برلن – ماں جرمنی ءَ بلوچ راجی زْرمبشت (بی این ایم) ءِ کمک کماش سپیا منزور ءَ بلوچستان ءَ مزدانک ءُ مردمی اگبالانی زْرمبشت ءِ تہ ءَ بلوچ جنینانی کرد ءِ سر ءَ ایمنی ءَ بیتگیں جنینانی نیادے ءَ تْران کرتگ۔
برلن ءَ بوتگیں نیاد ءِ تہ ءَ ”جنگ ءُ ایمنی : سیمی جھانی جنگ ءِ تہ ءَ وت واجھی ءُ پہ وت گل سازی “ ءِ بنگپ ءَ جیڑہ آماچیں دمگانی تہ ءَ پہ ایمنی ءِ کوشستاں جنینانی کرد ءِ سر ءَ دلگوش گور کنگ بیتگ۔
سپیا منزور ءَ وتی تْران ءِ تہ ءَ پاکستان ءِ چیر دستی ءَ بلوچ راجی جھد ءِ بارہ ءَ دلجمی ءَ گپ جتگ ءُ گچینی زوراکیانی دیم ءَ اوشتگ ءُ وت واجھی ءِ پلہ مرزی ءَ جنیانی کرد ءِ بارہ ءَ چمشانک داتگ۔
آئی ءَ گْوشتگ کہ بلوچستان ءَ زور بیگواھی ءُ لشکری بیڑانی پد ءَ بلوچ جنین آدم جھد ءِ سروکی کنگ ءَ اَنت۔ چہ واکدارانی بیھاراں پد ھم بلوچ جنین پہ وتی بیگواھیں مردماں مزدانک لوٹگ ءَ اَنت ءُ اے رد ءَ راھشون اَنت۔ .
آئی ءَ بلوچ زْرمبشت ءِ نامداریں مردم کریمہ ءِ درور داتگ ءُ گْوشتگ شھید بانک کریمہ بلوچ نودربر گل (بی ایس او) ءِ سرکماش جوڑ بیتگیں سری جنین اَت، آئی ءِ سروکی ءَ بازیں مردماں پہ وتی اگبالاں توار چست کنگ ءِ سکین ءُ دلبڈی رس اتگ۔
آئی ءَ بلوچ جنینانی اگبال ءُ پہ زور بیگواھیں مردماں کار کنوکیں دو مستریں جنینیں راھشون ماہ رنگ ءُ سمی دین ءِ کارانی سر ءَ ھم وتی لیکھانی درانگاری کرتگ۔
آئی ءَ بلوچ جنین ءِ دیم ءَ اڑاندانی سر ءَ گپ جتگ کہ ایشانی تہ ءَ چہ مھترھند ءِ کمک ءَ بیوکیں زوراکی ءُ موسمی مٹی ھوار اَنت کہ آیانی جھداں گیش کن اَنت۔
آئی ءَ چہ میان راج ءَ لوٹ کرتگ کہ آ بلوچستان ءِ ھمکوپگی ءَ بہ اوشت اَنت ءُ مردمی اگبالانی لگتمالی ءِ بارہ ءَ سرپدی تالان بہ کن اَنت۔
بلوچ راجی زرمبشت ( بی این ایم ) راجی آجوئی ءُ مردمی اگبالانی جھد ءَ بلوچ جنینانی ھوار بیگ ءِ پلہ مرزی کنت پرچا کہ زوراکی ءِ بگیر ءَ گھگیری ءِ تہ ءَ جنینانی کردے اژدری اِنت۔