ماں نیدرلینڈز ءِ شھر زیپتن ءَ بیتگیں سرکاری مراگشے ءَ بلوچ راجی زْرمبشت ( بی این ایم ) ءِ جھگیر باسط ظہیر ءَ چہ یورپی سنت ءَ لوٹ اتگ کہ پاکستان ءِ جی ایس پی پلس بستار زیت ماٹو کنگ بہ بیت۔
زیپتن شھرداری ءِ چیردستی ءَ بیتگیں اے مراگش ءَ باسط ظہیر ءَ ماں بلوچستان ءَ مردمی اگبالانی بگیری ، گچینی زور بیگواھی ، ناراھیں دزگیری ءُ در آمیدگسی کوشانی سر ءَ گپ جتگ۔ آئی ءَ گْوشتگ پاکستانی تْرامگیج مھترھندی واک ءَ ناراھی کاربندگ ءُ ھزاراں بلوچ سیاسی کارکن ، نودربر ، جنین ءُ چکاں زور بیگواہ ، آزار دئی ءُ درمردمی کارپدانی نشانگ کنگ ءَ اَنت۔
چد ءُ دیم آئی ءَ گْوشتگ پاکستان ءَ چہ یورپی سنت ءَ رس اتگیں جی ایس پی پلس باپاری لب گوں مردمی اگبالانی منگہ ءُ دیمروئی ءِ ڈکاں بندوک اَنت ، بلے پاکستان یکشل ءَ اے ڈکاں سرگْوز کنگ ءَ اِنت۔ پمیشکا اے باپاری لبانی چوشیں ڈیھے ءَ دیگ کہ میان راجی مردمی اگبالانی مساماں مان نہ یار ایت ، راھبندانی پد ءَ رد اِنت۔
باسط ظہیر ءَ کڈن کرتگ کہ یورپی سنت زیت پاکستان ءِ جی ایس پی پلس بستار ءَ ماٹو بہ کنت پرچا کہ پاکستان مردمی اگبال ، مزدورانی اگبال ، اگوازینک ( ماحولیات ) ءُ شریں واکدای ءِ بنیادی راھبندانی پروشگ ءَ گون اِنت ءُ درسیں میان راجی مساماں بئے کنگ ءَ نہ اِنت۔
چہ مراگش ءَ پد ، بی این ایم ءِ جھگیر ءَ بھر زیروک ءُ تْرامکاراں بلوچستان ءِ جاورانی بارہ ءَ نبشتگیں نکان ھم داتگ۔
