مشکے :مرگاپ ءِ شھیدانی یاتءَ بلوچ راجی زْرمبشت ( بی این ایم) ءِ بنجاھی جار ءِ پد ءَ چہ بی این ایم مشکے ھنکین ءِ نیمگءَ ھنکین چارگزار کمبر ءِ پاگواجھی ءَ آنلائن مراگشے برجم دارگ بوتگ۔ اے مراگِشءَ ھنکین ءِ باسکاں ابید مستریں کمک سرکماش ڈاکٹر جلال ، کستریں کمک سرکماش استاد بابل لتیپ ، ریڈیو زرمبش بلوچی ءِ شونکار سرباز وپا ءُ ریڈیو زرمبش براھوئی ءِ شنگکار زبیر ءَ ھم بھر زرتگ۔
اے درگت ءَ ڈاکٹر جلال ، بابل لتیپ ، ھنکین کمک چارگزار زھرہ ، سرباز وپا، زبیر ءُ بی این ایم ءِ باسک یاسر ءَ مرگاپ ءِ شھیداں دْروت ندر کُرتگ ، آیانی دیمونی ساڑاتگ ءُ گْوشتگ کہ مروچی بلوچ راجی جز کہ چہ مھترھند ءِ زوراکیاں ابید سرجمیں جھان ءَ گوں سوبمندی ءَ روگ ءَ اِنت آ ھمے راھشونانی شپ ءُ روچیں جھد ءُ دیمونیانی برورد اِنت۔
تْران کنوکاں گوشتگ بلوچ راج یک وھدے مارکس ءُ لینن ءِ لیکہ منوگِر بوتگ ۔ بلے وھدے کہ جھان ءِ میل مٹ اِت ھمک راج ءَ وتی سیت چار اِت اَنت ءُ گوں وتی سیتاں ھمدپیں شوندات اڈ کرت۔ ھمے رد ءَ بلوچ راج ءَ ھم وتی راجی سیتانی بنیاد ءَ جیڑ اتگ ءُ پہ راج ءِ دیمروی ءُ آجوئیءِ گِرگءَ تْرامگیج جوڑ کرتگ۔ بزاں کہ بی این ایم ھما راجی واھگانی بنیاد ءَ جوڑ کنگ بیتگ۔
آیاں گوشتگ واجہ شھید گلام مھمد ءَ بلوچ راج ءَ را بی این ایم ءِ وڑیں گلے داتگ۔ ھمے گل بلوچ ءِ تْرامگیج اِنت۔ھمے بی این ایم پہ بلوچ راج ءَ راھشون در کنت۔ اگاں مئے راھشون مئے شھید کنگ بیت گڑا آئی ءِ جاہ ءَ دگرے کئیت بلے جھد نہ اوشت ایت۔گْوست ءَ بلوچ راجی راھشونانی تچکیں دیدانکے نہ بیتگ پمیشکا بلوچ ءِ آجوئی ءِ جنگ ءِ تہ ءَ گیشی ءُ ترندی ھم نہ بیتگ ۔بلوچ ءِ جیڑہ جھان ءَ سر نہ بیتگ بلکیں کمیں وھد ءِ تہ ءَ آجوئی جھد ایرموش بوتگ اَنت۔اگاں مروچی زْرمبشت ءَ بیست سال اِنت کہ پاکستانی لشکر ءِ زوراکیاں ابید ھم دیم پہ منزل ءَ روان اِنت۔ آئی ءِ انگیز ھمیش اِنت کہ بلوچ ءِ گْور ءَ تچکیں دیدانکے ھست۔اے شھید واجہ گلام مھمد ءُ سنگتانی داتگیں دیدانک اِنت۔
’’ واجہ گلام مھمد ءِ بِگیری ءَ دژمن ءُ آئی ءِ پارلیمانی دوستاں وڑ وڑیں پندل کرت کہ گلام مھمد مھترھند ءِ مردم اِنت یا کہ سودا بازی کرتگ ئِے بلے واجہ ءَ آیانی پندل مان نہ یارت اَنت۔ آ پہ بلوچ راجی آجوئی ءُ بلوچ راج ءِ آیوکیں پدریچ ءِ وشھالی ءُ وتواجھی ءَ ھرچ وڑیں سکیانی سگگ ءُ دیمونی دیگ ءَ ساڑی اَنت۔ پمیشکا گلام مھمد ماں گْوستانک ءَ نمیران بوت بلے واجہ مروچی ھم بلوچ ءِ راھشونی کنگ ءَ اِنت پرچا کہ واجہ لیکھے ءُ لیکہ بھ آسر نہ بہ اَنت۔ مروچی بلوچ گوں واجہ گلام مھمد ءِ داتگیں دیدانک ءَ منزل ءِ نیمگ ءَ روگ ءَ اِنت۔‘‘
تْرانکاراں گْوشت کہ ما ھما وھد ءَ وتی گَل ءُ تْرامگیجاں مھکم کرت کن ایں کہ آیاں وھد بہ دے ایں۔چہ شھیدانی یات ءَ نیاد ایر کنگ ءَ اَبید وتی گلانی تھی نیاداں گوں پابندی ءَ برجم بہ دار ایں۔ گل ءِ نیادانی تہ ءَ وتی گْوست ءِ نزوریانی سر ءَ چمشانک بہ دے این ءُ بہ جیڑ ایں۔پہ آیوکیں گامگیج ءَ شور ءُ سوج دات بہ کن ایں۔ اگاں ما وتی اے کار گوں مھکمی ءَ برجاہ داشت اَنت گڑا ما وتی راج ءَ وشیں بانداتے دات کن ایں۔ ءُ ما وتی راجی شھیدانی لوٹ ءُ گزراں پیلو کرت کن ایں۔