بلوچ راجی زْرمبشت ( بی این ایم ) ءِ چیردستی ءَ باز راجی کانفرنسے برجم دارگ بیتگ کہ آئی ءِ تہ ءَ بلوچستان ، سند ، پختونخوا ، کشمیر ءُ گلگت بلتستان ءِ راجدوستیں گلانی راھشون ءُ جھگیراں بھر زرت۔ اے کانفرنس ءِ بنکی مول چہ پاکستانی مھترھند ءِ نیمگ ءَ اے دمگاں برجاھیں زورگریں شوندات ، ابرمی مڈیانی لٹ ءُ پل ، زورگری ءُ مردمی اگبالانی بگیریانی سر ءَ یکجاھیں سیاسی ءُ سفارتی راہ ءُ رندانی ٹاھینگ اَت۔
مراگش ءَ تْران کنوکانی تہ ءَ بی این ایم ءِ کستریں کمک سرکارگشاد حسن دوست ، جھانی سندی پتر ءِ راھشون ڈاکٹر لکو لوھانہ ، جموں کشمیر مردمی راجی گل ءِ حبیب الرحمان ، پشتون پانک زْرمبشت ( پی ٹی ایم ) ءِ فضل الرحمان آفریدی ، السی کارکن گلگت بلتستان (گل) ءِ شیرباز ءُ جیے سند آجوئی زْرمبشت ءِ سھیل ابڑو ھوار بیتگ اَنت۔ گْوشتانک دیوکاں مھترھندی زوراکی ، زور بیگواھی ، گزرانکی لگتمالی ءُ ربیدگی بیڑ ءُ آماچانی سر ءَ دلجمی ءَ گپ جت ءُ گْوشت کہ چیردستیں راج ھم سنتی ءُ ھواری ءَ جھد بہ کن اَنت۔
کانفرنس ءِ جارچین بی این ایم ءِ بنجاھی پتر ءِ باسک حاتم اَت ءُ بی این ایم ءِ ربیدگ ءُ رسانکی کارگشاد قاضی داد محمد ریحان ءَ مسام پیش کرت۔
تْران کوکاں وتی گپانی تہ ءَ گْوشتگ پاکستان اے وھدی چین ءُ امریکا ءِ میان ءَ ’ تبریتی سینڈوچ ‘ ( ’’ اسٹریٹجک سینڈوچ‘‘ ) جوڑ اِنت۔امریکا ءُ چین دوئیناں وتی چم اے دمگانی ابرمی مڈیانی سر ءَ پر داشتگ اَنت ءُ اے جاور پہ چیردستیں راجاں چد ءُ گیش جیڑہ ودی کنت۔ گْوشتانک دیوکاں شیوار کرتگ کہ اے مڈیانی دئے ءُ زیر ءِ سیت ایوک ءَ مھترھندی واکدار ءُ توانمنداں رس ایت ، گچیننی پاکستانی لشکر ءَ ءُ چیردستیں راج ، بلکیں لس پنجاپی ھم چہ ایشی ءِ سیتاں زبھر بیت۔اے پژدر ءَ گپ جنوکاں کڈن کرت کہ راجانی میان ءَ چد ءُ گیش تْرام ، باسنچ ءُ سفارتی تک ءَ پرکاریں وڑے ءَ کار بہ بیت۔
آیاں وتی گپاں درائینت سند وشحال بلے زیردستیں راجے۔ اد ءَ 63 ماں سدی ابرمی گیس ، ھزاراں ٹن ءِ اشکر ءُ ھم روچ ھزاراں بیرل ناپالاتگیں تیل در کنگ بیت بلے ایشی ءِ سٹ ءَ سند ءَ ایوک ءَ مرمانی کوش ءُ زور بیگواھی رسگ ءَ اِنت ءُ پہ زور مردم چہ آیانی دین ءَ ترینگ بیگ ءَ اَنت۔سند ءِ جھگیراں سند ءِ وتواکی ، چہ پنڈی ءِ چیردستی ءَ رستگاری ءُ آیانی چک ءَ ربیدگی ءُ دینی زوراکی ءِ آسر کنگ ءِ لوٹ کرت۔
