بی این ایم جرمنی تک ءِ ھینوور ءَ پنچمی مچ باسکی نیاد، نوکیں اگدہ دارانی گچین

بلوچ راجی زْرمبشت ( بی این ایم ) جرمنی تک ءِ پنچمی مچ باسکی نیاد 20 اپریل 2024 ءَ ماں ھینوور ءَ برجم دارگ بیتگ۔ اے نیاد ءَ بی این ایم ءِ سرکماش ڈاکٹر نسیم ءَ گچینی مھمان ءِ بستار ءَ بھر زرتگ۔نام گپتگیں مراگش ءَ بنجاھی پتر ءِ باسک ءُ بی این ایم ءِ مردمی اگبالانی تْرامگیج پانک ءِ راھوتکار ھاتم ، بنجاھی پتر ءِ باسک ھاجی نسیر ءُ ھمل ءَ ھم گچینی مھمانان بستار ءَ بھر زرتگ۔

مراگش ءَ بندات چہ راجی سوت ءَ بیتگ۔چہ ایشی ءَ پد بی این ایم جرمنی تک ءِ گْوستگیں کماش ازگر الی ءَ کماش ءِ بستار ءَ وتی گڈی تْران کرت ، چہ ایشی ءَ ھاجی نسیر ءُ ھاتم ءَ گوں باسکاں تْران کرتگ۔

بی این ایم جرمنی تک ءِ کارگشاد جبار ءَ مچ باسکی نیاد ءِ دیم ءَ کارگشادی گزارش پیش کرت۔ ھمیشی ءِ سر ءَ اگدہ دارانی کارکردگی ءِ سر ءَ جست ، پسو ءُ شرگداری بیتگ۔

مراگش ءِ دوممی بھر چہ ڈاکٹرنسیم ءِ تْران ءَ بندات بیتگ ، آئی ءَ بلوچ راجی جھد ءِ سر ءَ میان استمان ءُ دمگی سیاست ءِ سان ءِ سر ءَ گپ جتگ۔ڈاکٹر نسیم ءَ پاکستانی بالی لشکر ءِ ارش ءَ شھید بیتگیں سنگت دوستا مھمود ءُ آئی ءِ کھول ءِ پجیگ ءَ پہ آزاتیں بلوچستان ءَ دیمونی دیوکیں درسیں شھیداں ستک دْرشانتگ۔

ڈاکٹرنسیم ءِ تْران ءَ پد ، گچینکاری پتر ءِ باسک ھاجی نسیر ، ھاتم ءُ ھمل ءَ گْوستگیں اگدہ دارانی باریگ ءِ آسری ءِ جار جت ءُ پہ نوکیں اگدہ دارانی گچین ءَ گچینکاری ءِ کار بنا کرت اَنت۔

بی این ایم جرمنی تک ءِ نوک گچین بیتگیں اگدہ دارانی تہ ءَ شرھسن کماش ، سپیا منزور کمک کماش ، جبار کارگشاد ، شلی داد کمک کارگشاد ءُ امجد مراد کلیتدار گچین بیتگ اَنت۔

نوک گچین بیتگیں کماش شر ھسن ءَ وتی تْران ءَ گْوشت کہ آ بی این ایم جرمنی تک سیاسی من ءُ مولانی برجاہ دار ایت ءُ دیمروئی دنت۔

بی این ایم جرمنی تک ءِ گْوستگیں کماش ازگر الی ءَ درسیں باسکانی منت گپت ءُ نوکیں کابینہ مبارک باتی دات۔

مراگش ءِ گڈی ءَ سرکماش نسیم ءَ نوکیں اگدہ دار مبارک باتی دات اَنت ءُ ھمے اوست ءِ درانگازی کرت کہ نوکیں کابینہ بی این ایم ءِ ماں جرمنی ءِ بن ھشت ایر کنوکیں واجہ گپار ءِ پشت پدی مڈیانی دْرچ ءَ برجاہ دار ایت ءُ گیشتر کنت۔