گھیں بلوچ راج!
گوادر بلوچستان ءِ گْوستانک ءُ زمین ءِ درگت ءَ ارزش داریں شھر اِنت کہ آئیءِ جاہ مننداں میر ھمل کلمتی ءِ کمان ءَ زوراکیں پرتگیزانی دیم داشتگ ءُ چہ اد ءَ کش اِتگ۔ اے ھمے گپ ءِ گواھی اِنت کہ کْوھنیں زمانگ ءَ بہ گر داں نوکیں دور ءَ گوادر پہ میان استمانی واکاں اسٹریٹیجک ءِ رد ءَ ارزش داریں شھرے بوتگ۔
اسکندر ءَ بہ گر داں مھمد بن کاسم ، پرتگیز ءَ بہ گر داں برتانیا ءُ مروچی چین ، امریکہ، روس ءُ جھان ءِ اے دگہ زوراکانی چم گوادر ءَ سک اَنت ، پرچا کہ گوادر وتی جھلیں زر ءِ سبب ءَ جھان ءِ واپاری ارزش داریں راھداری اِنت۔ گوادر ءِ ارزشت ءِ اندازگ چہ امریکی جیالوجیکل سروے ءِ ھمے رپورٹ ءَ کنگ بیت کہ آئی ءِ تہ ءَ آیاں گوادر ءَ را نوکین ءُ جھلیں آپ ءِ بندن ءِ آئیڈیل لوکیشن گْوشتگ۔
پرمنگھیں بلوچ راج!
گوادر مروچی چین ءُ پاکستانی زوراک ءِ پندل ءُ لٹ ءُ پلی شورانی کمک ءَ پاکستان چین گزرانکی راھداری (سی پیک) ءِ نام ءَ پہ بلوچاں نو گو ایریا جوڑ بوتگ۔ سی پیک شور ءِ بنگیج ءَ پد بلوچستان ءِ جتائیں ھنداں ھون ءِ شھجو تاچینتگ، زالبول، زھگ، پیر ءُ ورناھانی ابید چہ آمیدگس ءِ پرمان ءَ گرگ ءُ کشگ ءِ دْرچ بندات کرتگ کہ داں روچ ء مروچی برجاہ اِنت۔ گوادر ءِ جند ءِ گچینی ئیں ورناہ چین ءُ پاکستانی زورگری ءِ دیمون بوتگ اَنت۔ لٹ ءُ پلی شور دیمروئی ءُ وشھالی ءِ شور گْوشتگ اَنت ءُ گوادر ءِ دریاوردانی گزرانکی کوش ءُ ھونریچی بوگ ءَ اِنت ، چوش کہ گوادر ءِ نیزگاریں مردم پہ آپ ءِ ترمپے ءَ تلوسگ ءَ اَنت۔
مراھداریں بلوچ راج!
سی پیک پہ پاکستان ءُ چین ءَ گزرانکی وشھالی ءِسبب بیت کنت ، بلے پہ بلوچ راج ءَ مرگ ءِ گواجار اِنت۔ اے شور ءِ کمک ءَ لکانی ھساب ءَ چینی ءُ اے دگہ مردمانی ماں گوادر ءَ آباد کنگ ءِ پندل سازگ بوگ ءَ اِنت۔ پہ اے بلوچ کشیں پندل ءِ سرجم کنگ ءَ ’ Save City ‘ ءِ نامگپتیں شور ءِ جاک ءُ جلل بوگ ءَ اِنت۔ سیپ سٹی پہ کے ءَ؟ گوادر ءِ مردماں چہ کے ءَ ترس ءُ بیم؟ پاکستان ءُ چین ءِ زوراکیں ریاستاناں گوادر ءِ مردمانی گم چہ کدیگ ءَ پر بوت؟
باسمائیں بلوچ راج!
یک زورگریں ریاستے گوں دومی زوراکیں ریاست ءِ ھمدستی ءُ چیردستیں راجے ءَ را چوں دیمروئی دات کنت؟ جھان ءِ آشنائیں گْوستانک ءَ داں روچ ء مروچی اے وڑ بھ نہ بوتگ۔ اگاں آ رومن ایمپائر بہ بیت، ھندوستان ءِ سر ءَ انگریز ءِ زورگری بہ بیت یا الجزائر ءُ اے دگہ اپریکی ڈیھانی سر ءَ پرانس ءُ پرتگال ءِ زورگری، لاتینی امریکہ ءِ ڈیھانی سر ءَ اسپین ءِ زورگری، آ اود ءَ دیمروئی داتگ یا آیانی مال ءُ مڈی پل اِتگ اَنت؟ زوراک ھمے سرپد بیت کہ آ گوں وتی وش کنوکیں اوگاماں گوادر ءِ اے باسمائیں مھلوک ءَ بڈ ایت کہ آیاں پرتگیز ءُ اومانی زورگرانی بگیر ءَ جھد کرتگ۔
گوادر ءِ چپ ءُ چاگرد ءَ ٹٹ جنگ ءِ کوشست راستی ءَ گوادر ءِ مردمانی سیاسی ءُ راجی سما ءِ دیم ءَ زورگریں پاکستان ءِ پروش ءِ مناک اِنت۔ اے سید زھور شاہ ھاشمی ءُ ابدل مجید گوادری ءِ پشت پدانی بیم ءِ نشانی اِنت۔
ھمل جیھند ءِ پسگاں!
بلوچ راج ءَ ھرچ لٹ پل ءُ زورگر ءِ گوں بھادری ءَ دیم داشتگ ، برے ھمل بوتگ ءُ برے گوک پروش ءِ میدان سمبھینتگ۔ ستک اِنت کہ مروچی ھم بلوچ راج، پوریاگر، دریاورد، شوانگ، استاد، نودربر، واپاری، ازمکار، زانتکار ءُ اے دگہ تکانی مردم یکیں لڑ ءَ اوشت اَنت ءُ وتی زر ءُ گواجنانی پھازگ ءَ ھر پڑ ءَ اے رپک ءُ پندلانی دیمپانی ءَ کن اَنت۔ ھمل جیھند ءِ گْوستانک ءَ یک برے پد ءَ زندگ کن اَنت۔ پاکستانی لشکر ءِ سیاسی چریکانی دْروشم ءَ ودی بوتگیں کاسگ چٹ (کاسہ لیس) ، گلزمین ءِ ننگ ءِ لپاشوکانی کمکاراں نہ من اَنت۔
بلوچ راجی زْرمبشت ( بی این ایم )
