بلوچ راجی زْرمبشت ( بی این ایم ) ءِ دری کارانی تک ءِ کمک راھوتکار نیاز زھری ءَ ماں برتانیائی پارلیمان ءَ برجم دارگ بیتگیں مراگش ءَ تْران کنان ءَ گْوشتگ بلوچ راج سرپد بیتگ کہ آ پاکستانی مھترھند ءِ تہ ءَ وتی اگبالاں گیپت نہ کنت پمیشکا آئی ءَ چہ بنداتری روچ ءَ زورگری ءِ بگیری کرتگ۔
بی این ایم ءِ جھگیر ءَ منزور پشتین ءِ دزگیری ایرجتگ ءُ آئی ءِ یلہ کنگ ءِ ھم لوٹ کرتگ ، آئی ءَ گْوشتگ من منزور پشتین ءِ ناراھیں گر ءُ بند ءَ سھرا کنگ لوٹ آں، آ زیردستیں راجانی راستیں توار اِنت۔ من چہ اے مچی ءَ دزبندی کن آں کہ آ پہ منزور ءِ در کنگ ءَ توار چست بہ کنت ءُ پہ زیردستاں توار چست کنوکیں گیدریں مردمانی ناراھیں گر ءُ بند ءِ آسر کنگ ءِ لوٹ بہ کنت۔
آئی ءَ گْوشتگ مئے گل درسیں زیردستیں راجانی وتواجھی اگبال ءُ بنکی اگبالانی جھد ءِ سرجمی ءَ پلہ مرزی کنت۔ ما گوں کشمیری ، پشتون ءُ سندی راجاں وتی ھم دلی ءَ درشان کن ایں کہ پاکستانی مھترھند ءِ ناروایانی بگیری ءَ جھد ءَ اَنت۔
اے مراگش چہ یونائیٹڈ کشمیر پیپلز نیشنل پارٹی ءِ نیمگ ءَ برجاہ دارگ بیتگ۔ مراگش ءِ پاگواجہ برتانیائی پارلیمان ءِ باسک رچرڈ برگن اَت۔ چہ ایشی ءَ ابید برتانیا ءِ پارلیمان ءِ نامی ئیں باسک گْوستگیں سرکار بگیریں راھشون جیریمی کوربن ، پیبین ھیلمٹن، کیتھرین ویسٹ ، ھلیری بین ءُ تاھر الی ءَ ھم نام گیپتگیں کانپرنس ءَ بھر زرتگ۔ سردار شوکت الی ءِ سروگانی ءَ یونائیٹڈ کشمیر پیپلز پارٹی ءِ راھشونانی بولکے ھم کانپرنس ءَ ساڑی بیتگ۔ سندی راجدوست ڈاکٹر لکو لوھانہ ءُ دگہ زیردستیں راجانی جھگیراں ھم کانپرنس ءَ زیردستیں راجانی سر ءَ بیوکیں زوراکیانی سر ءَ گپ جتگ۔
نیاز زھری ءَ گوں مراگش ءَ تْران کنان ءَ گْوشتگ یونائیٹڈ کشمیر پیپلز نیشنل پارٹی ءِ پجیگ ءَ پہ مئے راجانی جیڑھانی گیشوار ءَ من اد ءَ بلوچ راجی زْرمبشت ( بی این ایم) ءِ جھگیری کنگ ءَ آں۔ مروچیگیں مراگش ءِ بنگپ ’’ جمو ءُ کشمیر ءِ زوریں بھر ءُ بانگ ءُ ناروائی : گْوستانکی جیڑہ ءِ گیشینگ ءَ شوندات ‘‘ ھما جیڑھاںی لوٹ ءُ سنگینی ءَ پدر کنت ، کہ ما آیانی سر ءَ گپ جن ایں۔
