بیست ءُ ھپت مارچ دردناکیں زندے ءِ بندات
مڑاھداریں بلوچ!
بلوچستان ءَ ھمک روچ سیاھیں روچے پرچا کہ بلوچ ءِ زندمانی ءَ چوشیں روچے نہ گْوز ایت کہ زور بیگواھی ءِ ویلے مہ بیت، ژانگولیں کنٹے دست مہ کپ ایت، دورگیں میڑ ءُ مچی ڈنڈانی پارست ءَ بلوچ جھدکارے ءِ کھولے زھنی ءُ بالادی آزار دیگ مہ بیت۔ سرجمیں بلوچستان ءِ جاور انچوش اَنت بلوچ ءِ زندمانی ءَ شزار اِنت۔
بیست ءُ ھپت مارچ پہ بلوچ راج ءَ انچیں سیاھیں روچے کہ پاکستان ءُ آئی ءِ تْرامگیجاں بلوچ گلزمین گیپتگ ءُ بلوچ راج ’ربیدگ، چاگرد ، وانگ ءُ گزرانکی تک‘ ءَ نیزگاریں زندے ءِ گوازینگ ءَ لاچار کنگ بیتگ۔بیست ءُ ھپت مارچ اے دردناکیں زندمانی ءِ بنداتی روچ اِنت کہ ایشی ءَ بلوچ راج پجار ءِ جیڑہ ءِ دیمپان کرتگ۔ چہ اے دردناکیں زندمان ءَ در کپگ ءِ راہ بلوچ راجی آجوئی ءُ گھگیری اِنت۔ چہ گھگیری ءَ ابید ناں چہ دردناکیں زندمانی ءَ در کپگ بیتگ ءُ ناں کہ چہ پاکستانی زوراکی ءُ بے ننگیں زند ءَ ۔
باسمائیں بلوچ!
اگاں بیست ءُ ھپت مارچ ءَ راستی ءَ بہ چار ئے پدر بیت کہ دومی جھانی جنگ ءَ وھدے برتانیائی سرکار گزرانکی ءُ جنگ ءِ تک ءَ تاواناں دوچار بوت گڑا برتانیا ءِ مھترھند ءَ اے دمگ ءَ وتی بالادستی ءِ برجاہ ءَ دارگ ءَ ھندوستان بھر کرت ءُ چہ ھندوستان ءَ پاکستان رنگیں مھترھندے ودی کرت، کمک ءُ آسراتی دات ءُ گوں پندل ساچی ءَ بلوچ گلزمین پچ گیپت ءَ دات۔
گْوستانکی گْواچن ءُ دستاویز اے گپ ءَ منارین اَنت کہ 11 اگست 1947 ءَ برتانیا ءِ سرکار ءَ ناں ایوک ءَ بلوچستان ءِ آجوئی ءِ جار جتگ بلکیں بلوچستان ءِ آزاتیں بستار پاکستان ءُ برتانیا دوئیناں من اتگ۔گْوستانک گواچن کنت کہ بلوچستان ءِ آجوئی ءِ روچ ءَ ھان بلوچ میر اھمد یارھان ءَ گوں مردماں تْران کنان پہ بلوچستان ءِ ایمنی ءُ یکجاھی ءِ برجاہ دارگ ءَ دیمونی دیگ ءِ مسام ھم کرتگ۔
گلزمین ءِ پسگاں!
بلوچ راجی گْوستانک ءَ اے گپ نبشتہ اِنت کہ میراھمد یار ھان ءَ بلوچستان ءِ پہ کرایھی دیگ بوتگیں دمگانی پد گرگ ءَ پاکستان ءِ مزن واکدار مھمدالی جنا بلوچستان ءِ وکیل نامینتگ۔بلے چہ وتی دْروکنیں (دھوکا بازیں) ابرم ءَ لاچاریں پاکستان ءَ پندل کرت ءُ بلوچستان ءِ کرایھی گیپتگیں دمگانی واتر کنگ ءِ جاہ ءَ میراھمد یار ھان ءِ دیم ءَ گوں پاکستان ءَ ھوار بیگ ءِ پیشنھاد ایر کرت کہ بلوچستان ءِ جھلی پارلیمان ءُ برزی پارلیمان ءَ رد کرت ءُ گوں پاکستان ءَ ھوار بیگ ءِ بگیری ءَ جنگ ءُ گھگیری ءِ جار ھم جت۔
گلزمین ءِ گیدریں پسگاں!
پندلانی دْرچ دراج بیان بوت ءُ گڈسر ءَ 17 مارچ 1948 ءَ لسبیلہ، ھاران ءُ مکوران ءِ استان گوں پاکستان ءَ ناراھی ھوار کنگ بوت اَنت ایشی ءِ بگیری ءَ بلوچ راج ءَ ترندیں گھگیری کرت ،پاکستان ءَ 27 مارچ 1948 ءَ کلات ءِ سر ءَ لشکرکشی کرت ءُ بلوچستان زور گیپت ، سیاسی باسک دزگیر کنگ بوت اَنت۔ ھما روچ ءَ پرکاریں سیاسی گل کلات اسٹیٹ نیشنل پارٹی ءِ سر ءَ پابندی جت، اے ناراھی ءُ در مردمی کارانی بگیری ءَ آغا عبدالکریم ءِ سروگانی ءَ گھگیری ءِ بن ھشت ایر کنگ بوت ، کہ گوں رد دیگ ءَ آسر کنگ بوت۔
بلوچ راج ءِ گْوستانک گھگیری گْوستانکے، کہ آئی ءَ زورگریں پرتگال ءَ بہ گر داں زورگریں انگریز ءِ بگیری ءَ گھگیری ءِ راہ گچین کرتگ ءُ وتی راجی پجار پھریز اتگ۔ھان مھراب ھان کہ آئی ءِ گھگیری مروچی ھم گْوستانک ءِ بھر اِنت، آئی ءَ دیمونی داتگ ءُ وت ءَ پہ مدامی ابدمان کرتگ۔مروچی ھم ھزارانی کچ ءَ بلوچ ورنا پاکستانی آزار جاھاں دردناکیں زند گْوازینگ ءَ اِنت۔سداں بلوچ سیاسی ئیں گھگیر شھید کنگ بیتگ ءُ مروچی ھمے گھگیری ءِ پد ءَ جھدکارانی کھول مچی ڈنڈ دیگ بیگ ءَ اَنت کہ پہ پاکستانی مھترھند ءِ پْروش ءَ مناک اِنت۔
بلوچ گلزمین ءِ پشتپداں!
مئے پیر ءُ کماشاں ھمک باریگ ءَ گھگیری گچین کرتگ ءُ وتی پجار ءُ راجی مڑاہ پھز اتگ۔مروچی ھم مئے راج ’پجار ءُ مڑاہ‘ ءِ سبزینگ ءِ جھد کنگ ءَ اِنت۔مروچی مئے زمہ واری بیت کہ ما پہ وتی راجی آجوئی ءَ گھگیری ءِ راہ ءَ گچین بہ کن ءُ وتی راجی آجوئی ءِ الم کنگ ءَ سیاسی ءُ گھگیری کنوکیں گلانی بھر بہ بہ این ءُ پہ آیانی مھکم کنگ ءَ وتی کرد ءَ پیلو بہ کن ایں۔
