مرگاپ ءِ شھیدانی یات ءَ ماں برتانیا ءَ نیاد : مارا پھر اِنت کہ ما شھید گلام مھمد ءِ رندگیر ایں

پیٹر بورو : مارا پھر اِنت کہ ما شھید گلام مھمد ءِ رندگیر ایں۔گلام مھمد ءُ آئی ءِ ھمراھاں پہ بلوچ گلزمین ءِ آجوئی ءَ دیمونی داتگ ءُ نمیران بیتگ اَنت۔

اے گپ مرگاپ ءِ شھیدانی یات ءَ بلوچ راجی زْرمبشت ( بی این ایم) برتانیا تک ءِ پیٹر بورو بنزہ ءِ نیمگ ءَ بیتگیں یاتگاری نیاد ءَ گپ جنان بنجاھی راھشوناں درشانتگ اَنت۔

آئی ءَ گْوشتگ مروچی زورگریں دژمن ءَ ماں بلوچ گلزمین ءَ ھمک سیاسی ءُ چاگردی کارکن ءِ سر ءَ پابندی جتگ۔چہ ایشی ءَ پد ھم بلوچ ورنا، کماش ءُ جنینانی پجیگ ءَ ھمک کس وتی زور ءُ توان ءَ پہ وتی آجوئی ءَ جھد ءَ اِنت۔وھدے کہ دومی نیمگ ءَ درانڈیھ ءَ سیاسی باسک جھان ءَ اے باور کنائینگ سوبمند بیتگ اَنت کہ بلوچ وتی آجوئیں ڈیھ ءِ لوٹوک اَنت کہ آیانی بنکی ءُ مردمی اگبال اِنت۔

آیاں اے ھبر رد کرتگ کہ چہ پاکستان ءِ پارلیمانی سیاست ءَ بلوچاں سیت رس ایت، آیاں گْوشتگ مروچی بلوچ گلزمین ءِ شھرمنند چہ نیزگاری رند (poverty line) ءَ جھل زند گوازینگ ءَ لاچار اَنت ، ایشی ءِ انگیز ایوک ءَ بلوچ ءِ راجی چیردستی اِنت۔ اے جاوراں ھم لھتے مردم پاکستانی لشکر ءِ کاسگ چٹ جوڑ بیتگ ءُ بلوچ ءُ بلوچستان ءِ جیڑہ ءِ گیشوار ءَ دگ ءُ روزگار رسگ ءِ تہ ءَ شوھازگ ءَ اِنت ’’ آ ھوڑانی بھشت ءَ اَنت۔‘‘

آیانی گْوشگ اَت کہ چہ گلام مھمد ءُ آئی ءِ سنگتانی شھیدی ءَ بلوچ راج ءِ باھنداں پروش نہ وارتگ۔ مروچی ھزارانی کچ ءَ بلوچ پسگ گلام مھمد ءِ رندگیری ءَ پرایمنیں جھد ، سلاھبندیں گھگیری ءُ دگہ وڑ ءُ پیماں پہ چیردستی ءِ آسرینگ ءَ جھد کنگ ءَ اَنت۔’’ آ روچ دیر نہ اِنت کہ شھیدانی پشتپد وتی گلزمین ءَ چہ دژمنانی پنجگ ءَ آجو کنگ ءَ سوبین بہ اَنت۔‘‘

اے نیاد بی این ایم پیٹربورو بنزہ ءِ کارگشاد ریھان ءِ پاگواجھی ءَ برجم بیتگ۔مراگش ءِ گچینی مھمان بی این ایم ءِکستریں کمک کارگشاد ھسن دوست ءُ منگھی مھمان بی این ایم ءِ بنجاھی پتر ءِ باسک نیاز اَت۔جارچینی ءِ ڈبو بنزہ ءِ کمک کارگشاد ھارون ءَ پیلو کرتگ اَنت۔ یاتگاری نیاد ءِ بندات دودانی پد ءَ چہ شھیدانی یات ءَ دو دم ءِ بے تواری ءَ بیتگ۔