پانک دسمبر 2024 ءِ گزارش – پی ڈی ایف
بلوچ راجی زْرمبشت ( بی این ایم ) ءِ مردمی اگبالانی تْرامگیج ’’ پانک‘‘ ءَ دسمبر 2024 ءِ میان ءَ بلوچستان ءَ برجاھیں مردمی اگبالانی بگیری ءِ سر ءَ گزارش شنگ کرتگ۔گزارش ءِ رد ءَ ، پاکستانی لشکر ءَ 22 کس زور بیگواہ ءُ پنچ در آمیدگسی کشتگ ۔
گزارش ءَ گْوشگ بیتگ کہ اے مردم چہ بلوچستان ءِ شش ھنکیناں زور بیگواہ کنگ بیتگ اَنت، چہ ایشاں کیچ ءَ چہ درساں گیش 10 کس ، چہ گوادر ءَ 6 ، چہ ڈیرہ بگٹی ءَ 2 ، چہ ھاران ءَ 1 ، ءُ چہ ھب ءَ یک کسے پاکستانی لشکر ءُ گوں آئی ءَ ھمگرنچیں تْرامگیجاں ناراھی دزگیری ءَ پد زور بیگواہ کرتگ اَنت۔
مدامی رنگ ءَ چہ پانک ءِ نیمگ ءَ اے گْوشگ بیتگ کہ زور بیگواھیں مردمانی کچ چہ ایشی ءَ گیشتر بیت کنت پرچا کہ سانمندیں مردمانی کھول چہ ترس ءَ ھچ نہ گْوش اَنت۔زور بیگواھیانی پد ءَ کھول روانی تک ءَ نادْراہ اَنت ، مزدانک ءُ مھترھندی جست ءُ پرس ءِ ھچ راہ نیست۔
گزارش ءِ رد ءَ پاکستانی لشکر ءَ پنچ کس در آمیدگسی کشتگ۔کیچ ءَ نوید ء ھمید ءُ زریپ ء امر در آمیدگیسی کوش ءِ نشانگ کنگ بیتگ اَنت ءُ ماں پنجگور ءَ پاکستانی لشکر ءِ ڈرون ارش ءَ ابدل ھمید ، ذاکر ءُ دلجان کشگ بیتگ اَنت۔
پانک ءَ یک برے پد ءَ پہ مردمی اگبالانی بگیری ءِ گر ءُ دار ءَ زیتیں میان استمانی دزمانجنی ءِ لوٹ کرتگ۔