13 نومبر 1839 : گْوستانک ءِ ھون چکاریں روچ

1839 ءِ سال ءَ برتانیا ءِ واکداراں وتی واک نزوریں راجے ءِ بگیری ءَ کارمرد کرت ءُ آ سدانی سال ءِ زیردستی ءِ گر ءَ تیلانک دات

کازی داد مھمد ریھان

دلگوش : دانکانی بزانت ءَ گڈسر ءَ داتگ اَنت۔

جھان ءِ دودمانی پدمنتگی ءَ نوک آبادی توانانی مزنیں دستے گون اِنت۔ دگرانی زمین ءُ مڈیاں پلگ ءِ آیانی واھگ ءَ مردم چہ دودمانی دیمروئی ءِ دگ ءَ گسر کرت ءُ مزنیں کچے ءَ بیرانی آروکیں جنگ ابزار ( سلاہ ) ءُ پروش نہ وروکیں لشکر ٹاھینگ ءِ سکین دات اَنت۔نی ما اد ءَ ایں کہ جھان ءَ 12512 ایٹم بم ھست اِنت ءُ اگاں چہ دہ ءَ بہ گر سد ایٹم بم ھم آس دیگ بہ بیت جھان سرجم ءَ تباہ بیت۔ بزاں تیوک ءَ پاکستان سرجمیں جھان ءَ تباہ کرت کنت کہ آئی ءِ گْور ءَ 170 ایٹم بم ھست۔

بلوچستان ھم برتانیائی سامراج ءِ جھان ءِ مڈیانی دستیگ کنگ ءِ واھگ ءِ ارجان بوت۔ 1839 ءِ سال ءَ برتانیا ءِ واکداراں وتی واک نزوریں راجے ءِ بگیری ءَ کارمرد کرت ءُ آ سدانی سال ءِ زیردستی ءِ گر ءَ تیلانک دات۔پمیشکا کہ آ وتی ھمساھگیں ڈیھ ءِ بگیری ءَ وتی سرزمین ءِ کارمرد کنگ ءَ ساڑی نہ بیتگ۔

مروچی وھدے ما سال 1839 ءِ بلوچستان ءِ بارہ ءَ جیڑ ایں ، مئے گمان ءَ آ زمانگ ءَ بلوچستان گیشتر پدمنتگ بیتگ بلے چہ گْوستانکی گاگد ءُ کراچاں ھمے زانگ بیت کہ بلوچستان ھما باریگ ءِ ھم تنگ ءَ پدمنتگ نہ بیتگ۔بلوچستان ءِ بادشاہ لال شھمیر مھراب ھان 1816 ءَ واکدار بوت۔واجہ بلوچستان ءِ بیست ءُ ششمی ’ ھان بلوچ ‘ اَت۔بلوچ ٹک گوں وتی بے دروریں ھم سنتی ءِ پارست ءَ گْوستانک ءِ بنداتی بلوچ مھترھند ( ریاست) ءِ بن ھشت ایر کنگ ءَ سوبمند بوت اَنت۔دمگ ءِ مزنیں واک ءُ نوک آبادی گر ءُ چیلانی زمانگ ءَ وتی وتواکی ءِ درشان ءَ بلوچ واکداراں وتی سرکار ’ بلوچی سرکار‘ گْوشتگ اَت، بزاں مھترھند ءِ مزن واک ءِ مانزمان بلوچ راج اَت۔ساراوان ، کچ گندواہ ، جھلاوان ، لس ءُ مکوران بلوچستان ءِ پنچ استان اَت اَنت ءُ جھل ءَ پہ ڈیھ ءِ سرکاری کارانی تْرامینگ ءَ ھنکین (اضلاع) جوڑ کنگ بیتگ اَت۔ڈیھ ءِ وزیری اگدہ سردارانی جاہ ءَ وانندگ ءُ سوگھیں مردماں گون اَت اَنت۔پشت ماں پشتی واکداری ءِ پد ءَ بلوچ ءِ ھانانی تہ ءَ سیاسی ءُ چارگزاری پھتوئی آیان اَت۔ بلوچ ءِ ھانانی پچ ءُ پوشاک ءُ چہ آیانی سیاسی دید ءُ زانت ءَ آیانی دیمروئی دوستی ءِ جلشک سھرا اَت۔ماں جھان ءَ پہ راجی مھترھند ءِ جوڑ کنگ ءَ آیانی دیدانک گیش اتگ اَت ، کہ چہ آیانی اوگام ، کرد ءُ کاراں پدر اَت۔پمیشکا آیانی سروکی ءَ بلوچستان ءِ باندات رژنا اَت۔ بلے دمگ ءَ بیوکیں مٹی ءُ انگریزانی دمگ ءِ تہ ءَ دلچسپیاں بلوچستان جیڑھانی آماچ کرت۔اد ءَ اے گپ دلگوش کرز اِنت کہ جھان ءِ دگہ بادشاھانی پیم ءَ ھان بلوچ ءِ دربار ھم پندلانی بنجاہ اَت۔در ملکی وزیرانی سر ءَ ھم بلوچی سرکار ءِ نزور کنگ ءِ بھتام اَت اَنت۔بلے پہ بلوچی سرکار ءِ داشت ءَ ڈیھ ءِ تہ ءِ ترس چوش مزن نہ اَت اَنت کہ چہ آیاں ھان بلوچ پروش بہ وارت یا پہ آئی ءِ واکداری ءَ مزنیں جیڑہ ودی بہ بیت۔

