شال : بلوچ راجی زْرمبشت ( بی این ایم ) ءَ 2025 ءِ بنداتی روچ ءَ گوں اھوالکاراں پر ارزشتیں بنگپاں نیادے ایر کرتگ ، اے نیاد ءِ تہ ءَ ماں بلوچستان ءَ مردمی اگبالانی ناگیگیں جاورانی سر ءَ چمشانک دیگ ءُ پہ نوکیں سال ءَ بی این ایم ءِ واھگ ءِ درشان کنگ بیتگ۔
اے اھوالکاری نیاد چہ بلوچ راجی زْرمبشت ( بی این ایم ) ءِ رسانک ءُ ربیدگی کارگشاد کازی داد مھمد ریھان ءِ نیمگ ءَ پیش کنگ بیتگ ءُ آئی ءِ پجیگ ءَ بی این ایم ءِ مردمی اگبالانی تْرامگیج پانک ءِ راھوتکار ھاتم ھم گون بیتگ۔
اے نیاد ءِ میان ءَ بی این ایم ءِ مستریں کمک سرکماش ڈاکٹر جلال ءُ بی این ایم ءِ دری کارانی تک ءِ کمک راھوتکار نیاز ءَ ھم بھر زرتگ ءُ گوش داروکانی جستانی پسو داتگ اَنت۔
’ راج باور بہ دار ایت ، سپارتی تک ءَ شپ ءُ روچ کار کنگ ءَ ایں ، نیاز ‘
بی این ایم ءِ دری کارانی تک ءِ کمک راھوتکار نیاز ءَ بی این ایم ءِ سپارتی کوشستانی بارو ءَ سرپدی دیان ءَ گْوشتگ بی این ایم ھمک پھنات ءَ کار کنگ ءَ اِنت۔ سپارتی کار سکا دلسیاھی ءُ اوپار لوٹ اَنت۔ چہ رسانک ءِ دیم ءَ اتکگیں کارکرداں گیشتر کار کنگ بیتگ بلے سپارتی دود ءُ جاورانی رد ءَ ما انی لھتے کارانی بارہ ءَ گْوشت نہ کن ایں۔بلوچ راج باور بہ کنت ، بی این ایم ءِ باسک پہ وتی راجی من ءُ مولاں شپ ءُ روچ کار کنگ ءَ اَنت۔
’ بی این ایم ءِ آشوبی باسک پہ چیدگیں آزاد بلوچستان ءَ جھد کنگ ءَ اَنت۔ ڈاکٹر جلال ‘
بی این ایم ءِ مستریں کمک سرکماش ڈاکٹر جلال ءَ گْوشتگ ، بی این ایم لیکھی گلے۔ما زان ایں کہ چیدگ ءُ شریں مھترھندے ءِ جوڑ کنگ آسانیں کارے نہ اِنت۔اگاں مروچی بلوچستان آجو بہ بیت ھم ما اے گپ ءِ لوٹوک ایں ، بلے بی این ایم ءِ آشوبی کیڈر پہ الکاپ ءُ چیدگیں مھترھندے ءَ وتی کوشستاں برجاہ دار اَنت ءُ گوں آشوبی لیکھے ءَ جھد کن اَنت داں بلوچستان مردمی بستار ءَ ھم آجو بہ بیت، مردماں مزدانک ، برابری ءُ آجوئی بہ رس ایت۔
’ زریپ ءِ زبان برگ، لٹ دیگ ءُ کشگ بیتگ۔کازی ریھان‘
اھوالکاری نیاد بی این ایم ءِ رسانک ءُ ربیدگی کارگشاد کازی داد مھمد ریھان ءَ گوں انیگیں جاورانی سر ءَ گپ ءَ بندات کرت، آئی ءَ ماں بلوچستان ءَ مھترھندی زوراکی ءُ برجاھیں بلوچ چکچینی ءِ بارہ ءَ گْوشتگ۔ آئی ءَ گْوشتگ چکچینی تیوک ءَ کشت ءُ کوش نہ اِنت بلکیں بلوچ راج ءَ چہ آئی ءِ زمین ، زبان ، ربیدگ ءُ پجار ءَ زبھر کنگ ءِ شورے۔
اے نیاد ءَ گْوشگ بیتگ کہ دسمبر 2024 ءِ ماہ ءَ ، پاکستانی لشکر ءَ 22 کس زور بیگواہ کرتگ ، زریپ ء ھومر ءِ زندانی کوش ءِ درور دیان آئی ءَ گْوشتگ کہ چوں پاکستانی لشکر ءَ آئی ءِ زبان بر اتگ ، لٹ داتگ ءُ کشتگ۔
زریپ ءِ ویل پاکستانی لشکر ءِ زوراکیانی درور لیکگ ءُ دیمتر ءَ گْوشگ بیتگ کہ چہ پیم اے کھول یکشل ءَ ترس ءُ بیھار دیگ بیتگ ءُ گڈی ءَ زریپ زندان کوش کنگ بیتگ۔
