آجوئی ءُ مزدانک ءِ جھد ءَ بلوچ جنین چہ درساں دیم ءَ اَنت۔ سپیہ

بلوچ راجی زْرمبشت ( بی این ایم ) جرمنی ءِ کمک سرکماش سپیہ ءَ گْوشتگ آجوئی ، مردمی اگبالانی پانکجنی ءُ مزدانک ءِ جھد ءَ بلوچ جنین چہ درساں دیم ءَ اَنت۔آیانی ھمت ءُ پہ وتی مول ءَ برجاھیں واھگ ءُ لوٹ بلوچ چاگرد ءُ سیاسی ندارگانی ساچ ءَ بنکی کردے پیلو کنگ ءَ اِنت۔

اے گپ آئی ءَ جرمنی ءِ شھر ڈوئسبرگ ءَ کرد جنینانی گلے ءِ مراگاھے ءَ تْران کنان ءَ گْوشتگ اَنت ، آ آ اود ءَ بلوچ راجی زْرمبشت ( بی این ایم ) ءُ بلوچ راج ءِ جھگیر ءِ بستار ءَ لوٹک بیتگ اَت۔

سپیہ ءَ بلوچستان ءِ زْرمبشت ءِ تہ ءَ نامداریں بلوچ جنینانی کرد ءُ کار ساڑاتگ اَنت کہ آیانی تہ ءَ شھید بانک کریمہ ، ڈاکٹر ماہ رنگ ءُ سمی دین ھوار اَنت۔

آئی ءَ گْوشتگ اے نامداریں جنین آدماں ماں مزدانک ءُ آجوئی ءِ وتی جنگ ءَ باز دیمونی داتگ۔ایشانی بھادری ءُ گوں وتی لوٹاں بندوکی ءَ ناں ایوک ءَ بلوچ راج ءَ بلکیں پہ مردمی اگبال کار کنوکیں دگہ مردماں ھم ھاٹیگ ءُ اوست ودی کن اَنت۔

آئی ءَ چہ گوش داروکاں بلوچ راجی آجوئی ءِ زْرمبشت ءِ پلہ مرزی ءِ دزبندی کرتگ ءُ گْوشتگ بلوچ راج ءِ مڈی ءُ زمین پاکستان ءَ زور گپتگ اَنت ءُ آ چہ وتواجھی ءَ زبھر اِنت۔پمیشکا بلوچ راج پہ آجوئی ءَ جھد کنگ ءَ اِنت، ھمے جھد ءِ پد ءَ بلوچ راج زوربیگواھیں رنگیں زوراکیانی دیمپان اِنت۔بلوچ راج ءِ چکچینی بیگ ءَ اِنت ، ایشی ءِ بگیری ءَ میان استمانی کمک ءُ پلہ مرزی لوٹ ایت۔