زورگپتیں بلوچستان ، اد ءَ راھبند ءِ واکداری نہ گْواہ ایت
بلوچستان زورگپتیں ڈیھے ، 27 مارچ 1948 ءَ ایشی ءِ زورگرگ ءَ پد پنجاپی مھترھند ( نام گپتیں اسلامی جمھوریہ پاکستان ) ءَ چہ بلوچاں آیانی درسیں شھرمنندی اگبال پچ گپتگ اَنت۔بلوچستان ءَ اے وھدی ھچ رنگیں راھبند ءُ آئین ءِ واکداری نہ گْواہ ایت۔
دری پنجاپی لشکر ( نام گپتیں پاکستانی لشکر ) ءَ بلوچستان ءِ سر ءَ چہ بومی ئیں دز ءُ ٹیکانی کمک ءَ نام گپتیں نمائشی سرکارے ٹاھینتگ بلے زورگپتیں بلوچستان ءِ درسیں شور ءُ مڈیانی سر ءَ واکدار ءُ پرماندار تچک ءَ بلوچستان ءِ کورکمانڈر اِنت—پنجاپی لشکر بلوچستان ءَ ھما شوندات ءِ سر ءَ کار کنگ ءَ اِنت کہ برتانیا ءَ پہ زورگپتیں ھندوستان یا نام گپتیں برتانیائی ھندوستان ءِ بارہ ءَ جوڑ کرتگ اَت۔
زور بیگواھی ، بلوچستان ءَ تْرام اتگیں چکچینی
پاکستانی لشکر ءِ زور بیگواھی ءِ شوندات یا نام گپتیں چیریں ’ آپریشن سائلنس ‘ بے مھاریں مھترھندی ناشرکاری جوڑ بیتگ۔نی اد ءَ کس چہ ایشی ءَ پھریز نہ اِنت ، گچینی بلوچستان ءِ وانندگیں مردم ، زانشتجاھانی استاد ءُ نودربر پاکستانی لشکر ءِ نشانگ اَنت۔ بلوچستان ءَ گوں بلوچ ربیدگ ، زبان ءُ راج ءَ دوستی پاکستان ءُ پاکستانی لشکر ءِ نمنوگری زانگ بہ اَنت ، کہ آیانی ڈنڈ پاکستانی لشکر ءِ گْور ءَ زور بیگواھی ءُ درآمیدگسی کوش اِنت۔
جنینانی زور بیگواھی ءِ نوکتریں ویل
برجاھیں سال ءِ 29 مئی 2025 ءَ بسیمہ ، واشک ءِ جاھمنندیں 24 سالی ئیں ماہ جبین ء غلام مصطفی چہ شال ءِ سول نادْراھجاہ ءَ دزگیری ءَ پد زور بیگواہ کنگ بیتگ۔
22 نومبر 2025 ءَ چہ ھب ءَ نسرینہ ء دلاور زور بیگواہ کنگ بیتگ کہ آ 15 سالی ئیں چکے۔
دسمبر 2025 ءَ چہ خضدار ءِ شھر ءَ فرزانہ ء محمد بخش زھری پولیس ءِ نام گپتیں ناشرکاری ءِ گر ءُ داری تک ( سی ٹی ڈی ) ءَ دزگیری ءَ پد زور بیگواہ کرتگ۔
بلوچستان ءَ مردمی اگبالانی جاور ءِ اے ایوک ءَ جلشکے ، اد ءَ ھزاراں مردم زور بیگواہ اِنت ، ھم روچ چہ یکے ءَ گیشتر مردم زور بیگواہ کنگ ءَ پد ابید چہ راھبند ءُ آمیدگس آزارجاھاں بند کنگ بیت ، درآمیدگسی کوش پاکستانی لشکر ءِ ھمروچیگیں کار اِنت۔
دزبندی
ما چہ مردمی اگبالانی گلاں دزبندی کن ایں کہ آ پاکستانی مھترھند ءِ میارانی سر ءَ سنگین ءُ سانمندیں گام بہ گیج اَنت ءُ آئی ءَ میان راجی تْرامگیجانی دیم ءَ جست ءُ پرس ءُ گر ءُ دار بہ کن اَنت۔
بلوچ راجی زْرمبشت ( بی این ایم )
