مرگاپ ءِ شھیدانی یات ءَ نیاد : انیگیں زرمبشت ءِ مھکمی شھید گلام مھمد ءِ سسا ءِ برورد اِنت۔ دل مراد

تربت : بلوچ راجی زْرمبشت ( بی این ایم) ءِ سرکارگشاد دل مراد ءَ مرگاپ ءِ شھیدانی یات ءَ برجم داشتگیں نیاد ءَ تْران کنان ءَ گْوشتگ پاکستانی مھترھند ھمے سرپد اَت کہ بلوچ راھشونانی شھید کنگ ءَ پد بلوچ جھد سرین پروش بیت بلے اے آئی ءِ مزنیں ردی یے اَت۔بلوچ جھد ءَ شھیدانی شھادت ءَ پد ھم یکشل ءَ ردوم زرت ءُ بی این ایم ءَ ھم چہ پیسرگین ءَ وتی سیاسی چست ءُ ایرانی تہ ءَ گیشی آؤرت۔

آئی ءَ اے گپ بی این ایم کیچ ھنکین ءِ نیمگ ءَ مرگاپ ءِ شھیدانی یات ءَ برجم داشتگیں نیادے ءَ کرتگ اَنت۔نیاد ءِ گچینی مھمان بی این ایم سرکارگشاد دل مراد اَت۔ نیاد ءِ بندات ءَ مرگاپ ءِ شھیداں دْروت نْدر کنگ بیتگ۔چیدگ ءَ مرگاپ ویل ءِ بارو ءَ سرپدی دات۔

نیاد ءَ تْران کنان دل مراد گْوشت کہ نمیرانیں چیئرمین گوں ھمبلاں پہ بلوچ ءَ زندگیں درورے اَت۔ انیگیں بلوچ جھد ءُ گل ءِ مھکمی شھید واجہ گلام مھمد ءِ جھد ءُ سسا ءِ برورد اِنت۔

آئی ءَ گْوشتگ چیئرمین واجہ گلام مھمد ءَ دائم بی این ایم ءِ تْرامگیجانی سر ءَ کار کرتگ ءُ بی این ایم ءِ تْرامگیج مھکم کرتگ اَنت۔ ما راجی گْوستانک ءَ بہ چار ایں ھمے گندگ بیت کہ ھما وھد ءَ راجی شوراں مردم کنگ ءَ بیتگ اَنت۔راجی سیتاں مردمی سیت چیر ترین اَنت بلے راجی تْرامگیج راجی شوراں کن اَنت ءُ آ اودا راجی سیت پھریزگ بہ اَنت۔ بلوچ راج ءَ را واجہ گلام مھمد ءَ راجی تْرامگیج دیگ ءِ جھد کرتگ۔

باسکانی جستے ءِ پسو ءَ دل مراد ءَ گْوشت کہ پاکستانی مھترھند ءَ پہ بی این ایم ءُ آ دگہ آجوئی لوٹوکیں گلاں ھچ رنگیں اوپارے پشت نہ داتگ۔داں اے کچ ءَ سر اِنت کہ بلوچ جنین ءُ چکاں ھم تاوان دیگ ءَ اِنت۔ بلے مھترھند اے گپ ءَ سرپد بہ بیت کہ بلوچ ءَ وتی راہ در چتگ ءُ شھید واجہ گلام مھمد ءِ پیش داشتگیں راہ ءَ روان اِنت۔ آ روچ دیر نہ اِنت کہ بلوچ آجوئی ءِ وشیں روچاں گند ایت۔

ھم سنتی ءِ بارو ءَ جستے ءِ پسو ءَ آئی ءَ گْوشت کہ انچوش کہ چیئرمین ھلیل ءَ گْوشتگ ’’یکجاھی پہ بلوچ راج ءَ بیست ءُ یکمی سدھک ءَ سوگاتے زانگ بیت” بی این ایم مروچی ھم گوں راجی آجوئی لوٹوکیں گلاں ھم سنتی ءُ ھمکاری ءِ جھد ءَ اِنت ۔پہ ایشی ءَ پہ چینچک سوبمند یا ناسوب بہ ایں ، آیوکیں روچ وت پدر کنت۔

نیاد ءَ شھید سلیمان سیل تربت ءِ رھوتدار شلی ءَ چہ انیگیں جز ءِ گْوستانک ءَ وتی گپ بندات کرت ءُ بلوچ جز ء تہ ءِ جھل برزیانی سر گپ جت۔ آئی ءَ گْوشت جز ءِ دْرچ برجاہ اِنت۔ چیئرمین گلام مھمد، واجہ ھیربکش مری ءُ شھید اکبر ھان بگٹی ءِ سروکی بنا بیتگیں جھد ءِ دیم ءِ دارگ ءَ مھترھند ءَ وڑ وڑیں شوندات جوڑ کرت بلے راجی توار گٹگیر نہ بیتگ۔چہ مھترھند ءِ زوراکیاں ابید ھم بی این ایم ءِ مھکمی اے گپ ءَ پدر کنت کہ شھید گلام مھمد گوں ھمبلاں ساڑی نہ اِنت بلے آئی ءِ لیکہ ءُ سسا ھمک جھدکار ءِ زھن ءَ ھست ءُ زندگ اَنت۔مھکمیں بی این ایم شھید گلام مھمد ءُ آئی ءِ ھم سسائیں ھمبلانی داتگیں داد اِنت۔

شلی ءَ دیمتر ءَ گْوشتگ اے راستی یے کہ راھشونیں شھیدانی کنڈ ءَ کس پر کرت نہ کنت۔ شھیدانی شھیدی پہ جھد ءَ مزنیں تاوانے بلے آیانی پیش داشتگیں راہ وت مئے راھشونی ءَ کنگ ءَ اِنت۔

نیاد ءِ گڈسر ءَ دل مراد ءَ باسکانی جستانی پسو ھم دات اَنت۔