مرگاپ ءِ ویل راجی دردے ، بلے شھمیرانی دیمونیاں ، برگشتگ ءُ دژمن بے سوب کرت اَنت۔ بی این ایم

اے گپ تچک اِنت کہ مرگاپ ءِ ویل راجی ویلے بلے شھمیرانی دیمونیاں ناں ایوک ءَ دژمن ءِ من ءُ واھگ بے سوب کرت اَنت بلکیں برگشتگ ھم سھرا کرت اَنت۔ اے دیمونیاں زْرمبشت چد ءُ گیش ردوم دات ءُ نوکیں کشکے ءَ راھشونی کرت۔

بلوچ راجی زْرمبشت ( بی این ایم ) ءِ سرکماش ، ڈاکٹر نسیم ءَ مرگاپ ءِ شھمیرانی یات ءَ برجم داشتگیں نیادے ءَ گپ جنان ءَ گْوشتگ کہ پاکستان ءِ چیر دستی ءَ گْوستگیں 77 سالانی میان ءَ ، سئے پدریچاں مھترھندی بیدادی ءُ زورگری ءِ دیمپانی کرتگ۔ ھمے دیمونی باسنچ ، لیکھی ، اوپار کنوک ءُ داروکیں سیاسی کارکن ودی کن اَنت۔

مرگاپ ءِ ویل ءَ بلوچ راجی زْرمبشت ءَ نوکیں ھاٹیگے دات ، ءُ اے راستی گواچن بیتگ کہ شھمیرانی دیمونیاں دژمن ءُ برگشتگانی من ءُ واھگ اشکند کرتگ اَنت۔

بنجاھی مراگش ءَ ابید ، شھمیر راشد ھنکین ( مشکے ۔ آواران ) ءُ شھمیر انور ایڈوکیٹ ھنکین ( کیچ ۔ گوادر ) ءِ نیمگ ءَ ھم مرگاپ ءِ شھمیرانی یات ءَ مراگش برجم دارگ بیتگ۔ اے مراگشاں بی این ایم ءِ سرکماش ڈاکٹر نسیم ءِ پجیگ ءَ کستریں کمک سرکماش بابل لطیف ، سرکارگشاد دل مراد ، رسانک ءُ ربیدگی کارگشاد قاضی داد محمد ریحان ، بنجاھی کلیتدار ناصر ، بنجاھی پتر ءِ باسک چیف اسلم ، بنجاھی پتر ءِ باسک ماہ گنج ، تلار ناز ءُ ذیشان منان ءَ گپ جتگ۔

گپ جنوکاں گْوشتگ لھتے نامی ئیں مردم چہ زْرمبشت ءَ برگشت ءُ بی این ڈی پی (بلوچستان نیشنل ڈیموکریٹک پارٹی) رنگیں نوک جوڑ بیتگیں گلاں ھوار بوت —انچیں گلے کہ مھترھند ءِ پلہ مرزی ءَ باپ (بلوچستان عوامی پارٹی) ءِ وڑ ءَ اناگاہ جوڑ کنگ بیتگ اَت۔شھمیر غلام محمد ءَ آیانی بگیری ءَ گوں تمردی ءَ بلوچ راجی زْرمبشت ءِ دیمپانی کرت۔آئی ءِ دیمونی ءُ بے دروریں مارشتاں آئی ءِ ھمبل چہ پدکنزگ ءُ سواد ءُ سیت ءَ داشتگ اَنت ، چہ آیانی دلاں ترس کش اِت ءُ آیاں جز ءِ برجاہ دارگ ءِ ھاٹیگ دات۔

بی این ایم ءِ راھشوناں دیمتر ءَ گْوشتگ شھمیراں ناں ایوک ءَ ڈنی دشمنانی بگیری ءَ بلکیں گل ءِ تہ ءَ ھم اے رنگیں کرد ءُ کارستانی بگیری ءَ توار چست کرت کہ بلوچ راجی سیتانی چپی ءَ سرگرم اَت اَنت۔شھمیر غلام محمد ءَ وتی سر ءُ ساہ ءِ پرواہ نہ داشت بلکیں راج ءَ باور کنائینت کہ آ پہ برگشت ءَ ناں بلکیں برگشتگینانی بگیری ءَ زْرمبشت ءَ تْرامگ ءَ اِنت۔ آئی ءِ اے شور ءَ زْرمبشت ءُ راجی باندات ءِ کشک تچک کرت۔

آیاں گْْوشتگ شھمیر غلام محمد ءَ بی این ایم پمیشکا برجاہ داشت کہ برگشتگیں مردم بلوچ ءِ پجار ءِ گار کنگ ءَ مھترھند ءِ ڈک ءُ بندانی سر ءَ کار ءَ اَت اَنت۔ ’’ طبیب ء اکبر ‘‘ ءُ ’’ طبیب ء اصغر‘‘ ءِ دے ءُ زیر ھمے من ءُ مول ءِ رد ءَ بیتگ اَت ءُ آیانی دیم ءِ دارگ ءَ بی این ایم ، بلوچی راجی پجار ءُ مانشت ءِ پھریزگ ءِ چیدگ اَت۔ ءُ پہ برگشتی ءِ راہ ءِ تچک کنگ ءِ کوشست ءَ فدا احمد شھمیر کنگ بوت ، بلے غلام محمد ءَ فدا ءِ راہ یلہ نہ کرت ءُ آجوئی ءِ زْرمبشت ءِ تچکیں کلوہ شکسات۔

تْرانکاراں دلگوش پرینت ، راج کہ پہ وتی آجوئی ءَ جھد بنا کن اَنت ، آ روچے الم سوبین بہ اَنت۔اے کار ءَ وھد پکار اِنت ءُ اے دراجیں پند اوپار کنگ لوٹ ایت ، بلے ایشی ءِ آسر المیں سوبمندی یے۔راھشون دیمون بہ اَنت بلے زْرمبشت ءِ روانی برجاہ بیت۔شھمیرانی دیمونیانی برورد ءَ بلوچ زْرمبشت وتی منزل ءِ نیمگ ءَ روان اِنت ، ءُ آیانی سسا ءُ شھزانتی مئے راھشونی کنگ ءَ اَنت۔

مرگاپ ءِ شھمیرانی یات ءَ برجاہ دارگ بیتگیں مراگش ءَ بی این ایم ءِ کارانی سر ءَ ایمنی درشانگ ءُ گْوشگ بیتگ کہ بی این ایم ھرچ تک ءَ دیمروئی کنان بلوچ راجی آجوئی ءِ منزل ءَ نزیک کنان ، ساندار ءُ ھمک جھتی ئیں کردے پیلو کنگ ءَ اِنت۔