پہ اکساں جھل ءِ چیڑو ءَ گر اِت :
بلوچ راجی زْرمبشت ( بی این ا یم ) ءِ سرکماش ڈاکٹر نسیم ءَ پارٹی ءِ تہ ءَ راہ ءُ راھبند سر ءَ روگ ، جھل ءِ تْرامگیجانی ( ادارھانی ) گوں بنجاھی اگدہ داراں ھم آھنگی ءُ بنجاھی تک ءِ مھکمی ءِ سر ءَ زور داتگ۔ آئی ءَ وت ءَ گستا کنگ ءُ تیوک کار کنگ شر نہ لیک اتگ ءُ کڈن کرتگ کہ بی این ایم باسکاں گل ءِ راہ ءُ راھبندانی تہ ءَ ھمدست ءُ ھمگرنچی ءَ کار کنگ لوٹ ایت۔ گل ءِ تہ ءَ باسکانی وتی جند ءِ لیکہ ءُ سسایاں الم ارزشت ھست بلے آیانی سر ءَ گامگیج زیرگ ءِ ھم راھبندے ھست اِنت کہ آئی ءِ ھمک باسکاں پابندی کنگی اِنت۔
آئی ءَ اے گپ ماں برتانیا ءَ گوں بی این ایم ءِ باسکاں بیتگیں نیادے ءَ کرتگ اَنت۔ سرکماش ڈاکٹر نسیم ءِ پاگواجھی ءَ بیتگیں اے نیاد سئے بھران اَنت۔ بنداتی بھر ءَ بی این ایم ءِ مستریں کمک سرکماش ڈاکٹر جلال ءِ نبشتہ کرتگیں کتاب ’ پالیٹیکل منیجمنٹ ‘‘ ءِ دیمدرائی بیتگ، اے کتاب بی این ایم ھیلکاری دْرچ ءِ بھر اِنت۔
اے نیاد ءِ جارچین بی این ایم برتانیا تک ءِ کمک سرکماش نسیم اباس اَت۔ ڈاکٹر جلال ءِ کتاب ءِ دیمدرائی بی این ایم ءِ سرکماش ڈاکٹر نسیم ، کستریں کمک سرکارگشاد ھسن دوست ، بی این ایم ءِ دری کارانی رھوتکار فھیم ، کمک رھوتکار نیاز ءُ بی این ایم برتانیا تک ءِ کماش منزور ءَ کرت۔
ڈاکٹر نسیم ءَ گل ءِ تہ ءِ کارانی تہ ءَ راہ ءُ راھبندای سر ءَ گپ جنان ءَ گْوشتگ بی این ایم استمانی گلے ، بلے استمانی کارانی ھم ادارھی وڑ ءُ ڈولے بیت۔اگاں باسکے نوکیں وڑ ءُ ڈول ، نوکیں سسا ءُ شونداتے دیم ءَ آرگ لوٹ ایت گڑا آئی ءَ ھمے راھبندانی سر ءَ روگی اِنت۔ ھرچ نوکیں سسایے ءِ سر ءَ بنزھاں گپ جنگ بہ بیت، ھمے گپ تک ءُ ھنکیناں سر بہ بیت ءُ پد ءَ بنجاھی پتر ءَ بہ رس ایت ءُ شونداتے جوڑ بہ بیت نی آ گل ءِ شوندات گْوشگ بیت ، کسے ءِ وتی جند ءِ لیکہ شوندات گْوشگ نہ بہ اَنت۔
ڈاکٹر نسیم ءَ گل ءِ تہ ءِ کارانی تہ ءَ راہ ءُ راھبندای سر ءَ گپ جنان ءَ گْوشتگ بی این ایم استمانی گلے ، بلے استمانی کارانی ھم ادارھی وڑ ءُ ڈولے بیت۔اگاں باسکے نوکیں وڑ ءُ ڈول ، نوکیں سسا ءُ شونداتے دیم ءَ آرگ لوٹ ایت گڑا آئی ءَ ھمے راھبندانی سر ءَ روگی اِنت۔ ھرچ نوکیں سسایے ءِ سر ءَ بنزھاں گپ جنگ بہ بیت، ھمے گپ تک ءُ ھنکیناں سر بہ بیت ءُ پد ءَ بنجاھی پتر ءَ بہ رس ایت ءُ شونداتے جوڑ بہ بیت نی آ گل ءِ شوندات گْوشگ بیت ، کسے ءِ وتی جند ءِ لیکہ شوندات گْوشگ نہ بہ اَنت۔
آئی ءَ گْوشتگ باز بر ءَ چاگردی رسانکدر ءَ سنگتانی گپ ءُ سسایانی سر ءَ مردم جیڑ اَنت ءُ لھتے ھمے سرپد بیت کہ اے گل ءِ شوندات اِنت بلے بھ چوش نہ اِنت پرچا کہ شوندات چہ بنجاھی پتر ءِ نیمگ ءَ کاینت۔ سسا ، سوج ءُ پیشنھادے سی سی ءَ منگ ءَ پد نی شوندات جوڑ بیت۔ گلے بہ بیت یا ڈیھے آ ھیرارکی تْرامے ءِ تہ ءَ دیم ءَ جز ایت۔ ڈیھ آئین ءُ راہ ءُ راھبندانی سر ءَ برجاہ اَنت ءُ گل ءَ ھم ھمے دار اَنت۔
