چہ شھمیریں ھان مھراب ھان ءِ شھمیری ءَ بہ گر داں مروچی ، بلوچ راج ءِ دیمونیانی دْرچ برجاہ اِنت ءُ داں سرڈگار ءِ آجوئی ءَ برجاہ بیت۔زیکیں روچ ءَ ھم جھدکار شھمیر بیتگ اَنت ءُ دو روچ پیش ھم۔ اے راہ ءَ جھدکاے نمیران بیت کہ راھشونے ، ھرکس وتی مٹ وت اِنت ءُ کس کسی جاہ ءَ گپت نہ کنت۔
اے گپ بلو چ شھمیرانی روچ ءَ برجم داشتگیں بلوچ راجی زْرمبشت ( بی این ایم ) ءِ نیادے ءَ تْران کنان بی این ایم ءِ بنجاھی گھبد ( فنانس سیکریٹری) ناسر ءَ جتگ اَنت۔
نیاد شھمیرانی یات ءَ دو دمان ءِ بے تواری ءُ راجی سوت ءَ بندات بیتگ۔ ابید چہ ناسر ءَ بی این ایم ءِ بنجاھی پتر ءِ باسک ھنیپ ءَ ھم گپ جتگ۔
بی این ایم ءِ بنجاھی اگدہ دار ناسر ءَ گْوشتگ آجوئی گرانبھائیں چیزے کہ سرانی دیمونیاں لوٹ ایت ، چہ ھمد ءَ آجوئی ءِ ارزشت ءِ سما بیت کہ پہ ایشی ءَ مردم وتی سراں نْدر کن اَنت۔ نمیرانیں بلوچ راھشون واجہ گلا مھمد ءَ مدام گْوشتگ کہ وھدے راجی جھدکارے شھمیر بیت گڑا ما پہ آئی ءَ دْروت ءُ ستک شانی کن ایں بلے وت پرچا ھمے واب ءَ نہ گند این ءُ ھمائی ءِ راہ ءَ گچین نہ کن ایں۔
’’ مروچیگیں زْرمبشت چہ پیسرگیں زْرمبشتاں پمیشکا ھم جتا اِنت کہ ایشی ءِ راھشوناں کارکنانی پیم ءَ دیمونی داتگ ءُ مارا ھمے کشک پیش داشتگ۔‘‘
ناسر ءَ گْوشتگ اے جھد ءِ بن ھشت ایر کنوکیں راھشون شھید گلام مھمد ، شھید لالامنیر ءُ دگہ ھمبل نمیران بیتگ اَنت یا زور بیگواہ اَنت بلے مروچیگیں جھد ءِ جیڑہ کمتر اَنت پرچا کہ آیاں پہ ما کار آسان کرتگ اَنت ءُ چہ ما باز گھتر وتی کرد پیلو کرتگ۔ زمانگ ءِ رد ءَ جھدانی لوٹ ھم مٹ بہ اَنت بلے چہ سریں مردمانی دیمونیاں مروچی جھد ءَ بیست سال ءَ برز اِنت کہ ادارھی بنیاد ءَ مگیم ءُ برجاہ اِنت۔مروچیگیں سیاسی ادارہ شھید گلام مھمد ءُ ھمراھانی کوشست ءُ دلگوشانی برورد اَنت۔
ناسر ءِ گْوشگ اَت ، اے سرڈگار ءَھزاراں سال اِنت کہ بلوچ نشتگ اگاں ما وت ءَ اے سرڈگار ءِ واھند گْوش ایں گڑا مارا پہ ایشی ءَ گوں وتی ساہ ءَ ھوار وتی ھرچ چیز نْدر کنگی اِنت۔
آئی ءَ گْوشتگ انگریزاں ھم سرجمیں بلوچستان گپت نہ کرت ءُ آیانی چہ اد ءَ در کپگ ءَ پد بلوچستان ءَ وتی سرجمیں آجوئی ءِ جار جت۔ پد ءَ پاکستان ءَ گوں توپک ءِ زور ءَ لھتے راجدْروھیں سردار ءُ واکدارانی کمک ءَ بلوچستان دستیگ کرت۔ گوں پاکستانی ریاست ءَ مارا ھچ سیادی نیست ، ناں مئے دود ءُ ربیدگوں آیاں ھوار اَنت ناں زبان۔انگت گوں سند ءُ اوگانستان ءَ مئے گْوستانکی سیادی ءُ نزیکی ھست اَنت بلے گوں پنجاب ءَ ھچ نیست۔ ءُ ناں کہ اے زورگری بلوچ ءَ من اتگ بلکیں چہ ھما بنداتی روچ ءَ ایشی ءِ بگیری ءَ جھد ءَ اِنت۔
بی این ایم ءِ بنجاھی پتر ءِ باسک ھنیپ ءَ گْوشتگ مارا اے نیاد ءَ ھمے مسام کنگی اِنت کہ ما راجی نمیرانیں سرانی کشک ءُ راہ ءَ یلہ نہ کن این ءُ آیانی کاراں سرجم کن ایں۔ بلوچ راج ءَ مدام زوراکانی بگیری ءَ گھگیری کُرتگ،دیمونی داتگ ءُ زوراک چہ وتی سرڈگار ءَ گلینتگ اَنت۔ اے رندی ھم بلوچ راج ءَ گھگیری ءِ راہ گچینتگ، دیمونی دیگ ءُ زورگریں پاکستانی ریاست ءِ بگیری ءَ جُھد ءَ اِنت۔ آروچ دور نہ اِنت کہ بلوچ راج وتی سرڈگار ءِ آجوئی ءِ مراداں گند ایت۔-