گْوشتانک دیوکاں گْوشتگ بلوچستان ءِ بندن ، زمین چیری مڈی ءُ زمین دری شرکتاں دیگ بیتگ اَنت ءُ بلوچ راج گوں مھترھندی زور ءُ واک ءَ نگٹ کنگ بیگ ءَ اِنت۔ آیاں گْوشتگ ریکوڈک ، سینڈک ءُ گوادر ءِ کارشون ابید چہ مردمانی واھگ ءُ لوٹ ءَ آیانی سر ءََ مشگ بیتگ اَنت ، کہ ناں ایوک ءَ گزرانک ءَ تباہ کنگ ءَ اَنت بلکیں بلوچ ءِ ربیدگ ءُ پجار ھم چہ ایشاں گار ءُ گمساری ءِ دیمپان اِنت۔
آیاں پاکستان ءِ سر ءَ ایراد گپتگ ءُ گْوشتگ کہ مھترھند ءَ واکداری ءِ زورگریں رپک ءُ رند زرتگ اَنت۔آ اود ءَ مردمی اگبالانی لگتمالی ، سیاسی توار نگٹ کنگ ءُ مڈیانی لٹ ءُ پل ھم روچیگیں کار اَنت۔آیاں چہ جھانی تْرامگیجاں دزبندی کرت کہ آ اے زوراکیانی سر ءَ بے توار مہ بہ اَنت پرچا کہ بے تواری ھم زوراکی ءِ ھمراھی اِنت۔
کانفرنس ءِ گڈی ءَ پجیگیں مسامے پیش کنگ بوت ، آئی ءِ تہ ءَ سند ءِ شھکور ءِ سر ءَ شش نوکیں جوانی کشگ ، کشمیر ءَ پاکستانی لشکر ءِ بازمنند بیتگیں مردماں پولیس ءَ زیرگ ءُ گچینی پولیس بنزھے ٹاھینگ ءُ ماں بلوچستان ءَ سی پیک ، ریکوڈک ءُ سینڈک رنگیں کارشون رد کنگ بیتگ اَنت۔ مسام ءَ گْوشگ بیتگ کہ اے مردمانی سیتانی چپ اَنت ، پمیشکا ، ما درس ایشاں نہ من ایں۔مسام ءَ گْوشگ بیتگ کہ اے تیوک ءَ انچائیں دستاویزے نہ اِنت بلکیں تچکے ءَ گھگیری ءِ جار اِنت ، ءُ ما ھمیشی ءِ پد ءَ اے درسیں کارشونانی بگیری ءَ ھرچ پتر ءَ توار چست کن ایں۔
کانفرنس ءَ گلگت بلتستان ءُ کشمیر ءَ ھم مھترھندی لٹ ءُ پلانی سر ءَ گپ جنگ ءُ گْوشگ بیتگ کہ گوں چیردستیں راجاں ھرچ دمگ ءَ یک وڑیں کردگار بیگ ءَ اِنت۔
چد ءُ دیم گْوشگ بیتگ ، میان راجی مھترھند ءُ شرکت اے لٹ ءُ پل کنوکیں کارشونانی تہ ءَ بھر مہ زیر اَنت ، ءُ وت ءَ چہ میارباری ءَ بہ پھریز اَنت۔اگاں آ نا دلگوش بہ کن اَنت گڑا آیانی دیم ءَ اے راج گھگیری کن اَنت۔ کانفرنس ءَ ھواریں درسیں راھشوناں مسام کرت کہ آ دیمتر ءَ وتی جھد ءَ چد ءُ گیش مگیم ، ھمگرنچ ءُ ھم آھنگ کن اَنت داں چیردستیں راجانی اگبال ، آجوئی ءُ وتواکی پدجنگ بہ بہ اَنت۔
