بلوچ شھمیرانی روچ : مشکے ، تربت، گوادر، برتانیا ، زرباری کوریا ، جرمنی ءُ نیدرلینڈز ءَ بی این ایم ءِ مراگش

بلوچ راجی زْرمبشت ( بی این ایم ) ءَ بلوچ شھمیرانی روچ ءَ بلوچستان ، برتانیا ، زرباری کوریا، جرمنی ءُ نیدرلینڈز ءَ مراگش ایر کرتگ۔ بلوچستان ءَ چہ بی این ایم ءِ نیمگ ءَ اے مراگش مشکے، تربت ءُ گوادر ءَ برجم دارگ بیتگ اَنت۔ اے مراگشانی تہ ءَ بی این ایم ءِ باسکاں بھر زرتگ۔

بی این ایم ءَ سیزدہ نومبر ءِ دم ءُ درگت ءَ رسانکدری باوست چہ یک نومبر ءَ بنا کرتگ۔ اے رد ءَ چہ بی این ایم ءِ نیمگ ءَ جتائیں رسانک ءُ پنچ زبان ءَ کسانیں ڈاکومنٹری یے ءِ شنگ کنگ ءِ پجیگ ءَ ’ چہ بلوچ شھمیرانی تاک ‘ ءِ چاگردی رسانکدری ءِ اکاؤنٹانی پارست ءَ شاھگان ءُ ھم آھنگیں رسانکدری باوستے ھلائینگ بیتگ۔اے باوست ءِ رد ءَ رسانکدر ءُ آئی ٹی کاربولک ءِ ھمگرنچیں باسکاں سدانی کچ ءَ بلوچ شھمیرانی بارہ ءَ نکان شنگ کرتگ کہ آئی ءِ دْرچ دنیگت برجاہ اِنت۔

ماں درانڈیھ ءَ بی این ایم ءِ بنجاھی مراگش برتانیا ءِ بنجاھی شھر لندن ءَ بیتگ اے مراگش ءَ بی این ایم ءِ کسان کمک کارگشاد ھسن دوست ، بلوچ نبشتہ کار ڈاکٹرنسیر دشتی، جھانی سندی گل ءِ راھشون ڈاکٹر لکو لوھانہ ءُ دگراں تْران کرتگ۔ مراگش ءَ مزنیں کچے ءَ بی این ایم ءِ باسک ءُ بلوچ زْرمبشت ءِ دوزواھاں بھر زرتگ۔اے مراگش چہ جتائیں چاگردی رسانکدراں تچکے ءَ پیش دارگ بیتگ۔

بلوچستان ءَ چہ بی این ایم ءِ نیمگ ءَ اے مراگشانی بندات چہ یازدہ نومبر ءَ شھید سلیمان چارگزاری تک ءِ چیردستی ءَ برجم دارگ بیتگیں یاتگاری نیادے ءَ بیتگ کہ آئی ءِ پاگواجھی شھید سلیمان چارگزاری تک ءِ بانکیں چارگزار ءَ کرتگ۔

گْوشتانک دیوکاں اے رد ءَ گوں بھر زیروکاں تْران کنان ءَ گْوشتگ انگریزاں پہ وتی پھزداری ءُ دیمپانی سیتاں بلوچستان ءِ سر ءَ ارش کرت ءُ بلوچستان گیپت۔ بلے بلوچ راج ءَ بھ زورگرانی بالادستی نہ من اتگ ءُ یکشل ءَ گھگیری کنگ ءَ اِنت۔

دوازدہ نومبر ءَ شھید انور ایڈوکیٹ کیچ گوادر ھنکین ءِ نیمگ ءَ ھنکین چارگزار بابا جی آر ءِ پاگواجھی ءَ پرمنگھیں مراگشے برجم دارگ بوت کہ آئی ءِ گچینی مھمان بی این ایم ءِ گْوستگیں بنجاھی پتر ءِ باسک یوسپ اَت۔اے مراگش ءَ بی این ایم ءِ کمک سرکماش ڈاکٹرجلال ءَ ھم بھر زرتگ۔ مراگش ءِ جارچین ھنکین ءِ کمک چارگزار جیھند اَت۔ اے مراگش ءَ گل ءِ کلانھیں باسک مھمد انور، بی این ایم ءِ گْوستگیں بنجاھی پتر ءِ باسک رژن ءُ شئے بھار ءَ ھم شھمیراں یات کنان وتی سسا دْرشان کرتگ اَنت۔

