چہ بلوچ راجی زْرمبشت ( بی این ایم ) ءِ نیمگ ءَ ماں برتانیا ءَ کارگاھے ( ورکشاپ ) برجم دارگ بیتگ ، بلوچستان ءَ 28 مئی 1998 ءَ بیتگیں پاکستانی ایٹمی تْراکانی تاوان ءُ بلوچ راج ءِ سر ءَ آیانی سان ءِ بنگپ ءَ بیتگیں اے کارگاہ ءَ گل ءِ باسکاں مزنیں کچے ءَ بھر زرتگ۔
اے رد ءَ گوشتانک دیوکاں گْوشتگ ناں سانمندیں دمگانی پلگارگ ءَ کوشست بیتگ ءُ نے کہ تابکاری ءِ سانانی بارہ ءَ پٹ ءُ پولی گزارش شنگ کنگ بیتگ۔ ایش جاہ ء وت بلکیں داں مروچی ھچ وڑیں آزادیں تْرامگیجے ءَ اے دمگاں پٹ ءُ پول ءُ چارگ ءِ موکل دیگ نہ بیتگ پمیشکا اے جیڑہ رازے ءِ وڑ ءَ مجین اِنت۔
اے ایٹمی چکاس بلوچانی واھگ ءِ چپی ءَ نوک آبادی رنگ ءَ کنگ بیتگ اَنت
کارگاہ ءَ اے گپ پدر کنگ بیتگ کہ اے تْراک ایوک ءَ زانشتی یا دیمپانی لوٹاں نہ بیتگ اَنت بلکیں بلوچ سرڈگار ءِ سر ءَ تْرام اتگ ءُ بے تواریں چکچینی ءِ بھر اَت اَنت۔ اے ایٹمی چکاس بلوچ راج ءِ واھگ ءِ چپ ءُ سرجمی ءَ نوک آبادی رنگ ءَ کنگ بیتگ اَنت ، ایشانی مول ناں ایوک ءَ بلوچ سرڈگار ءِ چکاسجاھے ءِ رنگ ءَ کارمرد اَت بلکیں بلوچ راج نادْراھی ، نیزگاری ءُ اگوازی ( ماحولیاتی ) تباھی ءِ نیمگ ءَ تیلانک دیگ اَت۔
مراگش ءِ جارچینی بی این ایم برتانیا تک ءِ کارگشاد کمبر بخشی ءُ دوستین ءَ کرتگ ، سلیم ، یوسف ، احمد ، بلال ، بجار علی ، غفار ءُ شعیب نعمت ءَ اے بارہ ءَ گپ جتگ۔
