بلوچ راجی زْرمبشت ( بی این ایم ) ءِ بنجاھی کستریں کمک سرکارگشاد ھسن دوست ءَ شھید راشد آوران ۔ مشکے ھنکین ءِ نیادے ءَ تْران کنان ءَ گْوشتگ وھدے مردم یازدہ اگست ءِ چہ زورگریں برتانیا ءَ آجوئی ءِ بارو ءَ جیڑ ایت گڑا اے سرپدی رس ایت کہ آجوئی چہ دیمونی ءَ پد رس اتگ۔ چہ ھمے دیمونیاں مارا پاکستان ءِ بگیری ءَ جھد کنگ ءِ سکین ءَ دنت۔ گوں برتانیا ءَ کینگ ھمیش اِنت کہ آئی ءَ چہ بلوچ سرڈگار ءَ گوزگ ءُ اوگانستان ءِ سر ءَ ارش کنگ لوٹ اتگ گڑا بلوچ ءَ پہ وتی ھمساھگیں ڈیھ ءِ پھریزگ ءَ آئی ءِ دیم پہ دیمی کرتگ ءُ نہ اشتگ۔ گڑ ا برتانیا زورگر گوں بلوچستان ءَ ھوار آدگہ ڈیھانی سر ءَ ارش کرتگ ءُ دستیگ اِش کرتگ اَنت۔
اے گپ آئی ءَ بی این ایم ءِ یازدہ اگست ءِ روچ ءَ بیتگیں نیادے ءَ جتگ اَنت۔ اے نیاد ءَ ھنکین ءِ باسکاں بازیں کچے ءَ بھر زرتگ۔ ابید چہ بی این ایم ءِ بنجاھی کستریں کمک سرکارگشاد ھسن دوست ءَ بنجاھی پتر ءِ باسک چیپ اسلم، ھنکین ءِ سرکماش مھران ءُ کمک سرکماش تلار ناز ءَ تران کرتگ۔ نیاد ءِ جارچینی ءِ زمہ واری ھنکین ءِ کمک کارگشاد سگار ءَ گون بوتگ۔
آیاں گْوشتگ کہ چہ برتانیا ءِ نیمگ ءَ زوگری ءِ آسر ءُ یازدہ اگست ءَ بلوچستان ءِ آجوئی ءِ جار ءَ پد برتانیا ءَ ھمےدمگ ءَ پہ وتی سیتانی پھریزگ ءَ پانگے پکار اَت پمیشکا آئی ءَ ھندوستان پروشت ءُ بھر ءُ بانگ کرت۔ چہ ھندوستان ءِ پرشگ ءَ پد پاکستان جوڑ بوت ءُ آئی ءَ پہ زور بلوچستان ءَ دستیگ کرت۔ چہ 27 مارچ 1948 ءَ پاکستان ءِ زوگری ءَ بہ گر داں انوں پاکستان ءِ بگیری ءَ بلوچ ءِ گھگیری برجاہ اِنت۔
آیاں تران کرتگءُ گوشتگ کہ چہ پاکستان ءِ زورگپتی ءَ پد بلوچ سیاسی باسک ءُ راھشوناں پہ بلوچستان ءِ موکک ءَ وتی جان نْدر کرتگ اَنت، آیانی لوٹ ھمیش اِنت کہ بلوچستان پد ءَ آجوئیں مھترھندے بہ بیت۔ ما ھمے روچ ءِ درگت ءَ ھمے کول ءَ کن ایں کہ پہ ماتیں سرڈگار ء رکینگ ءَ ھرپیمں دیمونی دیگ ءَ چک ءُ پد نہ بہ ایں۔
آیاں گْوشتگ کہ اے جھد ءِ دیم ءَ برگ مئے درسیں سنگتانی زمہ واری اِنت۔ پہ بلوچستان ءِ آجوئی ءِ جھد ءَ مئے گل ءَ وتی درسیں راھبند گیشینتگ اَنت مارا ھمے راھبند ءِ پاسداری کنگ ءُ دیم ءَ جزگی اِنت۔ بلے دگہ گپے ایش اِنت کہ مھترھند پہ مئے راجی آجوئی جز ءِ دارگ ءَ وڑ وڑیں پندل سازگ ءَ اِنت۔
آیاں گوشتگ کہ مئے بلوچ راجی شھیدانی لڑ سکا دراجکش اِنت کہ آیاں وتی ساہ ءُ سر پہ بلوچستان ءِ آجوئی ءُ پارٹی ءِ شونداتانی دیم ءَ برگ ءَ نْدر کرتگ اَنت۔ ما ءُ شما ھما شھیدانی لیکھی ھمبل این ءُ مارا وتی شھیدانی واب ءُ واھگ پیلو کنگی اَنت۔