آئی ءَ بلوچستان ءَ پاکستان ءِ یکشلیں زوراکیانی بارہ ءَ گپ جنان ءَ گْوشتگ گْوست ءَ بلوچ راج ءِ سر ءَ چار رند ءَ لشکرکشی کنگ بیتگ ءُ انی پنچمی لشکرکشی برجاہ اِنت۔ بلے ، اے گپ ءِ درشان ءَ من ءَ پھر سما بیت کہ کسانسالیں پاتما ءَ بہ گر داں کماشیں میار ءَ ، ھرچ بلوچ پہ مزداننک ءُ وتواجھی اگبال ءَ گوں داشت ءُ اوپار ءَ اوشتاتگ اَنت۔ مئے گھار ءُ مات ، گوں ناپروشیں بھادری ءَ وتی براتانی ھم کوپگی ءَ جھد ءِ سروکی کنگ ءَ اَنت، چہ ایشی ءَ اے گپ پدر بیت کہ آجوئی ءِ جنگ ءَ جنین ءُ مردین ءِ میان ءَ پیر نیست۔
’’ اے گواچنیں گپے کہ زیردستیں راج گیدریں بچ ءُ جنک پیداک کن اَنت۔ مروچی ڈاکٹر ماہ رنگ ءُ سمی دین ناں ایوک ءَ بلوچستان بلکیں پاکستانی بندوبست ءَ ھم گھگیری ءِ چھرگ جوڑ بیتگ اَنت، ھمک زیردستیں ٹکانی تہ ءَ نام کٹگ ءَ اَنت۔‘‘
بی این ایم ءِ دری کارانی تک ءِ کمک راھوتکار ءَ چد ءُ دیم گْوشتگ ، انچوش کہ ما اد ءَ یکجا بیتگ ایں، بلوچ زور بیگواھانی لوگ ءِ مردم ماں اسلام آباد ءِ سکیں سارتی ءِ تہ ءَ ، مھترھندی ءَ زوراکیاں سگگ ءُ پہ وتی کھول ءِ مردمانی گوں دْراھی ءَ درا کنگ ءِ لوٹ کنگ ءَ اَنت۔ زور بیگواھیانی جیڑہ سنگینی مردمی بے تاھیری یے، ءُ اے بژنی گپے کہ مھترھند ایشی ءِ سر ءَ دلگوش گْور کنگ ءِ جاہ ءَ روانک ءِ جنینیں سروکاں بدنام کنگ لوٹ ایت۔ چہ ایشی ءَ ابید ، آیاں وتی مردم کشیں رمبانی سروگان بلوچ زھرشانی کنوکانی دیم ءَ نندارینتگ اَنت، آیاں ترسینگ ءِ کوشست کنگ ءَ اَنت۔ میان استمان ءَ اے ایرجنگ کرزیں کارپد ءِ سر ءَ گپ جنگی اِنت۔
آئی ءَ مراگش ءَ ساڑی ئیں برتانیا ءِ پارلیمان ءِ باسکانی دلگوش ءَ گْوشتگ میں مروچی اد ءَ ساڑی ئیں برتانیا ءِ پارلیمان ءِ باسکاں دزبندی کن آں کہ آ اے سنگینیں جیڑہ ءَ اے پرمنگھیں تْرامگیج ءِ پتر ءَ بہ بر اَنت ءُ پاکستان ءِ بگیری ءَ کارروائی کنگ ءِ لوٹ ءَ بہ کن اَنت۔ مزدانک زور بیگواھیں مردمانی کھولانی اگبال اِنت ، آ گوں ترس ءُ زوراکی ءَ بے توار کنگ مہ بہ اَنت۔
آئی ءَپہ زیردست ءُ زوراکیانی آماچیں راجانی پلہ مرزی ءَ ھم پتی ءِ لوٹ ءِ سر ءَ زور داتگ ءُ دزبندی کرتگ کہ مارا لوٹ ایت ما گوں مزدانک ، مردمی اگبال ءُ بنکی آجوئیاں ھم سنت بہ بہ ایں، پرچا کہ اے ھرکسی اگبال اَنت۔ پجیگ ءَ ، ما زوراکیانی آماچ بیتگیں مردمانی توار ءَ گیش کرت کن این ءُ پہ انچیں جھانے ءَ کار کرت کن ایں کہ آ اود ءَ کس پہ ناروائی ءِ درد ءِ سگگ ءَ لاچار مہ بیت۔
