شال : بلوچ نیشنل موومنٹ ءِ مردمی اگبالانی تْرامگیج ’ پانک‘ ءَ مارچ 2023 ءِ گزارش ’ بلوچستان ءَ مارشل لا ءِ جاور‘ ءِ سرھال ءَ شنگ کرتگ۔
اے گزارش ءِ رد ءَ مارچ 2023 ءَ پاکستانی لشکر ءَ ھپت کس کشتگ۔بلوچستان ءِ ھنکین آواران ءِ ھند کولواہ ءِ نندوکیں شوانگ اللہ داد ءُ ھاران ھنکین ءِ نندوکیں سلاہ ادین سیا پاد دزگیر کنگ ءَ پد ھوش چوپ کنگ بیتگ اَنت۔ چہ لٹ ءُ چوپاں پد دوئیں ابید چہ المی ءُ اشتاپی ئیں دارگ ءُ درماناں یلہ کنگ بیتگ اَنت چہ ایشی ءَ دوئیں سانمند بیتگیں مردم چہ پاکستانی لشکر ءِ آزاراں سکا ٹپی بیگ ءَ پد بیران بیتگ اَنت۔
پانک ءِ گزارش ءِ رد ءَ بلوچستان ءَ زور بیگواھی مردمی اگبالانی چہ درساں مستریں جیڑہ ءِ دْروشم ءَ سھرا بیگ ءَ پد ھم مردماں ناراھی دزگیر کنگ ءُ زور بیگواہ کنت بلوچستان ءَ پاکستانی لشکر ءِ ھمروچیگیں کار جوڑ بیتگ۔مارچ 2023 ءَ 58 کس زور بیگواہ کنگ ءُ چہ ھزاراں بیگواھیں مردماں تیوک ءَ 3 کس چہ پاکستانی آزار جاھاں یلہ کنگ بیتگ کہ ماں زندان ءَ زھنی ءُ بالادی آزار دیگ بیتگ اَنت۔پاکستانی لشکر ءَ ناں آ آمیدگس ءَ پیش کرتگ اَنت ءُ ناں کہ آیانی سر ءَ جتگیں بھتامانی بارہ ءَ گْوشتگ ءُ ناں کہ اے گپ گْوشتگ کہ آ پرچا دزگیر کنگ بیتگ اَنت۔
گزارش ءَ ماں بلوچستان ءَ رسانکدری کوراسی ، ابید جار ءَ مارشل لا، زور بیگواھی ، آمیدگس ءِ پرمان ءَ ڈن کوش ءُ چہ پولیس ءِ کاؤنٹر ٹیررازم ڈیپارٹمنٹ ءِ نیمگ ءَ مردمی اگبالانی لگتمانی سھرا کنگ بیتگ اَنت۔
پانک ءِ گزارش ءِ رد ءَ بلوچستان ءَ میجر آسپ گپور ءِ کور کمانڈر بیگ ءَ پد مردمی اگبالانی لپاشگ ءِ تہ ءَ گیشی اتکگ۔ بلوچستان ءَ چہ میجر آسپ گپور ءِ کور کمانڈر بیگ ءَ بلوچستان ءَ پر ایمنیں سیاسی سرگرمیانی سر ءَ پابندی جنگ بیتگ، درسیں مردمی تْرامگیج لنش کنگ بیتگ اَنت ءُ میجر آسپ گپور کالونیل وائسرایے ءِ پیم ءَ بلوچستان ءِ درسیں تْرامگیجاں تچکے ءَ پرمان دیگ ءَ اِنت۔وانگی تک ، جاندْراھی تک ءُ آمیدگس رنگیں تْرامگیج ھم چہ لشکر ءِ دزمانجنی ءَ نہ رک اتگ اَنت۔لشکری واکدار مزنیں وانگجاھانی وانگی مراگشانی پجیگ ءَ درسیں کارانی تہ ءَ دزمانجنی کنگ ءَ اَنت۔بلوچستان زانشجاہ ءِ گیشتریں زمین پاکستانی لشکر ءَ گیپتگ ءُ کت ءُ گسانی تہ ءَ ایپ سی نندوک اِنت۔بلوچستان زانشجاہ ءِ کمک تْرامکار ءِ سرکاری گس ھم پاکستانی لشکر ءِ ونگ کمانڈر ءَ دستیگ کرتگ ءُ ھمود ءَ جاھمنند اِنت۔ بلوچستان یونیورسٹی ءَ نندوکیں ایپ سی ءِ لین ءُ گیسانی ھمک ماہ لکانی کلدار ءِ بل ھم چہ بلوچستان زانشجاہ ءِ نیمگ ءَ دیگ بہ اَنت کہ چہ پیسر ءَ ناگیگیں مالی جاورانی آماچ اِنت۔
