جرمنی (آلمان) ءَ باھوٹ بیتگیں آتپ الی ءَ چہ جرمنی ءَ درکنگ ءِ ترس ءِ دیمپانی اِنت۔بلوچ راجی زْرمبشت ( بی این ایم) ءَ ھمے رد ءَ جرمن واکداراں نمدی یے نبشتگ ءُ وتی بے تاھیری ءُ ترس درشان کرتگ۔
ماں نمدی ءَ ، بی این ایم ءِ دری کارانی کارگشاد، ھمل ھیدر ءَ واکدارانی دیم ءَ ھما جیڑہ پدر کرتگ اَنت کہ آتپ الی پاکستان ءَ آیانی دیمپان بیت کنت۔
بی این ایم ءِ سرکماش ڈاکٹرنسیم ءَ ھم اے جیڑہ سھرا کرتگ۔آئی ءَ چاگردی رسانکدر ایکس (پیسرگیں ٹویٹر) ءَ پوسٹے نبشتگ ءُ مھترھندی (ریاستی) ناشرکاریانی نشانگ بیوکیں بلوچانی جاور ءِ سر ءَ گپ جنان ءَ گْوشتگ بلوچ راج مھترھندی ناشرکاریانی آماچ اِنت پمیشکا آ اے زوراکیانی بگیری ءَ ماں درانڈیھ ءَ باھوٹ بیگ لوٹ اَنت۔
ڈاکٹر نسیم ءَ راجانی سنت ءِ باھوٹیانی تْرامگیج (ادارہ) ءُ مردمی اگبالانی پتر ءَ دزبندی کرتگ کہ آ اے تکانسر کنوکیں جیڑہ ءِ گیشینگ ءَ زیت دزمانجنی بہ کن اَنت ءُ پکاریں گامگیج بہ زیر اَنت۔
بی این ایم ءِ دری کارانی کارگشاد ھمل ءَ ھیدر ءَ دزبندی نمدی ءِ تہ ءَ جرمنی ءِ ’ پہ باھوٹی ءُ باھوٹاں بنجاھی کارگس‘ءَ بلوچ سیاسی کارکن آتپ الی ءِ چہ ڈیھ ءِ درکنگ ءِ دیم ءِ دارگ ءِ لوٹ کرتگ ءُ گْوشتگ کہ پہ اے کار ءَ اشتاپ کنگ بہ بیت۔آتپ الی پہ بلوچ راجی اگبالاں گپ جنوکیں مردمے، پہ انچیں راجے ءَ کہ آ چہ پاکستان ءِ نیمگ ءَ مزنیں کچے ءَ مردمی اگبالانی بگیری ءُ زوراکیانی دیمپان اِنت۔
ترس اِنت کہ اگاں آ پاکستان ءَ دیم دیگ بہ بیت گڑا آئی ءَ پاکستانی واکدار چہ بالی پٹ ءَ آوار جن اَنت۔ ھمل حیدر مزدانک، مردمی اگبال ءُ میان استمانی سنگیگانی (معیار) برجاہ دارگ ءِ ارزشت ءِ سر ءَ زور دنت ءُ چہ کارگس ءَ دزبندی کنت کہ آتپ ءِ چہ ڈیھ ءَ در کنگ ءِ شور ءَ چار ءُ بہ چار بہ کنت ءُ آتپ الی ءِ زند ءَ بہ پھریز ایت۔
دزبندی ءَ آتپ الی ءِ سرجمیں جیڑہ ءِ سر ءَ چمشانک دیگ ءِ لوٹ کنگ ءُ ھما جیڑھانی نیمگ ءَ دلگوش پرینگ بیتگ کہ پاکستان ءَ دیم دیگ ءَ پد آتپ آیانی آماچ بیت۔
ھمل ھیدر ءَ اے اوست درشانتگ کہ جرمنی ءِ ’ باھوٹی ءُ باھوٹانی بنجاھی کارگس‘ اے دزبندی ءِ سر ءَ گوں سنگینے ءَ دلگوش کنت ءُ مزدانک، ایمنی ءُ مردمی اگبالانی ھما دودانی درشان ءَ گامگیج زیر ایت کہ پہ آیانی برجاہ دارگ ءَ میان استمان کوشست کنت۔