بی این ایم ءِ سرکماش ءَ وتی گپانی تہ ءَ بی وائی سی ءُ پی ٹی ایم ءِ جھد ءِ سر ءَ ھم گپ جتگ ءُ آ ساڑاتگ اَنت ، آئی ءَ گْوشتگ پاکستان گوں بلوچ ءُ پشتوناں یک وڑیں کرد کنگ ءَ اِنت ءُ دوئیں راج ءِ راجدوست ءُ لیکھی سیاست ءِ جھلانکی ءَ سربیوکیں ھنڈالاں گْوجگ ءِ کوشست ءَ اِنت۔ پشتون چاگرد ءَ چہ بلوچ چاگرد ءَ گیشتر پاکستان راج دوستی ءِ بگیریں واکانی رودینگ ءَ سوبمند بیتگ۔ دینی تْرندروئی ءُ ٹکی تْرام ( قبائلی نظام ( ھم آ اود ءَ مھکم اَنت۔ اے درسانی بگیری ءَ گوں پشتون راجی سنچ ءُ سما ءَ پی ٹی ایم گھگیری کنگ ءَ اِنت ءُ آ گوں وتی ھمے مولاں بندوک بیت نی گڑا سوب کنت۔ چہ ایشی ءَ پیش ھمایاں کہ پشتون راجدوستی ءِ سکین داتگ نی پاکستان ءِ پارلیمان ءَ نشتگ اَنت ءُ رنگراہ ءَ روگ ءَ اَنت ، اے واک ھم پی ٹی ایم ءِ مولانی دیم ءَ اڑاند اَنت۔
ڈاکٹر نسیم ءَ گْوشتگ پشتون پانک زْرمبشت ( پی ٹی ایم ) ءُ بلوچ یکجھتی پتر ( بی وائی سی ) ءِ سر ءَ مھترھند پمیشکا پابندی جنگ ءَ اِنت کہ اے دوئیں گل پشتون ءُ بلوچ راج ءَ چہ وت ماں وتی گر ءُ چیل ءُ بگیریاں در کنگ ءُ گوں راجی سنچ ءَ ھم پت کنگ ءَ اَنت۔
آئی ءَ گْوشتگ بلوچ گلزمین ءِ سر ءَ راج دوستی ءِ مارشتاں ردوم زرتگ ، سیاسی اگبالانی زْرمبشت ءُ اے زْرمبشت ءِ سروک منگ بیتگ اَنت کہ شریں گپے بلے ھمود ءَ نشتگیں کارکن چہ گْوست ءَ وت ءَ مہ سند اَنت بلکیں چہ گْوست ءِ کرد ءُ کاراں در بہ بر اَنت۔ اد ءَ نشتگیں کلانھیں باسکاں دْراجیں باریگے گوں بلوچ جھد ءَ گوازینتگ چہ ھما جاوراں گْوستگ اَنت ، ھمایانی پد ءَ ایشانی گْور ءَ زانت ءُ سرپدی ھست کارکن چہ ایشاں دربرگ ءُ وت ءَ تْرامگی اِنت۔تْرند ءُ تھلیں باریگے بی ایس او ( آزات ) ، بی آر پی ءُ بی این ایم ءِ سر ءَ گْوستگ ءُ مئے وش بھتی اِنت کہ ما مروچی ھم بی این ایم ءِ پتر ءَ جھد کنگ ءَ ایں۔ دژمن ءَ سیاسی کارکنانی بگیری ءَ سکیں کارروائی کرتگ ، آ کشتگ اَنت،زندانی کرتگ اَنت بلے آیانی لیکہ بلوچستان ءِ ھمک لوگ ءَ سر بیتگ۔
سرکماش ءَ بے تاھیری درشانتگ کہ مھترھند بی وائی سی ءِ سر ءَ بیڑ برگ ءَ اِنت ، آئی ءَ گْوشتگ پہ بی وائی سی ءِ ولگوج کنگ ءَ پاکستان ءَ تْرام اتگیں شورے کرتگ ، کہ ایشی ءِ تہ ءَ 1997 ءَ نوازشریپ ءِ زمانگ ءَ جوڑ کنگ بیتگیں بے بندیں راھبند انٹی ٹیرر ازم ایکٹ ( اے ٹی اے ) ءِ رد ءَ پورت شیڈول شوندات ھم ھوار اِنت داں پاکستانی مھترھند ءِ ادارہ اے مردمانی بگیری ءَ گوں آئینی واکاں گامگیج زرت بہ کن اَنت۔ اے راھبند ءِ رد ءَ آیانی تر ءُ گردانی دارگ ءِ نیمونے ودی کرت بہ کن اَنت کہ اے آئینی کارے پرچا کہ پورت شیڈول ءِ رد ءَ ات مردمانی سر ءَ ناشرکاری ءِ شک ھست۔ نی اے بلوچستان ءِ سیاست ءِ پڑ ءَ ساڑی ئیں راھشون ءُ کارکنانی سر ءَ اِنت کہ آ چونیں شوندات ءُ راھبند ٹاھین اَنت داں آیاں وتی سرڈگار ءِ سر ءَ وتی سرگرمیانی برجاہ دارگ ءَ شول کشیں زمانگ ءُ باریگے ءَ کار کنگ ءِ موہ بہ رس ایت۔
اے گْوشتانک ءِ لھتے بھر شما چہ یوٹیوب ءَ گوش داشت کن اِت :
