بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ ماں شال ءَ 11 اگست سوگند سرسبزی روچ — بلوچستان ءِ چہ برتانیا ءَ آجوئی ءِ روچ — ءِ درگت ءَ برجم دارگ بیتگیں نیاد ءَ گپ جنان ءَ گْوشتگ پاکستان ءِ ناراھیں زورگری ءَ پیش ما آجوئیں مھترھندے ءِ واھند بیتگ ایں۔27 مارچ 1948 ءَ پاکستان ءَ پہ زور بلوچ گلزمین دستیگ کرت ، ءُ داں مروچی ھزارھاں بلوچ مرد ءُ جنین پہ وتی گلزمین ءِ آجوئی ءَ شھمیر بیتگ ، ھزارھاں بلوچ پاکستان ءِ زنداناں بند ءُ در مردمی آزارانی دیمپان اِنت۔
آئی ءَ گْوشتگ مھترھند ءِ زوراکیاں پد ھم مئے راج گوں تمردی ءَ وتی منزل ءِ نیمگ ءَ روان اِنت۔ پہ آجوئی ءَ پند بروکیں جھدکار پاکستان ءِ زورگری ءَ آسرین اَنت ءُ رژنائیں روچے بلوچ راج ءِ وداریگ اِنت۔
چہ برتانیا ءَ بلوچستان ءِ آجوئی ءِ 78 میں سالروچ ءِ درگت ءَ بی این یم شال ھنکین ءِ کمک چارگزار ماسٹر بلوچِ ءِ پاگواجھی ءَ گل ءِ اے نیاد برجم دارگ بیتگ۔مراگش ءِ بندات چہ بلوچ راجی سوت ءَ بیتگ ءُ بھر زیروک شھمیرانی یات ءَ داں دو دم ءَ بے توار بیتگ اَنت۔
شال ھنکین ءِ کمک چارگزار ءَ گْوشتگ چہ مروچیگ ءَ 78 سال پیش بلوچستان چہ برتانیا ءِ نوک آبادی تْرام ءَ آزاد بیتگ ، بلے لھتے ماھاں پد مئے آجوئی یک نوک جوڑ بیتگیں مھترھندے ءَ پل اِت۔
