پرمنگھیں بلوچ راج!
پاکستانی ناشرکاریاں بلوچستان سیاسی ، چاگردی ، گزرانکی ، وانگی ءُ مردمی جیڑہ ءِ دیمپان کرتگ۔بلوچستان ءَ جاھمنندیں ھچ سسا ءُ لیکہ ءِ مردمے پشت نہ کپتگ کہ پاکستان ءِ ناشرکاریں شونداتانی آماچ مہ بیت۔
زور بیگواھی، کلپیں میڑاں بہ گر داں مچی ڈنڈ دیگ ءَ مردمانی زندمان سکا بدیں رنگے ءَ سانمند کرتگ، اگاں مردمی جیڑہ ءِ نیمگ ءَ بہ چار ایں گڑا چہ زور بیگواھی ءَ جنینانی پجیگ ءَ چک ھم پھریز نہ اَنت۔لشکرکشی ءُ لوگانی آچ دیگ ءِ کارپداں بلوچ راج لڈ ءُ بار ءَ لاچار کرتگ۔بلوچستان انچیں مردمی جیڑھے ءِ آماچ اِنت کہ ایشی ءِ سر ءَ راجے ءِ بستار ءَ مئے بے تواری پہ ما مزنیں جستے بیت۔
با سمائیں بلوچ!
وانگ ءِ جاورانی نیمگ ءَ بہ چار ایں گڑا زانگ بیت کہ بنکی وانگ ءُ زانگ ءِ بنجل یا و سرجمے ءَ بند اَنت یا چہ آسراتیاں زبھر اَنت یا لشکر ءَ گیپتگ اَنت، گزرانکی جاور ءُ گْرانی ءَ بلوچ راج ءِ زندمان ناگیگ کرتگ، سیمسر ءِ بندی، گاڑیانی ٹوکن ءِ سر ءَ کنگ ءُ ماں دریا ءَ گجو ءَ ماھیگانی بازیں جرات بیگواہ کرتگ ءُ پہ میداں ماھیگ کم ترینتگ ، پمیشکا گوں دریاوردی ءَ بندوکیں مردم پہ ڈکیں نانے ءَ وازمندگ اَنت۔
نپت ءِ نہ رسگ ءَ کشاورد ھم زھرشانی کنگ ءَ لاچار اَنت ، دومی نیمگ ءَ سرکاری کارمند چہ پگاراں زبھر کنگ بیتگ اَنت۔
بلوچ گلزمین ءِ اوبادگاں!
اے درسیں جاورانی زمہ وار پاکستانی مھترھند ءُ بلوچستان ءِ کاسگ چٹیں سرکار اِنت کہ مھترھند ءِ بلوچ دژمنیں شونداتاں یک ءُ ٹک منگ ءُ راج دژمنیں شوراں پرینگ ءَ اِنت پمیشکا بلوچ جیڑھانی دیمپان اِنت۔
چوناھیں ھم چاگردے بہ بیت پہ آئی ءِ تہ ءَ نندوکیں مردماں سیاست ءُ سیاسی کار مزنیں ارزشتے دار اَنت۔ سیاسی گل مردمانی واھگانی پد ءَ شوندات جوڑ کن اَنت ءُ آیانی سر ءَ کاربند بہ اَنت بلے پاکستانی مھترھند ءَ وتی کارمند کارگیپتگ ءُ پہ بلوچستان ءِ آجوئی ءَ کوشست کنوکیں بلوچ راجی زْرمبشت ( بی این ایم) ءِ سر ءَ ابید جار ءَ پابندی جتگ ءُ بلوچ نودربر گل آزاد ءِ سر ءَ بندش جتگ ، داں بلوچ چاگرد سنٹ بہ بیت۔گلانی سداں راھشون ءُ باسک شھید ءُ ھزاراں زور بیگواہ کرتگ داں اے مردمی جیڑہ جھان ءِ دیم ءَ مئیت۔
منگہ داریں بلوچ !
اے مردمی جیڑہ ءِ سر ءَ پہ بلوچستان ءِ آجوئی ءَ جھد کنوکیں گل بلوچ راجی زْرمبشت ( بی این ایم) ءَ باوستے ءِ ھلائینگ ءِ جار جتگ،اے باوست ءِ تہ ءَ گل ءِ جتائیں تک (رسانکدری تک ، مردمی اگبالانی تک ، گھبودی تک ، دری کارانی تک) ھمگرنچیں باوستے ھلائینگ ءَ اَنت داں بلوچستان ءِ جیڑہ جھان ءِ دیم ءَ شریں وڑے ءَ پدر کنگ بہ بیت ءُ بلوچ راج ءِ چہ جیڑھاں در کنگ ءَ جھان ءِ مردمگری جھ بہ جنت ءُ پاکستان ءِ راستیں چھرگ ءِ جھان ءِ دیم ءَ پدر کنگ ءَ کمک بہ رس ایت۔
بلوچ راجی زْرمبشت ( بی این ایم) راجی امانتے ، کہ ایشی ءِ روتگ بلوچ راج ءِ تہ ءَ اَنت۔بلوچ راجی زْرمبشت ( بی این ایم) ءِ مول آزات ءُ وشھالیں مھترھندے ءِ جوڑ کنگ اِنت ءُ ھما آزاتی ءُ وشھالی ءَ برجاہ دارگ ءِ پھتوئیں واھگ اِنت۔
بلوچ راجی زْرمبشت ( بی این ایم) ءِ باوست ءِ من ھم ھمیش اِنت کہ بلوچستان چہ جیڑھاں در بئیت ءُ بلوچ دومانداریں راجے ءِ بستار ءَ وتی زند ءَ بہ گوازین ایت۔بلوچ راجی زْرمبشت ( بی این ایم) ءِ اے باوست ءِ سوبمند کنائینگ ءَ بلوچ راج، نودربر، چاگردی رسانکدر ءَ پرکاریں باسک،سیاسی گلانی پجیگ ءَ درسیں پڑاں سیادی داروکیں مردماں دزبندی اِنت کہ اے باوست ءِ بھر بہ بہ اَنت ءُ اے جیڑہ ءِ بگیری ءَ وتی توانمندیں توار ءَ چست بہ کن اَنت پرچا کہ اے باوست ءِ سوبمندی بلوچ راج ءُ بلوچ چاگرد ءِ سوبمندی اِنت۔
منتوار
بلوچ راجی زْرمبشت ( بی این ایم )
