گوادر : بلوچ راجی زْرمبشت ( بی این ایم ) ءِ کیچ – گوادر ھنکین ءِ سیشن ءَ چہ ھنکین کونسلرانی گچین ءَ نوکیں اگدہ داری پتر ٹاہ اتگ۔ گچینکاریانی آسر ءَ بابا جی آر کیچ گوادر ھنکین ءِ کماش ، بھار کمک کماش ، جیھند کارگشاد ، زینل کمک کارگشاد ، سید ھسابدار گچین بیتگ۔
بی این ایم ءِ مستریں کمک سرکماش ڈاکٹرجلال ، رسانکی کارگشاد کازی داد مھمد ریھان ءُ کلانھیں باسک ماما انور ءِ سر ءَ جوڑ بیتگیں گچینکاری پتر ءَ گچینکاریانی چار ءُ گزار کرتگ۔ پتر ءِ سروک ماما انور ءَ ابید دیم پہ دیمی ءَ گچین بیتگیں اگدہ دارانی جار جتگ۔جیھند ءَ گْوستگییں کمک چارگزار ءِ بستار ءَ ھنکین ءِ کارکردگی پیش کرتگ ، کہ ساڑایگ بیتگ۔
مراگش ءَ دامگ ءِ پارست ءَ ھواریں سرکماش ڈاکٹر نسیم ءَ نوک گچین بیتگیں اگدہ داراں سوگند وارینتگ ءُ اوست درشانتگ کہ نوکیں اگدہ دار وتی کارگردی ءَ چد ءُ گھتر کن اَنت۔ آئی ءَ زور داتگ کہ مارا وتی گیشتریں دلگوش سیلانی جوڑ کنگ ءُ آیانی دیمروئی ءَ دیگ لوٹ ایت۔
’’ بی این ایم ءِ باسک پہ زْرمبشت ءِ سوب ءَ چہ ھچ رنگیں دیمونی ءَ چک ءُ پد نہ بہ اَنت۔ بابا جی آر ‘‘
نوک گچین بیتگیں سرکماش بابا جی آر ءَ وتی درشان ءَ گْوشتگ بی این ایم مردمانی گل اِنت کہ بلوچستان ءِ ھرچ ھند ءُ دمگاں ھست ءُ جھان ءِ دگہ کنڈاں بلوچ زْرمبشت ءِ توار اِنت۔ بی این ایم ءِ مروچیگیں باسک بانداتگیں راھشون اَنت۔ اے بلوچ زْرمبشت ءِ جھدکار اَنت کہ پہ زْرمبشت ءِ سوبمندی ءَ ھچ وڑیں دیمونی دیگ ءَ چک ءُ پد نہ بہ اَنت۔
آئی ءَ گْوشتگ من ءَ پھر اِنت کہ من بی این ایم ءِ کسانیں باسکے آں۔ باند ءَ بلوچستان آجو بیت، ما زندگ بہ ایں یا نہ بہ ایں بلے مئے نام ھما مردمانی تہ ءَ ھوار بیت کہ آیاں پہ بلوچستان ءِ وشھالیں باندات ءَ دیمونی داتگ۔ من ءَ اے ھبر ءِ سر ءَ پھر اِنت کہ ما شھید واجہ گلام مھمد ءِ رندگیر ایں کہ آئی ءَ پہ بلوچستان ءِ آجوئی ءَ وتی سر نْدر کرتگ۔
آئی ءَ گوں باسکاں گْوشتگ پہ بانداتگیں وشھالیں بلوچستان ءَ مروچی ھچ دست ءَ مہ دار اِت اگاں سروک مان اَنت یا ناں باسکاں وتی زْرمبشت دیم ءَ برگی اِنت، مارا گوں یک دومی ءِ ھمکوپگی ءَ دیم ءَ جزگی اِنت۔ پیش ءَ ھم مئے زمہ واریانی آسان کنگ ءَ ھمبلاں مئے ھمراھداری کرتگ من ءَ اوست اِنت کہ دیمتر ءَ ھم مئے ھمراہ بہ اَنت۔ ھمبل مئے راھشونی بہ کن اَنت ، مئے ردیاں پیش بہ دار اَنت۔
کیچ۔ گوادر ھنکین ءِ سری نوک گچین بیتگیں سرکماش ءِ بستار ءَ سوگند ورگ ءَ پد ، وتی بنداتی تْران ءَ آئی ءَ دیمتر ءَ گْوشتگ مروچیگیں زمانگ ءَ بلوچستان ءِ ھمک کنڈ ءَ مارا گوں رازداری ءَ کار کنگی اِنت۔سیلانی تہ ءَ کار کنگ ءَ مارا سکا دلگوش کنگ لوٹ ایت اگاں مارا تشے ھم شک بوت کہ چہ مئے کارے ءَ مئے ھمبلے ءَ تاوان رس ایت گڑا مارا ھما کار بھ کنگ نہ لوٹ ایت داں ھمبل وتی سیلانی تہ ءَ ءُ سرڈگار ءَ گیشتر دیر ءَ نشت ءُ کار کرت بہ کن اَنت ءُ آیاں تاوان مہ بیت۔
اے رد ءَ بی این ایم کیچ ۔ گوادر ھنکین ءِ باسک ءِ بستار ءَ بی این ایم ءِ گْوستگیں بنجاھی پتر ءِ باسک یوسپ ، مستریں کمک سرکماش ڈاکٹر جلال ، رسانکی کارگشاد کازی داد مھمد ریھان، ماما انور ، ھنکین ءِ نوک گچین بیتگیں کمک سرکماش بھار ءَ تْران کرتگ ءُ نوک گچین بیتگیں اگدہ دار مبارکباد دات اَنت۔
ڈاکٹر جلال ءَ گْوشتگ ما چوناھیا بنجاھی اگدہ دار ایں بلے اد ءَ ما وتی ھنکین ءُ بنزہ ءِ چیردست این ءُ آیانی سروکی ءَ وتی زمہ واریاں پیلو کن ایں۔ گْوستگیں چارگزاری پتر ءِ اگدہ دارانی بستار ءَ گچین بیگ اے گپ ءِ مانزمان اِنت کہ چارگزار ءِ بستار ءَ اے کاربولک ( ٹیم ) ءَ شر کار کرتگ ، پمیشکا پد ءَ ایشانی سر ءَ باور درشانگ بیتگ۔