’’ ماں رسانکدری کوراسی ءَ بندیگ ءُ چہ جھان ءِ چماں اندیمیں بلوچستان جھان ءِ انچیں ٹکے جوڑ بیتگ کہ اد ءَ سک باز مردمی اگبالانی لگتمالی بیگ ءَ اِنت۔ اگاں گوں مردمی ناگیگیں جاوراں دوچار ایں بلوچستان ءِ یک روچے ءِ سر ءَ ھم چمشانک دیگ بہ بیت اد ءَ مردمی اگبالانی ناگیگیں جاور سھرا بیت۔مارچ 2023 ءَ مردمی اگبالانی جاور ءِ سر ءَ چمشانک اے گْوش ایت کہ بلوچستان ءَ روچ پہ روچ مردمی اگبالانی لپاشگ گیش بیگ ءَ اِنت ءُ پاکستانی لشکر بلوچستان ءِ مردمانی سیاسی ءُ مردمی اگبالانی پچ گرگ ءَ ابید چک ءُ پدی ءَ آیاں آزار دیگ ءَ اِنت۔‘‘
پانک ءَ وتی گزارش ءَ بلوچستان ءَ اگبال بہ دئے زْرمبشت ءِ باسک ءُ راھشونانی سر ءَ مھترھندی گر ءُ بند ءِ سر ءَ ھم گپ جتگ، گزارش ءَ گْوشگ بیتگ 25 مارچ ءَ بلوچستان ءَ اگبال بہ دئے زْرمبشت ءِ کونسلر ھاجی جاوید، کونسلر نوید مھمد، کونسلر نسیر شھزادہ ، چیئرمین اللہ بکش ، آبد جی ایم ءُ مولانا لیاکت بلوچ ءِ مانزمانی رد کرتگ آ دزگیر کنگ بیتگ اَنت۔ سیاسی سرگرمی ءُ درشان ءِ سر ءَ پابندی مردمی اگبالانی تچکیں وڑے ءَ لپاشگ اِنت۔ایشی ءِ سر ءَ بلوچ وتی بے تاھیری ءَ درشان کن اَنت ءُ اے جست ءَ کن اَنت کہ وھدے مھترھند ءُ مزدانک (انصاف) ءِ مانزمانیں مھترھندی آمیدگس شھرمنندانی بنکی اگبالانی پھریزگ ءَ بے سوب بہ بہ اَنت گڑا شھرمنندانی پھریزگ ءِ زمہ وار کے نامینگ بیت ءُ اے کار کجام سنگیگ(معیار) ءُ راھبندانی بنیاد ءَ بوت کنت؟
گزارش ءَ دروگیں بھتام ءَ بندیگیں مردمی اگبالانی کارکن ماھل ءِ دزگیری ءِ جیڑہ ءِ سر ءَ ھم بے تاھیری درشان کنگ بیتگ: ’’ ایمنسٹی انٹرنیشل ءَ اے بارہ ءَ پاکستان ءِ تھی کارانی وزیر ءَ نمدی نبشتگ ءُ ماھل ءِ یلہ کنگ ءِ لوٹ کرتگ۔ایمنسٹی انٹرنیشنل ءِ اے جْوانیں گامگیجے بلے اے سانمند بیگ ءَ نہ اِنت پمیشکا ایمنسٹی انٹرنیشنل ءَ اے بارہ ءَ یکشل ءَ پاکستانی واکدارانی سر ءَ وتی زور برجاہ دارگ لوٹ ایت ءُ پہ مردمی اگبالانی پھریزگ ءَ ھما درسیں پارست ءُ در کاربندگ لوٹ اَنت کہ مردمی اگبالانی میان استمانی راھبندانی پرینگ ءِ مانزمان اَنت۔‘‘
پانک ءَ پاکستانی آمیدگس ءِ کرد ءِ سر ءَ نادلجمی ءِ درشان کرتگ ءُ ایراد گیپتگ: ’’ 12 پروری 2023 ءَ چہ شال ءَ زور بیگواھیں نودربر ساکب سرپرہ ءُ ساجدسرپرہ سی ٹی ڈی ءَ دروگیں بھتاماں دزگیر کرتگ اَنت ءُ آمیدگس ءَ پنچ پنچ سال ءِ زندان داتگ اَنت۔ اے جیڑھانی تہ ءَ ھم آمیدگس ءَ ایوک ءَ پاکستانی لشکر ءِ واھگ راھبند من اتگ ءُ شور بُر اتگ۔پاکستانی بست ءُ بند ءَ ھواریں دگہ دمگ ءُ دگہ جیڑھاں پاکستانی آمیدگس پرکاریں کرد پیلو کنت ءُ چہ وتی نیمگ ءَ دلگوش زیرگ ءِ بنیاد ءَ آمیدگسی کارروائیاں پاکستانی آمیدگس نامان اَنت بلے ماں بلوچستان ءَ مردمی اگبالانی ناگیگیں جاوراں پاکستانی آمیدگساں پت داشتگ ءُ پاکستانی پھزدارانی آسراتی دیوک ءِ کرد ءَ پیلو کنگ ءَ اَنت ، اے کرد ماں بلوچستان ءَ مردمی اگبالانی بگیریاں گیش کنوک اِنت۔