بی این ایم ءِ پنتاک » یازدہ اگست : ما وتی آجوئی ءِ شادمانیاں پد ءَ بہ گند ایں
منگھیں بلوچ راج!
ھندوستان ءِ بھر ءُ بانگ ءَ پیش 4 اگست 1947 ءِ روچ ءَ ھندوستان ءِ وائسراءے لارڈ ماؤنٹ بیٹن گوں مھمد الی جنا ءُ ھان کلات اھمد یار ھان ءِ ھمراھی ءَ نشت ءُ بلوچستان ءِ آجوئی ءِ مسام ءِ سر ءَ ، پت بوت اَنت ءُ بلوچستان ءِ آجوئی ءِ کاگدانی سر ءَ دزرند اش جت ءُ 11 اگست 1947 ءِ روچ ءَ بلوچستان ءِ آجوئی ءِ روچ منگ بوت۔ ھمے مسام ءِ رد ءَ بلوچستاں اے دمگ ءَ آجو ءُ وتواجھیں ڈیھے ءِ دْروشم ءَ سھرا بوت ، آئی ءِ آجوئی ءُ وتواجھی وتگڑیں مھترھند (ریاست ) پاکستان ءَ ھم من اِت۔ وھدے اے جار چہ دھلی ءِ ریڈیو ءَ شِنگ ءُ تالان بوت گُڑا ھان اھمد یار ھان ءَ 15 اگست 1947 ءَ آدینگ ءِ نماز ءَ پد آجوئی ءِ سرجمیں جار پرینت ءُ بلوچستان ءِ بیرک گوں پھر ءُ شانے مک کرت۔
11 اگست 1947 ءَ بلوچ سرڈگار چہ انگریز ءِ سدسالی زیردستی ءَ آجو بوت ءُ جتائیں پجارے ءِ واھند بوت، پمیشکا اے روچ پہ بلوچ راج ءَ ’سوگند سرسبزی ‘ ءِ روچ زانگ ءُ پجارگ بیت۔ اے روچ ءَ مئے پیر ءُ کماشاں مسام ءُ سوگند کرتگ اَت کہ آ وشھالیں بلوچستانے جوڑ کن اَنت کہ درامدانی زیردستی ءَ آجو بیت بلے اے آجوئی داں دیراں برجاہ نہ بوت ءُ زورگریں پاکستان ءَ 27 مارچ 1948 ءَ بلوچستان ءِ زیردست کرت کہ مرچی ھپتاد ءُ پنچ سال اِنت کہ پاکستان انگت گوں زوراکی ءُ لٹ ءُ پلاں پہ مئے گار ءُ گمسار کنگ ءَ چابک اِنت۔
بلوچ راج ءِ پسگ!
ھما روچ ءَ کہ زورگِریں پاکستان ءَ پہ زور مئے ماتیں گلزمین زیردست کرت داں مروچی دیمونی ءِ دْرچ یکشل ءَ برجاہ ءُ بھ تم نہ بوتگ، پر کہ بلوچ راج سوھو ءُ سرپد اِنت کہ منی مانشت ءُ گھیں باندات ءِ مانزمان منی گلزمین اِنت، ءُ پہ گلزمین ءِ موکگ ءُ آجو کنگ ءَ دیمونی ھژدری اِنت دانکہ آیوکیں پدریچ آجو ءُ اِیمنیں زِندے بہ گوازین ایت۔
گھیں بلوچ راج!
زُورگِریں پاکستان مروچی ھم پہ مئے پِلکّگ ءَ گوں وتی نوکابادء شونداتاں دیم ءَ جزان ءُ ڈیھ ءِ ھرچ گْرانبھائیں مال ءُ مڈّیاں لِیلام کنگ ءَ اِنت۔ اے مال ءُ مڈیاں ابید ھروچ پہ مئے لج ءُ ننگ ءِ لپاشگ ءَ روچے میتگے ءَ لشکرکشی کنگ ءَ اِنت دانکہ بلوچ راج وتی ھستمان ءَ ببا بہ دنت ءُ مُجّتی پنجاب ءِ زیردست بِہ بیت، بلے بلوچ ورناھاں سما کرتگ ءُ آئی ءِ ھونواریں لشکر ءِ دیم پہ دیمی ءَ جنگ کنگ ءَ اَنت دانکہ ما وتی راجی ھستمان ءُ گلزمین ءَ بِہ رکین این ءُ دژمن ءَ چر اے سِیمسراں در بہ کن ایں۔
اے راستے کہ پہ دژمن ءِ اَچ وتی ڈیھ ءُ سِیمسراں گلینگ ءَ مارا وتی راجی توان مگیم کنگی اِنت دانکہ آئی ءَ را پروش بِہ دے این ءُ چہ وتی سرڈگار ءَ بہ گلین ایں، پمیشکا اے ڈبہ ءُ زِمہ واری تھنا گل ءُ پارٹی یے نہ اِنت، بلکیں اے تانسریں بلوچ راج ءِ ڈبہ ءُ زِمہ واری اِنت کہ آ وتی توان ءُ بود ءِ رِد ءَ دژمن ءِ بگیر ءَ پاد بئیت وتی راجی گل ءُ پارٹیانی ھمراہ ءُ ھمگام بِہ بیت دانکہ ما شما پد ءَ گوں وتی آجوئی ءِ شادمانیاں دوبر شات ءُ اِیمن بہ بہ ایں۔
مڑاھداریں بلوچ راج!
اے جنگ مئے ھستمان ءُ رژنائیں باندات ءِ جنگ اِنت، اے جنگ پہ آیوکیں پدریچ ءَ اِیمن ءُ وشھالی مستاگ اِنت۔ اے راستے کہ جنگ زوال ءُ تباھی کار اِیت، بلے جھان ءِ کنڈ کنڈ ءَ کہ مروچی آجو ءُ ایمنیں ڈیھے گِندگ بیت آ ھمے گھگیری، جھد ءُ جنگ ءِ برورد اِنت کہ بھشت ءِ چھرگ ءَ جن اَنت۔
ما ھم پہ راجی زِندمان ءِ ساٹگ ءَ اے جنگ ءِ تہ ءَ مانداتگ ءُ وتی باندات ءَ پولگ ءَ اِیں دانکہ اے جلگھیں گیدی ءِ دمکاں گار ءُ گمسار مہ بَہ اِین ءُ بلوچ راج ءِ بستار ءَ وتی جِند ءِ گُلزمین ءِ سر ءَ زندگ ءُ ھست بہ بہ اِیں، گُڑا پہ ما ھژدری اِنت کہ ما گوں دژمن ءَ بِہ مڑ این ءُ وتی ایردستیں سرڈگار ءَ آجو بہ کن اِین ءُ پہ ھرچ وڑیں دیمونی دیگ ءَ چک ءُ پد مہ بہ اِیں۔
بلوچ راجی زْرمبشت ( بی این ایم)