ماں اھوالکاری نیاد ءَ بی این ایم ءِ مردمی اگبالانی تْرامگیج ’ پانک ‘ ءِ گزارش ءِ بن شون ءَ گْوشگ بیتگ کہ دسمبر 2024 ءَ پنچ مردم کشگ بیتگ۔ چہ ایشاں سئے بلوچ سرمچار بیتگ اَنت کہ ڈرون ءِ سر ءَ جنگ ءُ کشگ بیتگ اَنت۔
بی این ا یم ءَ بلوچستان ءَ برجاھیں بلوچ سرمچارانی سلاھبندیں گھگیری آجوئی ءِ زْرمبشت لیک اتگ ءُ گْوشتگ داں ھما وھد ءَ کہ پاکستان ءِ زورگری برجاہ اِنت ، ھمے پیم ھون ریچی بیت ۔
’اوگان سرکار ءِ دیدانک ستا کرز ایت، ایران ءُ اوگانستان وانڈوئیں بلوچاں کمک بہ کن اَنت‘
بی این ایم ءَ چہ سیمسر ءَ ڈن پاکستانی لشکر ءِ ارشانی سر ءَ ھم گپ جتگ ، کہ آیانی تہ ءَ وانڈوئیں بلوچ نشانگ کنگ بیتگ اَنت۔ آئی ءَ ماں اوگانستان ءَ وانڈوئیں پشتونانی سر ءَ ارش ھم پاکستان ءِ ناراھی ءُ میان استمانی راھبندانی بگیری لیک اتگ۔
بی این ایم ءَ چہ پاکستانی زوراکیاں شزار ءُ پہ وتی سرانی پھریزگ ءَ اوگانستان ءَ پناہ زرتگیں واںڈوانی بارہ ءَ انیگیں اوگان سرکار ءِ دیدانک ستا داتگ ، بلے آئی ءَ ھمساھگیں ڈیھ ایران ءُ اوگانستان ءَ بلوچ وانڈوانی جاورانی گھتری ، گیشتر دلگوش ءُ کمک ءِ لوٹ کرتگ۔ آئی ءَ گْوشتگ پاکستان گوں ترندی ءَ نابکار، باڑھی کشندہ ءُ نشہ بھا کنوکانی کمک ءَ بلوچ وانڈوانی سر ءَ ارش کنائینگ ءَ اِنت۔ لوگانی سر ءَ دستی تْراک چگل دیگ بیت ءُ مردم نشانگ کنگ ءُ کشگ بہ اَنت۔
گڈ سر ءَ چہ بی این ایم ءِ نیمگ ءَ گْوشگ بیتگ 2025 ءِ نوکیں سال ءَ آ بلوچ ءِ اگبالانی پھریزگ ءُ ماں جھان ءَ اے زوراکیانی پدر کنگ ءَ چد ءُ گیش کوشست کنت ءُ باسکاں گْوشگ بیتگ کہ ماں بلوچستان ءُ درانڈیھ ءَ پہ وتی سان ءِ گیشتر تالان کنگ ءَ کار بہ کن اَنت۔
کازی داد مھمد ریھان ءُ بی این ایم ءِ دگہ راھشوناں گوش داروکانی جستانی پسو دات اَنت۔ کہ آیاں بی این ایم ءِ شوندات ءُ کارشورانی بارہ ءَ جست کرتگ۔
’ نزیکیں روچاں چوشیں ھچ گت ءُ گمان نیست کہ بی این ایم گوں دگہ گلے ءَ ھوار بہ تر ایت۔کازی ریھان‘
کازی ریھان ءَ جستے ءِ پسو ءَ تچکیں رنگے ءَ درائینتگ کہ اے وھدے گوں ھچ گل ءَ بی این ایم ءِ ھوار ترینگ ءِ گپ بیگ ءَ نہ اِنت ءُ ناں نزیکیں روچاں چوشیں گت ءُ گمانے ھست۔بی این ایم وت وانندگیں سیاسی کارکنان مستریں سنت ءُ آشوبی گلے۔ مئے واھگ اِنت کہ مارا رس اتگیں آشوبی میرات ءَ ما پہ آیوکیں پدریچ ءَ بہ پھریز ایں۔بلے آئی ءَ اے گپ گیشینتگ کہ ما پہ بلوچستان ءِ آجوئی ءَ درسیں بھرمندانی کرد ءَ من این ءُ گوں آیاں ھمکاری لوٹ ایں۔
آئی ءَ گْوشتگ اگاں باند ءَ دگہ گلے ءَ گوں بی این ایم ءَ لیکھی نزیکی سما کرت ، گوں بی این ایم ءِ شونداتاں پت بوت ، مئے سنگیگ ( میار) ءُ سیاسی دودانی تہ ءَ ھم آھنگی ودی بوت، منی ھیال ءَ چہ بی این ایم ءَ گیشتر آشوب ءُ راج دوستی ءِ میرات ءُ سیاسی یکشلی دگہ گلے ءِ گْور ءَ نیست ، گڑا ما یکیں پتر ءِ سر ءَ الم یکجاہ بہ ایں ، انی چوشیں گت ءُ گمان نیست۔
سرجمیں نیاد