گزارش ماں انگریزی ءَ ( پی ڈی ایپ)
شال: بلوچ راجی زْرمبشت ( بی این ایم) ءِ مردمی اگبالانی تْرامگیج ’پانک‘ ءِ گزارش ءِ رد ءَ پروری 2023 ءَ چہ بلوچستان ءَ 39 کس زور بیگواہ کنگ بیتگ ءُ مردمے پاکستانی لشکر ءَ لٹ چوپ کرتگ ءُ کشتگ۔
زور بیگواھی ءِ آماچیں مردمانی تہ ءَ دو جنین ماھل ءُ رشیدہ زھری ھم ھوار بیتگ اَنت چہ ایشاں رشیدہ زھری یلہ کنگ بیتگ ءُ ماھل دروگیں بھتاماں پولیس ءِ ناشرکاری ءِ گر ءُ داریں تک ءِ زندان ءَ اِنت۔
پاکستانی لشکریانی لٹ چوپ ءَ بیران بیتگیں دادبکش ء مسکان ، پاکستانی لشکر ءَ وتی بنجل لوٹائینگ ءَ پد جتگ ءُ زدگ کرتگ چہ ایشی ءَ آ سکا ٹپی بیتگ ءُ رند ءَ ٹپ ئِے نہ سگ اتگ اَنت ءُ بیران بیتگ۔دادبکش گیشکور آواران ءِ نندوک اَت۔
پروری ءَ 13 زور بیگواھیں مردم آزارجاھانی تہ ءَ بالاد ءُ زھنی آزار دیگ ءَ پد یلہ کنگ بیتگ۔
پانک ءِ گزارش ءِ سرتاک ءَ پاکستانی لشکر ءِ دست ءَ زور بیگواھیں جنین ماھل ءُ رشیدہ ءِ اکساں ابید امیراں بی بی ءِ اکس ھم جتگ۔امیراں پہ گْوشگ پاکستانی سرکار ءِ وزیر ابدرھمان کیتران ءَ کشتگ ءُ آئی ءِ کنٹ ءِ سر ءَ تیزاب پر ریتکگ داں آ پجارگ مہ بیت۔امیراں بی بی ءِ پجیگ ءَ کشگ بیتگیں دگہ چار مردمانی کنٹانی دست کپگ ءَ پد سرجمیں بلوچستان ءَ زھرشانی کنگ بیتگ چہ ایشی ءَ ابدرھمان کیتران دزگیر کنگ بیتگ۔
چہ پانک ءِ نیمگ ءَ شنگ کنگ بیتگیں گزارش ءِ پجیگ ءَ درشانے ءَ گْوشگ بیتگ پروری ءَ پاکستان ءَ بلوچستان ءَ زور بیگواھیانی تہ ءَ گیشی آؤرتگ ءُ بلوچ جنین ھم نشانگ کرتگ اَنت۔زور بیگواھی ءِ آماچیں ماھل ءِ دزگیری منگ بیتگ ءُ آئی ءِ سر ءَ مزنیں بھتام جنگ بیتگ۔
گزارش ءَ گْوشگ بیتگ کہ گْوستگیں دو دھکاں دست ءُ گوشیں مردمانی دزگیری ءَ پد زور بیگواھی برجاہ اِنت، آ کجام راھبندانی پد ءَ دزگیر ءُ زور بیگواہ کنگ بیگ ءَ اَنت ایشی ءِ سر ءَ پاکستانی سرکار ءُ واکدار ھچ گْوشگ ءَ نہ اَنت۔ دست ءُ گوشیں شھرمننداں زور بیگواہ کنگ ءُ ابید چہ آمیدگس ءِ برگ ءَ آیاں آزار دیگ مردمی اگبالانی لپاشگ اِنت۔
پانک ءِ رد ءَ بلوچستان ءَ مردمی جیڑہ ودی بیتگ ایشی ءِ نیمگ ءَ بلوچ گل دلگوش پرینگ ءَ اَنت بلے کس گوش دارگ ءَ نہ اِنت پمیشکا پاکستانی لشکر گوں گوں نترسی ءَ دست ءُ گوشیں بلوچانی اگبالاں لپاشگ ءَ اِنت۔اگاں میان استمانی تْرامگیج ءُ مردمی اگبالانی پانک پاکستان ءَ جست مہ کن اَنت گڑا بلوچستان ءَ مردمی اگبالانی جاور چد ءُ بدتر بہ اَنت۔
پانک ءَ لوٹ کرتگ کہ ماں بلوچستان ءَ پاکستان ءِ میارانی دارگ ءَ ھم سنتیں راجانی پجیگ ءَ دگہ تْرامگیج ھم تچکیں گامگیج بہ زیر اَنت۔