ءُ نوک آبادی ءِ وڑ ءَ گر ءُ دار کنت۔نی اے بلوچ ءِ سر ءَ اِنت کہ آ چونیں کار شورے ٹاھین ایت ءُ دیم ءَ روت۔

دل مراد ءَ گْوشتگ پاکستان ءِ گْوستانک ءَ اے سری رند اَت کہ مھترھند ءِ سروک بزاں سروزیر ءَ من اتگ کہ بلوچ وتی پجار ءِ بنیاد ءَ پہ آجوئی ءِ مڑگ ءَ اِنت۔چہ ایشی ءَ پیش پاکستانی مھترھند ءَ بلوچ ءِ آجوئی ءِ زْرمبشت لھتے ناوشیں مردمانی رنگیں نام داتگ اَت ، پجیگ ءَ مھترھند ءِ سروک ءَ اے ھم من اتگ کہ پاکستانی لشکر ءِ زندان ءَ بندیں بلوچ اگاں آمیدگس ءَ پیش کنگ بیت اَنت گڑا آ چہ زندان ءَ یلہ بہ اَنت ، بزاں مھترھند ءِ سروک اے گپ ءَ منگ ءَ اِنت کہ بلوچ بیگواہ نہ اَنت بلکیں پاکستانی لشکر ءِ زندان ءَ بند اَنت۔

دل مراد ءَ گْوشتگ بلوچستان ءُ درانڈیھ ءَ بی این ایم ءِ ھمبل شریں وڑے ءَ بلوچ ءِ جھگیری کنگ ءَ اَنت بلے جھان ءَ سپارتکاری ءِ پڑ مزن اِنت۔ بلوچستان رنگیں پرارزشتیں زمین ءِ سر ءَ برجاھیں پہ مئے زْرمبشت ءَ مارا چد ءُ گیشتر کار کنگ لوٹ ایت۔ مارا تیوک ءَ لھتے ڈیھانی رک ءَ بند بیگی نہ اِنت بلکیں سپارتی جھان شوھاز کنگی اِنت۔ اے وھد باز ارزشت دار ایت ءُ گیشتر کار کنگ لوٹ ایت ، اوست ھمیش اِنت کہ ھمبل گوں زْرمبشت ءِ لوٹاں ھم آھنگ دیم ءَ جز اَنت۔