1834 ءَ انگریزاں اوگانستان ءِ شاہ شجا ءِ بادشاھی ءِ پد گرگ ءَ آئی ءِ کمک کنگ ءِ شور کرت۔اوگانستان پہ آیاں دگہ نوک آبادی واکاں چہ ھندوستان ءِ سیمسراں دیر دارگ ءَ ارزشتمندیں جاھے اَت ءُ پہ آ اود ءَ سربیگ ءَ آیاں بلوچستان ءِ واکدارنی پلہ مرزی ءُ بلوچ زمین پکار اَت۔ برتانیا ءِ لیپٹیننٹ لیچ کلات ءَ دیم دیگ بوت داں چہ ھان بلوچ ءَ کمک بہ گیپت بلے ھان بلوچ پہ اوگانستان ءِ سر ءَ ارش ءَ وتی زمین ءِ دیگ ءَ ساڑی نہ بوت۔ آئی ءِ دید اَت کہ شاہ شجا ابید چہ انگریز ءُ ڈنی مردمانی کمک ءَ وتی بادشاھی ءَ پد بہ گیپت۔پمیشکا لیچ ءُ ھان بلوچ ءِ میان ءَ مسام ءِ کوشست بے سوب بوت بلکیں بلوچاں انگریز لشکر ءِ راہ بست ءُ آیانی سر ءَ ارش ھم کرت۔

انگریزاں پد ءَ ھان بلوچ ءِ ٹاھینگ ءِ کوشست کرت۔ سرالیگزنڈر برنس پہ مسام بندی ءَ کلات ءَ اتک داں ھان بلوچ ءَ بہ منارین ایت کہ آ شال ءَ بہ روت گوں شاہ شجا ءَ دوچار بہ کپ ایت۔ آئی ءَ گْوشگ بیتگ اَت کہ آ اوگانستان ءِ سر ءَ شاہ شجا ءِ واکداری ءِ اگبال ءَ بہ من ایت ، شال ءَ بہ روت ءُ گوں آئی ءَ دوچار بہ کپ ایت ءُ آئی ءَ منگہ بہ دنت۔اے لوٹ ھان بلوچ ءِ کم منگھی ءُ بلوچی سرکار ءِ وتواکی ءِ بگیر اَت۔ ھان بلوچ ءَ ھچ وڑیں پد ءُ پیش نہ چار اِت ءُ اے لوٹ رد کرت۔انگریزاں بلوچی سرکار ءِ اے شور بے وپائی ءُ بدگمانی گْوشت ، ھان بلوچ انگریزانی دژمن لیک اِت ءُ آئی ءَ ڈنڈ دیگ ءِ شور کرت۔

چہ ایشی ءَ پیش ھم بازیں باوستانی پارست ءَ انگریز بلوچستان ءِ وتواکی ءُ آئی ءِ آجوئی ءِ بگیری ءَ پندل ساچگ ءَ اَت اَنت۔ نی آیاں نیمونے رس اتگ اَت کہ آ ھان بلوچ ءَ چہ واکداری ءَ یک کر بہ کن ءُ اد ءَ وتی کاسگ چٹیں واکدارے بہ نندارین اَنت۔سرتامس ولشائر ءِ بریگیڈ چہ کابل ءَ ھندوستان ءَ واترگ ءَ اَت، ھمائی ءِ گلے ءَ کلات ءِ سر ءَ ارش کنگ ءِ پرمان رس اِت۔

انگریزانی لشکر ءَ 13 نومبر ءَ کلات انگر کرت ءُ گوں ٹوپاں کلات ءِ دیوال ڈرینت اَنت۔ھان بلوچ گوں ھپت سد سپاھیگاں گوں انگریزاں دیم پہ دیم بوت۔آ گوں ناترسی ءَ مڑ اِت۔آئی ءِ بالاد ءَ 35 ٹپ پر اَت بلے پد ءَ ھم گوں وتی زھم ءَ دشمنانی سر ءَ بیڑ برگ ءَ اَت ، ھمے میان ءَ ولشائر ءَ آ گوں توپگ ءَ نشانگ کرت۔ 13 نومبر 1839 ءِ نیم روچ ءَ ھان بلوچ مھراب ھان شھید بوت ءُ گوں آئی ءِ ھوناں بلوچستان ءِ سھر ءُ شینزیں بیرک ’ ریٹو ‘ بوت۔

