پانک مردمی اگبالانی پروری 2024 ءِ گزارش ۔ اردو :
پانک مردمی اگبالانی پروری 2024 ءِ گزارش ۔ انگلش :
بلوچ راجی زْرمبشت ( بی این ایم ) ءِ مردمی اگبالانی تک پانک ءَ پروری 2024 ءَ بلوچستان ءِ مردمی اگبالانی ءِ جاور ءِ سر ءَ وتی گزارش شنگ کرتگ۔اے گزارش ءَ بلوچستان ءِ مزنیں ویلانی سر ءَ الکاپی ءَ گپ جنگ ءُ گْوستگیں ماہ ءَ زور بیگواھیں مردمانی لڑ شنگ کنگ بیتگ کہ ایشی ءِ تہ ءَ آیانی پجار داتگ اَنت۔
گزارش ءِ رد ءَ پروری 2024 ءِ میان ءَ بلوچستان ءِ جتائیں ھنداں 33 کس زور بیگواہ کنگ بیتگ ءُ 28 کس چہ آزار جاھاں یلہ کنگ بیتگ۔مچ ءَ بلوچ سرمچارانی بیڑ ءَ پد 5 دزگیریں مردم پاکستانی لشکر ءَ کشتگ ءُ سرمچار لیک اتگ اَنت۔
چہ ایشی ءَ ابید گزارش ءِ تہ ءَ کیچ ءُ گوادر ءَ زور بیگواھیانی سر ءَ زور بیگواھیں مردمانی کھولانی زھرشانی ، مچ ءَ بلوچ سرمچارانی بیڑ ءَ پد پاکستانی لشکر ءِ زندان ءَ بندیں مردمانی دزگیریں کوش ءُ بولان ءَ پاکستانی لشکر کشی ءِ میان ءَ دست گوشیں مردمانی سر ءَ زوراکی ءِ سر ءَ بے تاھیری درشان کنگ بیتگ۔
کیچ گوادر ءَ ورنایانی زور بیگواھی ءُ ایشی ءِ سر ءَ کھولانی زھرشانی ءِ بارہ ءَ پانک ءِ گزارش ءَ گْوشگ بیتگ چاگردی رسانک ءَ دیم ءَ اتکگیں ویل ایوک ءَ زور بیگواھی ءُ ناراھیں دزگیریاں یلہ بیتگیں مردمانی کچ ءُ شمار ءَ گْوش اَنت کہ اینچو زور بیگواہ کنگ ءُ اینچو چہ آزارجاھاں یلہ کنگ بیتگ۔ بلے اے کار ءِ پد ءَ بلوچ چاگرد ءِ سنچ ءُ چاگردی ردوم ءِ تاوانانی زانگ ءَ ایشی ءِ سر ءَ جھلانکی ءَ پٹ ءُ پول ءُ زانشتی رنگ ءَ چار ءُ ٹپاس لوٹ ایت۔ یلہ بیگ ءَ پد ھم زور بیگواھیں مردمانی سما ءِ سر ءَ پاکستانی لشکر ءُ آئی ءِ چیریں واکانی چم سک اَنت۔ آیاں لاچار کنگ بیت کہ آ پہ زور درانڈیھ بہ بہ اَنت یا بلوچستان ءِ تہ ءَ بلوچ راج ءِ بگیری ءَ بیوکیں سرگرمیانی تہ ءَ پاکستانی لشکر ءِ کمک بہ کن اَنت ءُ زندگ ءَ مردار جوڑ بہ اَنت یا چہ چاگرد ءَ وت ءَ بہ سند اَنت۔
پانک ءِ گزارش ءَ گْوشگ بیتگ۔ کیچ ءَ ماں ڈی بلوچ ءَ داں باز روچ ءَ برجاھیں زھرشانی چہ پولیس ءِ اے دلجمی دیگ ءَ پد آسر کنگ بیتگ کہ ناراھی دزگیر کنگ بیتگیں زور بیگواھیں مردمانی تہ ءَ گیشتریں ورنایانی دزگیری ءِ نیمونے جوڑ کنگ ءُ آیانی سر ءَ دروگیں بھتام ءَ کیس جوڑ کنگ بیت ءُ آیانی دزگیری پدر کنگ بیت۔زوراکی ءُ بے وسی ءِ کچ ایش اِنت کہ کھولاں اے ناراھیں لوٹ ھم من اتگ بلے اے ھم یک وڑے ناراھی یے ، زوراکی یے کہ مردم چہ لوگاں چست کنگ بہ اَنت ءُ آیانی سر ءَ دروگیں بھتاماں کیس جوڑ کنگ بیت۔
پانک ءِ گزارش ءَ اے ھم مردمی اگبالانی انچیں بگیری یے لیکگ بیتگ کہ ڈالچار کنگ بیگ ءَ اِنت۔ گزارش ءِ رد ءَ ، مردمی اگبالانی تْرامگیج اے جیڑھانی سر ءَ دلگوش بہ دے اَنت۔ بلوچستان ءِ زنداناں بندیں ھما مردم کہ پیش ءَ پاکستانی لشکر ءَ زور بیگواہ کرتگ اَنت۔ آیانی گْور ءَ روگ بہ بیت ءُ آیانی راھبندی کمک ءِ بست ءُ بند کنگ بہ بیت۔مارا ’ زور بیگواھی ‘ ءِ جیڑہ ءِ اے چیریں پھنات ھم پدر کنگ لوٹ اَنت داں مزدگری ءِ لوٹ پیلو بہ بہ اَنت۔ پاکستانی لشکر گوں وتی ترندیں زوراکیاں لوٹ ایت کہ مردم وتی اگبالانی سر ءَ گپ مہ کن اَنت ۔ مردم لاچار کنگ بیگ ءَ اَنت کہ آ مزنیں زوراکیانی دیم ءَ کسانیں زوراکیانی سر ءَ ھچ مہ گْوش اَنت ءُ آیاں بہ من اَنت یا روا بہ دے اَنت۔
