سائیں جی ایم سید راجدوستی ءِ سکا ٹوھیں چیدگے ۔ سالروچ ءَ حسن دوست ءِ تْران

بلوچ راجی زْرمبشت ( بی این ایم ) ءِ کستریں کمک سرکارگشاد حسن دوست ءَ ماں برتانیا ءَ جیے سند آجوئی زْرمبشت ( جے اس ایف ایم ) ءِ چیردستی ءَ سائیں جی ایم سید ءِ سالروچ ءِ مراگش ءَ تْران کنان ءَ گْوشتگ سائیں جی ایم سید ناں ایوک ءَ سند بلکیں سرجمیں دمگ ءَ سیاست ، سسا ءُ راجدوستی ءِ ٹوھیں چیدگے۔آئی ءِ سالروچ مارا مئے گْوستانکی میرات ءِ سر ءَ یک برے پد ءَ چمشانک دیگ ءِ موہ دنت۔

آئی ءَ گْوشتگ سائیں جی ایم سید ءِ زند ءِ بندات چہ ویلے ءَ بوت ، آ ماں کسانی ءَ چورو بوت۔آئی ءِ پت ءِ کوش ءُ برتانیائی زورگرانی ’ بھر کنگ ءُ واکداری بہ کن ‘ ءِ شوندات ءَ آیانی کھول سکا سانمند کرت۔ ابید چہ ایشی ءَ کہ آ انگریزاں وتی چیر دستی ءَ رودینت ، سائیں جی ایم سید ءَ آزاتیں سنچ ءُ آشوبی سسایے ردوم دات ، بازیں زبان در برت ءُ سیاسی سنچ ودی کرت۔

حسن دوست ءَ گْوشتگ ایوک ءَ 15 سال ءِ سند ءَ سائیں جی ایم سید ءَ خلافت زْرمبشت ءِ تہ ءَ بھر زرت ءُ سیاست ءِ پڑ ءَ اتک۔کانگریس ءُ مسلم لیگ ءَ ھوار بیگ ءَ پد آئی ءَ زیت اے سما بوت کہ پہ سند ءِ راجی پجار ءَ گستائیں جھد المی اِنت ، پمیشکا آئی ءَ سندھو دیش زْرمبشت ءِ بنیاد ایر کرت ، داں سند ءِ مڈی ءُ باندات بومیانی دست ءَ بہ بیت۔

گْوشتانک ءِ گڈ سر ءَ حسن دوست ءَ گْوشتگ مروچیگیں نازرکیں باریگ ءَ مارا سائیں جی ایم سید ءِ لیکھانی راھشونی پکار اِنت۔سند ءُ بلوچستان ءِ گْوستانکی ، ربیدگی ءُ سیاسی سیادیانی لوٹ ھمیش اِنت کہ ما پجیگ ءَ جھد بہ کن ایں۔سائیں جی ایم سید ءِ زند مارا ھمے درونت ءَ دنت کہ سنچ ، وانگ ءُ دلجمیں مسام چیردستی ءِ بگیری ءَ چہ درساں مستریں سلحہ اَنت۔