بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءَ ماں بلوچستان ءَ مردمی اگبالانی جاورانی سر ءَ سال 2023 ءِ گزارش شنگ کرتگ۔ اے گزارش بلوچستان ءَ مردمی اگبالانی بدتریں جاور ءَ سھرا کنت۔ گزارش ءِ رد ءَ گْوستگیں سال ءَ پاکستانی لشکر ءَ 75 مردم درآمیدگسی کشتگ ءُ 576 کس زور بیگواہ کرتگ۔ 261 مردم زور بیگواہ کنگ ءُ آزار دیگ ءَ پد یلہ کنگ بیتگ۔
پانک ءِ اے گزارش بلوچستان ءَ گیش بیوکیں زوراکیانی دْرچ ءِ دارگ ءِ گپ ءَ جنت ءُ در آمیدگسی کوش ، زور بیگواھی ءُ پاکستانی مھترھند ءِ بنکی مردمی اگبالانی ’انکار‘ ءِ گر ءُ دار ءَ زیتیں میان استمانی دزمانجنی ءِ لوٹ ءِ سر ءَ زور دنت۔
پانک ءَ ماں بلوچستان ءَ مردمی اگبالانی ناگیگیں جاور ءِ آسر کنگ ءَ چار پیش نھاد ایر کرتگ ءُ گْوشتگ ، چہ اے گامگیجاں میان استمانی گل بلوچ راج ءِ اگبال ءُ گھبود ءِ پانک ءَ جت کن اَنت ءُ مھترھند ءِ ایرجنگ کرزیں کارپدانی زمہ وارانی گر ءُ دار ءَ الم کنگ ءَ شریں کردے پیلو کرت کن اَنت۔
ماں اے پیش نھاداں ’’ پاکستانی سرکار ءِ سر ءَ مردمی اگبالانی بگیری ءُ زور بیگواھیاں دارگ ءَ زور دیگ ، بلوچستان ءَ مردمی اگبالانی بگیریانی سرجمیں پٹ ءُ پول ءُ کاگد ءُ کراچ جوڑ کنگ ءَ وتواک ءُ ناپتیں چارگزاری بولکانی ٹاھینگ ، پہ مردمی اگبالانی پانک جنگ ءُ ردوم ءَ کار کنوکیں تْرامگیج ءُ مردماں مالی کمک دیگ ، مردمی اگبالانی رد ءَ سانمند بیتگیں مردمانی کمک ءُ آیاں مزدانک دیگ ءِ پلہ مرزی ءُ پاکستانی سرکار ءِ میار بارانی گر ءُ دار ءُ جست ءُ پرس ءَ بے سوب بیگ ءَ پد پاکستان ءِ بگیری ءَ سپارتی گامگیج ءُ پابند جنگ ،‘‘ ءِ پیش نھاد گون اَنت۔
پانک ءِ گزارش ءَ پاکستانی سرکار ءُ لشکر ءِ نیمگ ءَ مردمی اگبالانی بگیریانی سر ءَ سرجمی ءَ گپ جنگ بیتگ ءُ گْوشگ بیتگ کہ جنرل اھمد شریپ چوھدری ءَ بلوچستان ءَ جنوری ءَ گر داں مارچ ءَ چارسد ءُ چل لشکرکشی ءِ گپ من اتگ ، چد ءُ پیش آیاں وتی بدیں کارپد چیر داتگ اَنت۔ اے مناک بلوچستان ءَ پاکستانی لشکر ءِ بندر کنگ ءُ مردمی اگبالانی بگیری ءَ آئی ءِ گون بیگ ءَ پدر کنت۔
’ اے گپانی پد ءَ ‘ پانک ءِ گزارش مردمی اگبالانی میان استمانی گل ءُ تْرامگیجانی سر ءَ زور دنت کہ آ بلوچستان ءَ بیوکیں ٹوھیں بگیریانی دیمپان بہ بہ اَنت۔ گزارش ءَ زیتیں گامگیج زیرگ ءِ لوٹ سھرا کنگ ءُ زور دیگ بیتگ کہ دمگ ءَ برجاھیں مردمی اگبالانی ناگیگیں جاور ءِ دارگ ءَ مادنیں گامگیج زیرگ لوٹ ایت۔