اے میڑ ءَ ابدل کریم رئٛیسانی، سردار ولی مھمد شاھی زھی مینگل ، میر تاج مھمد شاھی زھی مینگل ، میر مھمد الی شاھی زھی مینگل ، میر پزل مھمد، سردار زمان ھان پندرانی، میردادکریم چندوزھی شاھوانی، میرشھباز ھان نیچاری، میربدل ھان نیچاری، ھان مھمد دھوار شھر کلات ءِ مستر، میرنبی بکش جتوئی نرمک کلات ءِ نندوک ، میرکیسرھان بزنجو ، میر شاہ دوست بزنجو ، مھمد رزا وزیر ھیل ، نورمھمد شاھی ولد پولات سگار سرمستانی جنگ ابزرانی انبار دار ، تاج مھمد شاگاسی، گنج وزیر دیوان بچا مل ۔ دیوان کیم چند ، دیوان آسرداس ھندو پنجائیت کلات ءِ مکی ءُ دگہ 400 بلوچ شھید بوت۔

اے جنگ ءَ بلوچاں پروش وارت ءُ بلوچستان ءِ زیردستی ءِ شول کشیں باریگے بنا بوت۔ بلے مروچی 193 سال گْوزگ ءَ پد ھم بلوچ لال شھمیر مھراب ھان ءَ پرمنگھی یات کن اَنت کہ آ کم مردم ، شنگ ءُ شانگیں آبادی ءُ مزنیں سرڈگارے ءِ سر ءَ تالانیں ڈیھے ءِ دیمپانی ءَ گوں وتی کسانیں لشکر ءَ آ زمانگ ءِ جھان ءِ مزن توان ءِ دیم ءَ میلانک بوت۔ مزن توان ءَ باج برت۔ آئی ءَ بلوچ ءَ نہ کرگ ءِ مزنیں ڈنڈے دات بلے ماں گْوستانک ءَ لال شھمیر مھراب ھان وژنام بوت۔

ما واجہ ءِ شھمیری روچ ءَ سجھیں بلوچ شھمیراں یات کن ءُ درسیں بلوچ شھمیرانی ستا شانی ءَ کن ایں کہ آیاں پہ گلزمین ءِ دیمپانی ءُ آجوئی ءَ وتی ساہ نْدر کرتگ اَنت۔

بلوچ راجی زْرمبشت ( بی این ایم )

لھتے دانکانی بزانت

ھون چکار : ھون ءَ پر
گْوستانک : تاریخ
ھم تنگ : برابری / ھم ھساب
گر: کھائی
نوک آبادی توان : نوآبادی طاقت ، کالونیل پاور
دگ : راہ
گسر کنگ : گار کنگ
جنگ ابزار : سلاہ ، ہتھیار
ڈیھ : ملک
مڈی : دولت

گاگد ءُ کراچ : دستاویز
سھرا : ظاہر
دیدانک : موقف
اوگام : نعرہ
دلگوش کرز : توجہ طلب
بھتام : الزام
پروش : شکست
ساڑی بیگ : راضی
شھمیر : وژنام مرگ ، شھید
مزن توان : سپرپاور

ٹک : قبیلہ
پارست : ذریعہ
مھترھند : ریاست
درشان کنگ : بیان کنگ
مانزمان : ضامن
استان : صوبہ
تْرامینگ : انتظام کنگ
ھنکین : ضلع
واکدار : حاکم
واکداری : حاکمی

مزن واک : اقتدار اعلی
چار گزرای : انتظامی
پھتو : پختہ
پندل : سازش
بنجاہ : مرکز
داشت :استحکام
سیمسر : سرحد
پلہ مرزی : حمایت
مسام : معاہدہ
اگبال : حق

منگہ : عزت ، شرف
باوست : مھم
نیمون : بہانہ
کاسگ چٹ : کاسہ لیس
گل : مردم یا لشکر ءِ بھرے
بیڑ برگ : حملہ کنگ
شینز : سبز ، Green
ریٹو : سھر
میلانک بیگ : دیم ءِ دارگ
ڈنڈ : سزا

جلشک : عکس
سجھیں : کل ، درس
ستا شانی : خراج تحسین
دیمپانی : دفاع
پندل ساچگ : سازش جوڑ کنگ
گنج وزیر : وزیر مال ، وزیر خزانہ

Share This Article
بی این ایم ءِ جارکش۔ کازی داد مھمد ریھان بی این ایم ءِ رسانکدر ءُ ربیدگی کارگشاد اِنت۔آئی ءَ 2008 ءَ بہ گر داں 2009 ءَ ماں گل ءِ گْوستانک ءَ اگدہ دارنی پتر ءِ چہ درساں کستریں باسک ءِ بستار ءَ ھمے اگدہ ءِ سر ءَ کار کرتگ۔ھمے میان ءَ آئی ءَ زرمبش شنگکار جوڑ کرتگ۔ سال 2015 ءَ زْرمبش شکسار جوڑ کرت ءُ آئی ءِ بنگیجی تْرامکار ءِ بستار ءَ کار کرت۔اپریل 2022 ءِ سیشن ءَ پد ءَ رسانکدری کارگشاد گچین بیتگ۔