بلوچ راجی زْرمبشت ( بی این ایم ) ءِ رسانکدری کارگشاد کازی داد مھمد ریھان ءَ پریس کانپرنس ءِ تہ ءَ بالگتر ءِ ویل ءِ راستی پدر کرتگ۔پریس کانپرنس ءَ ماں بلوچستان ءَ مردمی اگبالانی برجاھیں بگیری ءُ زور بیگواھیانی سر ءَ گپ جنگ بیتگ ءُ اے جیڑہ ءِ سر ءَ میان استمانی دلگوش ءُ کارروائی ءِ لوٹ سھرا کنگ بیتگ۔
اے پرارزشتیں پریس کانپرنس ءِ تہ ءَ گْوشتگ بیتگ کہ یکیں کھول ءِ زور بیگواہ کنگ بیتگیں ھپت مردمانی تہ ءَ سئے کس آدل ء اسا ، شاہ جھان ء اسا ءُ نبی داد ء لواری پاکستانی لشکر ءَ دزگیری جاہ ءَ کشتگ اَنت۔وھدے کہ شوکت ء لواری ، زھیر ء لشکران ، پیرجان ء لشکران ءُ اھمد ھان ء شگراللہ دنیگت پاکستانی لشکر ءِ زندان ءَ اَنت۔
آئی ءَ چہ میان استمان ءِ نیمگ ءَ مزدانک ( انصاف ) ءُ آجوئی ءِ مساماں پد ھم بلوچستان ءَ مردمی اگبالانی میان استمانی راھبندانی برجاہ نہ بیگ ءِ سر ءَ بے تاھیری درشان کرتگ۔ آئی ءِ گْوشگ اَت بلوچستان ءِ پجیگ ءَ سند ، پکتونوا ، پاکستانی زیردستیں کشمیر ءُ گلگت بلتستان ءِ مردم چہ بنکی شھری آسراتیاں زبھر کنگ ءُ پاکستانی مھترھند ءِ تہ ءَ زیردست کنگ بیتگ اَنت ۔زور بیگواھی مزنیں جیڑھے ، ایشی ءِ تہ ءَ ’ بہ جن ءُ چگل ‘ دے ءِ شوندات ءِ پارست ءَ پاکستانی لشکر اے میارانی زمہ وار اِنت۔ بلوچستان ءَ یک گوریں مانش در کپتگ ءُ پجارگ نہ بیتگیں مردم ابید چہ ہجار کنائینگ ءَ کل کنگ بیتگ اَنت۔
پریس کانپرن سءَ بالگتر ءَ بیتگیں ھمے نام گیپتگیں دردناکیں ویل ءِ سر ءَ گپ جنگ بیتگ ، کہ ایشی ءِ تہ ءَ یکیں کھول ءِ سئے ورنا گوں بے دردی ءَ کشگ بیتگ اَت۔ اے چک پاکستانی لشکر ءِ زندان ءَ بیتگ اَنت کہ گاڑی یے تہ ءَ دور دیگ ءُ گاڑی گوں شورواں تراکینگ بیتگ چہ ایشی ءَ ایشانی بالاد چنڈ چنڈ بیتگ اَنت۔ کازی ریھان ءِ گْوشگ اَت کہ اے چک ھمے ھپتیں چکانی تہ ءَ ھوار بیتگ اَنت کہ ھمے سال ءِ اگست ءِ ماہ ءَ زور بیگواہ کنگ بیتگ اَنت۔
زور بیگواھی ءِ آماچ بیتگٛں دگہ مردمامی ناماں گران زور دیگ بیتگ کہ اے مردم پاکستانی لشکر ءُ گوں آئی ءَ ھمگرنچیں چیریں واکاں دزگیر کنگ ءَ پد زور بیگواہ کرتگ اَنت۔ آئی ءَ گْوشتگ تراکینگ بیتگیں گاڑی پولیس ءِ ناشرکاریانی گر ءُ دار ءِ تْرامگیج ( سی ٹی ڈی ) ءَ راہ بستگ ءُ چامپ اتگ اَت۔
پریس کانپرنس ءَ پاکستانی رسانکدر ءِ نیمگ ءَ اے گپ کہ ورنا پاکستانی لشکر ءِ پلہ مرز بیتگ ایر جتگ ءُ گْوشتگ نام گیپتگیں ویل ءَ کشگ بیتگیں ورنا نیزگاریں کھولانی مردم بیتگ اَنت کہ پاکستانی لشکر ءَ دزگیر کنگ ءَ پد زور بیگواہ کرتگ اَت اَنت۔
بلوچستان ءَ مردمی اگبالانی بگیری ءُ زور بیگواھیانی زمہ وار پاکستانی لشکر لیکگ ءُ گْوشگ بیتگ ، ایپ سی پاکستانی لشکر ءِ بھر اِنت۔ پاکستانی لشکر ایپ سی ءُ مردم کشیں رمبانی ( ڈیتھ اسکواڈز) نام ءَ وتی کارروائیاں چیر دنت وھدے کہ پولیس ءِ ناشرکاری ءِ گر ءُ داریں تْرامگیج ( سی ٹی ڈی ) ھم اے میارانی تہ ءَ آسراتی دیوک ءِ بستار ءَ گون اِنت۔
پریس کانپرنس ءَ میان استمانی تْرامگیجانی سر ءَ زور دیگ بیتگ کہ آ بلوچستان ءَ زور بیگواھیانی دارگ ءَ زیت گامگیج بہ زیر اَنت ءُ چہ اھوالکاراں دزبندی کنگ بیتگ کہ آ اے دمگ ءَ مردمی اگبالانی بگیری ءِ سر ءَ گیشتر دلگوش بہ دے اَنت ۔ آئی ءَ گْوشتگ چہ ھمساھگیں ڈیھاں اوست کنگ بیتگ کہ آ پاکستانی زوراکیانی پسو ءَ مردمی بنیاد ءَ کمک دے اَنت۔بلوچستان ءِ گوں وتی ھمساھگاں گْوستانکی سیادیانی پد ءَ اے ناگیگیں جاوراں آیانی اے ڈبو اِنت۔
اے پریس کانپرنس ءَ بلوچستان ءِ ناگیگیں جاورانی سر ءَ گپ جنگ بیتگ ، زور بیگواھیانی گچینی ویلانی بارہ ءَ تْران کنگ بیتگ ءُ مردمی اگبالانی بگیری ءِ گر ءُ دار ءَ چہ میان استمان ءَ کارروائی ءُ پلہ مرزی ءِ لوٹ کنگ بیتگ۔
