راجے ءِ بستار ءَ ما اے سرپد بیتگ ایں کہ گوں پاکستان ءَ یکجاہ بیگ چہ اوپار ءَ ڈن اِنت بلے چہ پاکستان ءِ نوک آبادی ریاست ءِ چیردستی ءَ درکپگ ءَ بے کچیں دیمونی ءُ راستیں گامگیج لوٹ ایت۔ مارا پہ وتی باندات ءَ سکا کار کنگی اِنت ءُ راستیانی منوگر بیگی اِنت۔ اے گپ بلوچ راجی زْرمبشت ( بی این ا یم ) ءِ سرکماش ڈاکٹر نسیم ءَ بی این ایم جرمنی تک ءِ پنچمی مچ باسکی نیاد ءَ گْوشتگ۔
آئی ءَ ھمے رد ءَ گْوشتگ گوں پاکستان ءَ مئے ھچ رنگیں سیادی یے نہ بیتگ ءُ ناں کہ ما گوں پاکستان ءَ سیادی یے ٹاھینگ لوٹ ایں۔ مئے دید ءُ واب سھرا اِنت کہ ما چہ پاکستان ءِ نوک آبادی واکداری ءَ آزاتی لوٹ ایں۔
آئی ءِ گْوشگ اَت پاکستان وتی زوراکیاں گیش کنت داں مردمانی دل ءَ ترسے بہ نندارین ایت ءُ مردم پہ وتی آجوئی ءَ گپ جت مہ کن اَنت۔یکشلیں زوراکی، زور بیگواھی ، کشت ءُ کوش ءُ سرجمیں کھول ءُ میتگانی ڈنڈ دیگ ءَ پد ھم بلوچ راج چہ وتی واھگ ءُ مسام ءَ بھ پشت ءَ نہ کنز اتگ۔مارا ستک ءُ باور اِنت کہ اے جھد داں بلوچستان ءِ آجوئی ءَ برجاہ بیت۔
ماں درانڈیھ ءَ بلوچانی جھد ءِ سر ءَ گپ جنان آئی ءَ گْوشتگ شکے نیست کہ ما دراجیں پندے بر اتگ ءُ اے جاہ ءَ سر بیتگ ایں بلے مارا چہ پاکستان ءَ آجو بیگ ءَ اے سپر دیم ءَ برگی اِنت۔
بی این ایم ءِ سرکماش ءَ گْوشتگ گْوستگیں راجمان پتر ءَ بلوچ راجی زْرمبشت ءِ چد ءُ گیش بلدیں رنگے ءَ دیم ءَ برگ ءَ گل ءِ آئین ءِ تہ ءَ شریں مٹی آرگ بیتگ داں بلوچ زْرمبشت گیشتر سانمند ءُ پر سیت کنگ بہ بیت۔نزیک ء دو سال سرجم کنگ ءَ پد ما ھمیشی ءِ برورد ءَ گندگ ءَ ایں۔چہ بی این ایم ءِ مردمی اگبالانی تْرامگیج ’ پانک‘ ءِ جوڑ بیگ ءَ بلوچستان ءَ مردمی اگبالانی بگیریانی سھرا کنگ آسان بیتگ۔ھمے پیم چاگردی گھبود ءُ رسانکدری تک ءَ گیشتر بلدیں رنگے ءَ کار گندگ بیتگ ءُ مئے دری کارانی تک ءَ ھم سھرائیں وڑے ءَ دیمروئی کرتگ۔
نوک آبادی سانانی سر ءَ گپ جنان آئی ءَ اے جست ایر کرتگ کہ اگاں مردمے چہ ٹی بی رنگیں نادْراھی ءَ ھم مر ایت گڑا اے جیڑگی گپے ، انچوش کہ نامی ئیں بلوچ اکس گر کمانچر ءِ مرگ پاکستان ءِ نوک آبادی شونداتانی دْرچ اِنت پرچا کہ بلوچستان ءِ جاہ مننداں جاندْراھی ءِ بنکی آسراتی دیگ نہ بیتگ اَنت۔
آئی ءَ درانڈیھ بیتگیں مردمانی جاور ءِ سر ءَ چمشانک داتگ کہ درانڈیھی ءِ زند پہ کس ءَ آسانیں گچینیں نہ اِنت۔ وھدے کہ تو چہ گلزمین ءَ دیر بہ ئے گڑا پہ تو ھچی پیشگی وڑ ءَ نہ بیت،داں اد ءَ کہ تئی وشی ءُ گم ھم پیسرگیں پیم ءَ نہ بہ اَنت۔تئی سیر ءِ مراگاہ ، بلوچی سیرانی وڑ ءَ نہ اَنت۔ھمے پیم مرگ ءُ پرس ءِ پتر ھم ھما رنگ ءَ نہ منتگ اَنت۔بلے ھمے جاور ترا گیشتر توانمندکن اَنت ءُ پہ وتی مول ، آجوئی ءُ پہ گلزمین ءَ واتر بیگ ءِ سکین ءَ دے اَنت۔
بلوچ راجی زْرمبشت ءِ سرکماش ڈاکٹر نسیم ءَ شھید دوستا مامود ءُ پہ آئی ءِ کھول ءَ ستا درشانتگ۔ ھمے پیم آئی ءَ پہ زور بیگواہ کنگ بیتگین ءُ بلوچ شھیداں ستا درشانتگ کہ پاکستانی آزار جاھاں درمردمی آزار سگگ ءَ اَنت۔
آئی ءَ گْوشتگ جرمنی ءَ آیگ ءُ اے مراگش ءِ بھر بیگ پہ من پھری گپے۔