بوسان : بلوچ راجی زْرمبشت ( بی این ایم) تک ءَ 27 مارچ سیاھیں روچ ءِ دم ءُ درگت ءَ بوسان شھر ءِ بوسان اوشتجاہ ءَ زھرشانی کرتگ۔زھرشانی ءِ مول بلوچستان ءِ سر ءَ زور گیپتی ءِ روچ ءَ بلوچ راجی مارشتانی جھان ءِ دیم ءَ درانگازی اَت۔اے روچ ءَ بلوچ راج پاکستانی لشکر ءِ دست ءَ چہ وتی آجوئی ءَ زبھر بیتگ۔
زھرشانی کنوکاں تاک نبشت گون بیتگ کہ آیانی سر ءَ پاکستانی زوراکی ءُ بلوچ ءِ چکچینی ءِ بگیری ءَ اوگام نبشتہ بیتگ۔زھرشانی کنوکاں سراں سیاھیں پچ بستگ ءُ بلوچ گلزمین ءِ سر ءَ پاکستانی زوراکی ءِ بگیری ءَ وتی ناوشی درشانتگ۔زھرشانی کنوکاں زیردستیں بلوچستان ءَ پاکستان ءِ برجاھیں زوراکیانی سر ءَ گْوشتانک داتگ۔
زھرشانی ءِ میان ءَ پاکستانی زوراکیانی سر ءَ سداں پنتاک ھم مردمانی میان ءَ بھر کنگ بیتگ۔
ماں زھرشانی ءَ 13 سالی ئیں بھتاور ءَ کوریائی زبان ءَ گْوشتانک داتگ۔
آئی ءَ گْوشتگ 1948 ءَ بہ گر داں انی پاکستانی زوراکیاں ھزاراں بلوچ کشگ ءُ آوار جنگ بیتگ۔ما بلوچاں بھ پاکستانی زیردستی نہ من اتگ بلکیں پہ وتی آجوئی ءُ وتواکی ءَ جھد کنگ ءَ ایں۔مئے لوگ بن دیگ بیگ ءَ اَنت، مال ءُ دلوت ءُ دگہ مڈی ھم روچ لشکری کارروائیاں پلگ بیگ ءَ اَنت۔
’’ 27 مارچ 1948 ءَ یک نوک جوڑ بیتگیں مھترھند پاکستان ءَ وتکواکیں بلوچ مھترھند ءِ سر ءَ ارش کرت ءُ توپک ءِ زور ءَ گوں وت ھوار ترینت۔1948 ءَ بلوچستان ءِ زور گرگ ءَ پد بلوچ راج 27 مارچ ءَ سیاھیں روچ ءِ بستار ءَ یات کنت۔چہ ھما روچ ءَ بلوچستان زورگرگ بیتگ بلوچ گھگیری زرمبشت بنا بوت ءُ آئی ءِ سروکی آگا ابدلکریم ھان ءَ کرت کہ آ وھدی استان مکوران ءِ گورنر ءُ ھان بلوچ (بلوچستان) میر اھمد یار ھان ءِ کستریں برات اَت۔‘‘
آئی ءَ وتی گْوشتانک دیم ءَ بران ءَ گْوشت کہ 27 مارچ ءَ بلوچ راج سیاھیں روچ من ایت۔آجوئی ءِ پلہ مرزیں گل بلوچستان ءَ پاکستانی زوراکیانی سھرا کنگ ءَ بلوچستان ءُ سرجمیں جھان ءَ زھرشانی ، آگاھی باوست ءُ سساتْرانی نیاد برجم دار اَنت۔آ زھرشانی کن اَنت، وتی لوگانی سر ءَ سیاھیں بندیرا (بیرک) مک کن اَنت ءُ زورگری ءِ بگیری ءَ وتی ناوشی ءِ درشان کنگ ءَ وتی دستاں سیاھیں پچ بند اَنت۔
بھتاور ءَ وتی گْوشتانک ءِ گڈسر ءَ گْوشتگ ما گوں میان استمان ، زرباری کوریا ءِ سرکار ءُ مردمی اگبالانی گلاں لوٹ کن ایں کہ آ پاکستانی لشکر ءِ دست ءَ بلوچ چکچینی ءِ دارگءَ مئے کمک بہ کن اَنت۔