پانک ءِ گزارش ءَ مچ ءَ پاکستانی لشکر ءِ دست ءَ کشگ بیتگیں پنچ دزگیریں مردمانی بارہ ءَ گْوشگ بیتگ اے مردمانی زوربیگواھی ءِ بارہ ءَ مناک ھست۔ لھتیانی کھول زور بیگواھیانی بگیری ءَ اسلام آباد نندانک ءَ گون اَت۔پجارگ بیتگیں چاریں کنٹانی تہ ءَ یکے بشیر اھمد مری ء ھاجی ھان مری ، ارمان مری ء نھال ھان مری 2 جولائی 2023 ءَ زوربیگواہ کنگ بیتگ اَت اَنت ، سوبدار ء گلزار ھان 9 ستمبر 2023 ءَ چہ ھرنائی بازار ءَ زور بیگواہ کنگ بیتگ اَت ، ایشانی کھول ءِ مردماں اسلام آباد نندانک ءَ بھر زرتگ ءُ ایشانی یلہ کنگ ءِ لوٹ کرتگ اَت ، ءُ چارمی کنٹ شکیل اھمد ء مھمد رمزان ، زھری ءِ جاھمنندئیگ اَت ، آئی ءِ کھول ءِ گْوشگ اِنت کہ آ 4 جون 2023 ءَ زور بیگواہ کنگ بیتگ اَت۔
گزارش ءَ گْوشگ بیتگ گوں مچ ویل ءَ ھمگرنچ کنگ ءُ دزگیریں مردماں کشگ پاکستانی لشکر ءِ بے شماریں کارروائیانی دْرچ اِنت۔پاکستانی لشکر ءِ کر ءَ نرم دلی ءُ مردمی اگبال رنگیں دانکاں مانا نیست۔ کشندھانی اے تْرام اتگیں رمب داں ھما وھد ءَ کشت ءُ کشار کنت داں اے گوں زورمندیں دست ءُ میان استمانی دزمانجنی دارگ مہ بیت۔
پانک ءِ رد ءَ پاکستانی لشکرکشی ءِ میان ءَ زمین ءِ مزنیں پھناتے انگر کنگ بیت ، راھوت ءُ رسانک بند کنگ بہ اَنت ءُ وھدے ماھاں پد رسانک ءُ راھوت برجاہ بیت گڑا آ اود ءَ دردناکیں داستان پشت کپ اَنت۔ زور بیگواھی ، شد ءُ جنسی زوراکی ءِ شکایت ، پاکستانی لشکر ءِ ھمک لشکرکشی ءِ آسر اَنت۔ مئے ترس ھمیش اِنت کہ بولان ءَ برجاھیں پاکستانی لشکر ءِ کارورائی مردمگری ءِ بگیری گوں انچیں آسرے ءَ کٹ اَنت۔
پانک ءِ گزارش ءِ تہ ءَ ماں بولان ءَ پاکستانی لشکر ءِ کارروائی ھم ایر جنگ بیتگ ، پانک ءِ رد ءَ مچ ارش ءِ نیمون ءَ پاکستانی لشکر سرمچارانی بگیری ءَ مزنیں دمگے ءَ کارروائی کنگ ءَ اِنت۔ بلے ، اد ءَ ھم بلوچ سرمچارانی جاہ ءَ میتگ نشانگ کنگ بیگ ءَ اَنت۔ دیم پہ دیم بیتگیں دو گیش اتگیں واکانی میان ءَ ھم پاکستانی لشکر جنگی راھبند ءُ مردمی اگبالاں منگہ دیگ ءَ نہ اِنت۔
پانک ءَ پاکستانی لشکر ءِ اے کارروائیانی بگیری ءَ پٹ ءُ پول ءِ لوٹ کرتگ ءُ گْوشتگ میان استمانی تک ءَ اے رنگیں جنگانی میان ءَ میتگانی پھریزگ المی اِنت۔ ھر دو نیمگ ءِ سلاھبند پابند کنگ بہ اَنت کہ آ مردمی اگبالانی انان ءَ بہ دار اَنت۔بلوچستان ءِ مردم ھم انسان اَنت آیانی ھم ھما اگبال اَنت کہ جنگ آماچیں ڈیھانی مردماں دیگ بیتگ اَنت۔ پاکستانی سرکار ءِ سر ءَ زور دیگ بہ بیت کہ آ اے دمگاں میان استمانی تْرامگیج ءُ رسانکدر ءَ روگ ءَ بہ ھل ایت داں پاکستانی لشکر ءِ کارروائیانی چار ءُ ٹپاس آسان بہ بیت۔
گزارش ءَ گْوشگ بیتگ بلوچ سرمچار گوریلا جنگ کنگ ءَ اَنت ، آیانی بنجل شھر ءُ میتگاں نہ اَنت۔چہ ایشی ءَ ابید ھم پاکستانی لشکر ھرچ وھد ءَ میتگاں انگر کنت ءُ اے میان ءَ مردمی اگبالانی بگیری ءِ گپ دیم ءَ کاینت کہ آیاں پاکستانی واکدار ڈالچار کن اَنت۔ ایشی ءِ سر ءَ بے تواری مردمی مڑاہ ءِ چپ اِنت۔