چہ ھما روچ ءَ کہ بلوچستان زورگپت ءُ دری واکانی چیردست اِنت بلوچ ءِ زندمان چہ وشیاں زبھر اِنت۔بلوچ ءِ بستار زورگر ءِ گْور ءَ چہ دلوتے ءَ کمتر اِنت پرچا کہ واھند ءَ وتی دلوت ءِ زندگی دوست بیت ءُ آئی ءَ چہ نادراھی ءُ رستراں پھریز ایت، بلے زورگر چیردستیں راج ءَ نیست ءُ نابود کنگ لوٹ ایت۔ انچوش کہ دلوت واڑ، بلم، پینڈ، پاند ءُ اشکیل کنگ بہ اَنت ھمے پیم چیردستیں راج۔ چہ آیاں زند ءِ ھمک آجوئی پلگ بیت، بلوچ ھم چہ وتواجھی ءَ زبھر اِنت ءُ چہ جھان ءِ چیردست ءُ زوراکیانی آماچیں راجاں چیدگیں راجے۔
اے جاوراں راجانی تہ ءَ انچیں گھگیریں سر ءُ سروک ودی بہ اَنت کہ آ وتی راج ءَ چہ نیستی ءُ گاری ءَ پھریزگ ءَ زورگر ءِ دیم ءَ اوشت اَنت، چہ آیاں یکے شھمیرغلام محمد اَت ھم۔ بلوچ ءَ ھرچ زمانگ ءَ زورگرانی دیم ءَ گھگیری کرتگ ءُ زمانگ ءِ لوٹانی پد ءَ بلوچ راھشوناں وتی کرد پیلو کرتگ۔ 1974 ءَ واجہ غلام محمد بلوچ نودر بر گل ( بی ایس او )ءِ باسک بوت، راجدوستی ءُ راجی سیاست ئِے دربرت، وتی مگیمیں باور، دراجیں پند، زانت ءُ زانگ ءُ داشت ءِ برپشت ءَ 1990ءَ آ گل ءِ سرکماش گچین بوت۔ 1992 ءَ آ بلوچستان نیشنل موومنٹ ءَ ھوار بوت۔ آ زمانگ ءِ بی این ایم ءِ راھشونانی گْوشگ ھمیش اَت کہ پہ بلوچستان ءِ واتواکی ءُ وتواجھی ءَ جھد کن اَنت۔ چوش کہ پاکستان زوراک ءُ زورگر اِنت، ابید چہ توپگ ءِ زبان ءَ ھچ سرپد نہ بیت ءُ زور ءَ زورے دار ایت، پمیشکا آ روچیگیں بی این ایم ءِ شونداتانی تہ ءَ گوں زورگر ءَ سلاھبندیں جنگ ھم ھوار اَت۔ چیراندری گل گوں پاکستان ءَ جنگ ءِ ھم چن ءُ لانچ ءَ اَت بلے 1988ءَ فدا احمد شھمیر کنگ بوت کہ آئی ءَ لوٹ اتگ اَت بی این ایم پاکستانی پارلیمانی سیاست ءِ بھر مہ بیت۔ چہ فدا احمد ءِ کوش ءَ پد بی این ایم ءِ برگشتگیں راھشوناں گل پاکستانی پارلیمنٹ ءِ بھر جوڑ کرت ءُ وت ءَ چہ گھگیری ءَ دیر داشت۔
واجہ غلام محمد ءَ اے بے بْرمشیں پدکنزگ نہ من اِت ءُ بی این ایم وتی بنکی من ءُ مولانی رد ءَ برجاہ داشت بلکیں انگت گامے دیم ءَ کنز اِت، در پارلیمانی سیاست ءِ جار جت ءُ پہ بلوچستان ءَ آجوئی لوٹ اِت۔ بی این ایم بلوچستان ءِ سیاست ءَ سری گل اَت کہ تچکی ءَ آجوئی ءِ لوٹ ئِے کرت ءُ 2008 ءِ راجمان پتر ءَ گل ءِ آئین ءَ ’ وتواجھی ‘ ءِ دانک در کنگ ءُ تچک ءَ ’ آزادی ‘ ءِ لوٹ ھوار کنگ بوت۔ واجہ غلام محمد ءِ سرکماشی ءَ بی این ایم ءَ بلوچ سرمچارانی پلہ مرزی کرت ءُ بلوچ پہ گھگیری ءَ سکین دات، بلے واجہ غلام محمد سلاھبند نہ اَت۔ دژمن ءَ زانت کہ اگاں غلام محمد ءِ دیم دارگ مہ بیت گڑا غلام محمد ءِ راھشونی ءَ بلوچ زیت پاکستان ءِ تیل ءُ زمزیلاں سند ایت ءُ آجو بیت۔غلام محمد گوں شیرمحمد ءَ آوار جنگ ءُ زور بیگواہ کنگ بوت، بلے وھدے یلہ بوت پد ءَ بلوچستان ءِ آجوئی ءِ جھد ءِ سروک ءِ بستار ءَ دیم ءَ روان بوت، ناں آئی ءِ گپ مٹ بوت اَنت، ناں کرد۔
آ شال، تربت ءُ کراچی آمیدگس ءَ کیسانی دیمپان بوت۔ 3 اپریل 2009 ءَ آ ئی ءَ تربت ءَ بلوچ استمان گل ( بی آر پی ) ءِ کمک سرکماش شیر محمد ءُ بی این ایم ءِ بنجاھی پتر ءِ باسک لالا منیر ءِ پجیگ ءَ آمیدگس ءَ پیشی جت، آمیدگس ءَ ھرسئینانی سر ءَ پاکستانی لشکر ءِ دورگیں بھتاماں رد کرت اَنت ءُ آ یلہ دات اَنت۔ بلے پاکستانی لشکر ءَ آ ماں آمیدگس ءِ سیم ءُ بنداں چہ واجہ کچکول ایڈوکیٹ ءِ کارگس ءَ آوار جت ءُ مرگاپ ءَ برت ءُ کشت اَنت، آیانی کنٹ 8 اپریل ءَ دست کپت اَنت ءُ 9 اپریل 2009 ءَ گلزمین ءِ میار کنگ بوت اَنت۔مرگاپ ءِ ویل بلوچستان ءَ کشگ ءُ چگل دیگ ءِ شوندات ءِ ھم بندات اَت کہ داں مروچی برجاہ اِنت، اے شوندات ءِ نشانگ چہ ھما روچ ءَ بلوچ راجدوست اَنت۔
غلام محمد گوں ھمراھاں شھمیر کنگ بوت بلے دنیگت مرگاپ پہ آجوئی ءَ تناپ ءُ بلوچستان ءِ آجوئی ءِ زْرمبشت برجاہ اِنت۔
بلوچ راجی زْرمبشت ( بی این ایم )
