ایمسٹرڈم: بلوچی راجی زْرمبشت ( بی این ایم) نیدر لینڈز ءَ 27 مارچ ءَ بلوچستان ءِ زورگیپتی روچ ءَ ماں ایمسٹرڈم ءَ زھرشانی کرتگ ءُ روانکے کش اتگ۔روانک ءَ بھر زیروکانی دست ءَ بلوچستان ءِ سر ءَ زورگری ءِ بگیری ءَ تاک ءُ جرنبشت بیتگ اَنت ، آیانی سر ءَ جتائیں اوگام نبشتہ بیتگ۔زھرشانی ءَ بھر زیروکاں بلوچستان ءِ آجوئی ءِ پلہ مرزی ءُ زورگری ءِ بگیری ءَ اوگام جتگ۔بلوچستان ءِ بارہ ءَ ھندی مردمانی سوگہ کنگ ءَ پنتاک ھم بھر کنگ بیتگ۔
گوں زھرشانیاں بھر زیروکاں نبیل ءَ گپ جنان ءَ گْوشتگ مروچی 27 مارچ ءَ بلوچ راج سیاھیں روچ لیک ایت پرچا کہ چہ مروچیگ ءَ 75 سال پیش 27 مارچ 1948 ءَ پاکستانی مھترھند ءَ بلوچستان زورگیپتگ پمیشکا مروچی بلوچ راج ایشی ءَ سیاھیں روچ ءِ بستار ءَ یات کنگ ءَ اِنت۔ ھمے روچ ءَ پد بلوچانی ھمک روچ سیاھیں روچ اِنت ءُ داں ھما وھد ءَ بیت کہ داں بلوچستان آجو نہ بیتگ۔پاکستان ءِ لشکر ءَ اے 75ئیں سالاں بلوچانی سر ءَ ھرچ وڑیں زور ءُ پندل کارمرتگ ، مئے برات شھید کرتگ اَنت ، مئے ورنا زور بیگواہ کرتگ اَنت، ھرچ وڑیں زوراکی کرتگ ءُ نی پاکستان ءِ لشکر انچوش کپتگ کہ بلوچ جنین ءُ چکاں ھم زور بیگواہ کنگ ءَ اِنت۔مروچی بلوچ راج ھم راجانی سنت ءِ نیمگ ءَ چارگ ءَ اِنت کہ آئی ءَ بلوچستان ءَ مردمی اگبالانی سر ءَ وتی چم بنٹ اتگ اَنت ءُ بلوچ راج ءِ سر ءَ پاکستان ءِ زوراکیاں گوں بے تواری ءَ سیل کنگ ءَ اِنت۔ مروچی ما اد ءَ پمیشکا اتکگ ایں کہ پاکستانی مھترھند ءَ اے کلوہ ءَ بہ دئے ایں کہ تو ھمینچو زوراکی کن ئے بلوچستان ءِ زرمبشت ھمینچو گیش توانمند بیت۔
بی این ایم نیدر لینڈز ءِ باسک جمال ءَ گْوشتگ سالانی سال بلوچ راج پاکستانی لشکر ءِ زوراکیانی آماچ اِنت ، ھزاراں مردم زور بیگواہ کنگ ءُ شھید کنگ بیتگ۔ ھزاراں ژانگولیں کنٹ چگل دیگ بیتگ۔یورپی ڈیھ ءُ راجانی سنت ءَ ماں بلوچستان ءَ بلوچ چکچینی ءِ جست کنگ لوٹ ایت۔
بدریہ مراد ءَ تْران کنان ءَ گْوشتگ بلوچستان ءَ مروچی نہ اِنت کہ پاکستان زوراکی کنگ ءَ اِنت بلکیں اے زوراکی چہ بنداتی روچ ءَ ھست چہ ھما روچ ءَ پاکستان ءَ بلوچستان زور گیپتگ ءُ درسیں مردمی اگبال ماٹو کرتگ۔پاکستان ءِ لشکر ءَ بے دودیں لشکرے کہ بلوچ چک ، جنین ءُ پیریناں ھم آزار دنت، کہ مردم ءِ سر ءَ زوراکی ءِ بدتریں شکل اِنت۔ مئے ڈبو اِنت کہ ما ترام ءُ مھکمیں واکے جوڑ بہ بہ این ءُ پاکستان ءِ بگیری ءَ وتی جھد ءَ تیز بہ کن ایں۔
بی این ایم نیدرلینڈز ءِ باسک اسلام مراد ءَ گْوشتگ 27 مارچ 1948 بلوچ گْوستانک ءِ سیاھیں روچ اِنت۔27 مارچ ءَ پاکستان ءَ بلوچستان زور گیپتگ۔ 27 مارچ 1948 ءَ بہ گر داں انی ھزاراں بلوچ ورنا ، چک ، کماش ءُ جنین شھید ءُ آوار جنگ بیتگ۔راجانی سنت ءَ بلوچستان ءَ مردمی اگبالانی بگیریانی سر ءَ گامگیج زیرگ لوٹ ایت۔بلوچ راج 27 مارچ ءَ سیاھیں روچ بہ لیک ایت ءُ جھان ءَ کلوہ بہ دئے ایں کہ بلوچ راجے کہ آئی ءِ وتی پجار ، وتی سرزمین ءُ وتی ربیدگ اَنت۔ما ناں پیش ءَ مھترھند ءِ زیردستی منگ اتگ ءُ ناں دیمتر ءَ من ان ئِے۔
