بلوچ راجی زْرمبشت ( بی این ایم ) ءِ مردمی اگبالانی تْرامگیج ’ پانک ‘ ءَ فروری 2025 ءِ وتی ماھی گزارش شنگ کرتگ ، اے گزارش ءَ بلوچستان ءَ مردمی اگبالانی بگیری سھرا کنگ بیتگ اَنت۔
گزارش ءِ رد ءَ ، فروری ءِ ماہ ءَ پاکستانی لشکر ءَ بلوچستان ءَ 18 کس در آمیدگسی کشتگ ، 134 کس زور بیگواہ کرتگ۔آواران ، گوادر ءُ کیچ ءَ چہ درساں گیش زور بیگواھی ءُ کوش بیتگ۔ چہ ایشاں ابید ، پنجاہ مردم گر ءُ بند ءُ لٹ ءُ کٹ ءَ پد یلہ کنگ بیتگ بلے آیاں اے گْوشگ نہ بیتگ کہ آ پرچا دزگیر کنگ ءُ لٹ دیگ بیتگ اَنت ءُ ناں کہ آمیدگس ءَ پیش کنگ بیتگ اَت۔
پانک ءِ گزارش ءَ پدر کنگ بیتگ کہ فروری ءِ ماہ ءَ زور بیگواھی ، آزار دئی ءُ درآمیدگسی کوشانی تہ ءَ سکا باز گیشی اتکگ ءُ اے زوراکیانی تہ ءَ پاکستانی لشکر تچک ءَ گون اِنت۔
گزارش ءَ بلوچستان ءِ 14 ھنکیناں ابید پنجاب ءُ سند ءَ ھم زور بیگواھیانی ویل پیتبند کنگ بیتگ اَنت۔ چہ آواران ءَ 26 ، چہ گوادر ءَ 25 ءُ چہ کیچ ءَ 21 یک کس بیگواہ کنگ بیتگ۔سانمندیں مردمانی تہ ءَ نودربر، چاگردی کارکن ءُ مزدور گون اِنت، آیانی کھولاں ھچ سرپدی نیست کہ انی آ کجام جاورانی تہ ءَ اَنت پمیشکا کھول سکا بے تاھیر اَنت۔
زور بیگواھیانی بگیری ءَ سانمندیں کھولاں شال ۔ کراچی ءُ شال- تپتان مزن دگ ءِ سر ءَ زھرشانی کرتگ ، آیاں مزدانک ءُ زور بیگواھیں مردمانی سھرا کنگ ءِ لوٹ کرتگ۔
گزارش ءَ درآمیدگسی کوشانی دلپدریں ویل نبشتگ اَنت۔مومن ، کامران ءُ معراج نیاز آوار جنگ ءِ لھتے روچاں پد آزار دیگ ءُ کشگ بیتگ اَنت۔چہ کیچ ءَ ایم فل ءِ نودربر اللہ داد ءُ چہ گوادر ءَ مزدور عبدالواحد ھم اے زوراکیانی آماچ بیتگ اَنت ، چہ ایشی ءَ پدر اِنت کہ چہ پاکستانی لشکر ءِ زوراکی ءَ ناں وانندگیں ورنا پھریز اَنت ءُ ناں کہ مزدور ۔
پانک ءَ وتی گزارش ءَ مھترھندی پشت ءُ پلہ مرزی ءَ کار کنوکیں مردم کشیں رمبانی ( ڈیت اسکواڈ ) دست ءَ مردمانی کوش ءِ گیش بیگ ءِ سر ءَ ھم بے تاھیری درشانتگ۔
مردمی اگبالانی اے مزنیں بگیریانی سر ءَ سانمندیں کھول ءُ کارکنانی زھرشانی برجاہ اِنت۔بیگواھیں بلوچانی توار ( وی بی ایم پی ) ءِ زھرشانی گدان ءَ 5,751 روچ اِنت کہ یکشل ءَ برجاہ اِنت ، اے گدان زور بیگواھیں مردمانی کھولانی توار جوڑ بیتگ۔
پانک ءَ چہ راجانی سنت ، یورپی سنت ءُ چہ مردمی اگبالانی دگہ جھانی تْرامگیجاں دزبندی کرتگ کہ آ پاکستان ءِ سر ءَ زور بہ دے اَنت داں آ ماں بلوچستان ءَ وتی زوراکیاں بہ دار ایت۔ گزارش ءِ تہ ءَ چہ جھانی تْرامگیجاں لوٹ کنگ بیتگ کہ آ ماں بلوچستان ءَ آزاتیں پولکاری بولک دیم بہ دے اَنت کہ آ زور بیگواھی، آزار ءُ درآمیدگسی کوشانی سر ءَ ناپتیں ( نا پَت / غیرجانبدارانہ ) پولکاری کرت بہ کن اَنت۔
پانک ءَ اے نیمگ ءَ دلگوش پرینتگ کہ بلوچستان ءَ برجاھیں مردمی اگبالانی بگیری ءِ سر ءَ پاکستان ءِ گر ءُ دار ءَ جھانی تک ءَ یکشلیں دلگوش المی اِنت۔
