بلوچ راجی زْرمبشت ( بی این ایم ) برتانیا تک ءِ باسکی پتر ماں لندن ءَ آشوبی لچہ کار نمیرانیں مبارک کازی ءِ یات ءَ ، بی این ایم برتانیا ءِ سرکماش ماسٹر منزور ءِ پاگواجھی ءَ برجم دارگ بیتگ۔بنجاھی پتر ءِ باسک نیاز ، گچینی مھمان اَت۔
نیاد بلوچ راجی شھیدانی یات ءَ دو دمان ءِ بے تواری ءَ بندات بیتگ۔ چہ ایشی ءَ پد نوکیں باسکانی پجار کنگ بیتگ۔ پجاروکے ءَ پد یوکے تک ءِ جتائیں بنزھانی سروکاں وتی بنزھانی گزارشءُ کار پیش کرتگ اَنت۔
بنزھانی گزارشانی پیش کنگ ءَ پد یوکے تک ءِ کلیتدار نسیم اباس ءَ مالی جاورانی بارہ ءَ نیاد سرپدی داتگ ۔ چہ ایشی ءَ پد شرگداری بیتگ کہ آئی ءِ تہ ءَ درسیں باریں شریں وڑے ءَ بھر زرتگ ءُ گل ءِ بنگپ ءَ ھوار یوکے تک ءِ پیشیگیں کارانی سر ءَ وتی جست ایر کرتگ اَنت۔
چہ ایشی ءَ پد بی این ایم ءِ کستریں کمک کارگشاد ھسن دوست ، بنجاھی پتر ءِ باسک نیاز ءُ پھیم ءَ باسکانی جستانی پسو داتگ اَنت۔
نیاد ءَ آیوکیں گامگیجانی سر ءَ سوڑگ ءَ پد شور کنگ بیتگ۔
دیوان ءِ گُڈی ءَ یوکے تک ءِ سرکماش ماسٹر منزور ءَ واجہ مبارک کازی ءِ زند ءِ سر ءَ چمشانک داشتگ ءُ گْوشتگ گْوستانک ءَ مدام ھما مردم زندگ داشتگ اَنت کہ آیاں گْرانیں باریگاں وتی کار ءُ لیکہ ءِ رد ءَ چاگرد ءِ لیکھی راھشونی کرتگ۔ مبارک کازی ھم انچیں گْرانبھائیں ھستی یے اَت کہ آئی ءَ ناگیگیں جاورانی تہ ءَ گوں وتی لچھاں پہ بلوچ راج ءُ زبان ءَ کار کرتگ۔