آیاں گْوشتگ بلوچ راج ءِ سر ءَ بلوچستان ءِ ھمک کنڈ ءَ زوراکی بیگ ءَ اِنت مارا اے زوراکیانی بگیری ءَ یکجاہ بیگ ءُ بلوچ راجی جنگ ءَ وتی بھر گون کنگی اِنت۔ بلوچ راجی آجوئی ءِ زْرمبشت ءِ سوبمندی ءَ ابید بلوچ راجی مانشت ءِ دگہ راہ نیست۔

سیزدہ نومبر ءَ چہ بی این ایم مشکے ھنکین ءِ نیمگ ءَ بی این ایم مشکے ھنکین ءِ چارگزار استاد مھران ءِ پاگواجھی ءَ مراگشے برجم دارگ بیتگ۔ اے مراگش ءَ بی این ایم ءِ گھبودی کارگشاد مھمد اکبال ءُ بنجاھی پتر ءِ باسک چیپ اسلم ءَ ھم بھر زرتگ۔ وھدے کہ ریڈیو زْرمبش بلوچی تک ءِ شکسار ءُ بلوچی زبان ءِ نامی ئیں نبشتہ کار سربازوپا، ریڈیو زْرمبش براھوئی تک ءِ تْرامکار زیشان منان، مشکے ھنکین ءِ کمک چارگزار زھرہ، شھید ڈاکٹرمنان بنزہ ءِ کارگشاد ریھان ، شھید راشد بنزہ ءِ کارگشاد شاویز، نوکجو بنزہ ءِ کارگشاد میرک ءُ کمک کارگشاد تلار ءَ ھم تْران کرتگ۔

آیاں گْوشتگ مروچی ماں جھان ءَ اگاں بلوچ راجے ءِ بستار ءَ ھست گڑا اے بلوچ راج ءِ شھمیرانی دیمونیانی برورد اِنت۔

درانڈیھ ءَ مراگشانی بندات چہ جرمنی تک ءِ نیمگ ءَ بیتگ۔ جرمنی ءَ بی این ایم ءَ دو جتائیں جاھاں مراگش کرتگ۔ ھورانی پد ءَ مراگش سانمند بیتگ اَنت پد ءَ ھم مزنیں کچے ءَ بی این ایم ءِ باسک پہ شھمیرانی ستاشانی ءَ سڑکانی سر ءَ در اتکگ اَنت ءُ شھمیرانی اکسانی دیم ءَ ڈیوا اش روک کرتگ۔ جرمنی ءَ اے مراگش برکن ءُ ھنوپر ءَ بیتگ اَنت۔ جرمنی ءَ بلوچ شھمیرانی یات ءَ مراگشانی اے دْرچ انگت برجاہ اِنت، اے رد ءَ گڈی مراگش سی نومبر ءَ بیت۔

بی این ایم زرباری کوریا ءَ اے سالی ھم وتی شانداریں دود برجاہ داشتگ ءُ شھمیرانی یات ءَ روانک ءُ ڈیوا بالینگ ءِ مراگشے ایر کرتگ۔ناوشیں مولم ءُ ترندیں گوات ءِ تہ ءَ ھم بی این ایم ءِ باسک سٹی اسٹاپ بوستان ءَ یکجا بیتگ اَنت۔ آیاں شھمیرانی اکس گون بیتگ اَنت۔

گوں بھرزیروکاں کورین ءُ انگریزی زبان ءَ تْران کنگ بیتگ۔ انگریزی زبان ءَ بی این ایم ءِ دیدانک ءُ بلوچ شھمیرانی بارہ ءَ وتی سسا بانڑی ءَ درشان کرتگ اَنت ءُ بھتاور ءَ اے کلوہ پہ ھمود ءِ مردماں کوریائی زبان ءَ پیش کرتگ۔

آیاں گْوشتگ انگریزانی 13 نومبر 1839 ءَ ارش کنگ ءَ پد داں مروچی ھم بلوچ پہ آجوئی ءَ وتی زنداں نْدر کنگ ءَ اَنت۔ بلوچ چہ گْوستانک ءَ آجوئیں راجے کہ آئی ءَ بھ زیردستی نہ من اتگ۔مروچی ھم بلوچ راج چہ دگرانی بالادستی ءَ آجو بیگ لوٹ ایت۔

ماں نیدرلینڈز ءَ بی این ایم ءَ سیزدہ نومبر ءَ بلوچ شھمیر یات کرتگ اَنت۔ اے مراگش ءَ بی این ایم نیدرلینڈز ءِ سرکماش ابدل واھد، بی این ایم ءِ مردمی اگبالانی تک پانک ءِ رسانکدری راھوتکار جمال ، بی این ایم ءِ باسک ڈاکٹر لتیپ ، مھمد بلوچ ءُ سارہ بکشی ءَ تْران کرتگ۔

آیاں گْوشتگ بی این ایم ءِ برورد ءَ مروچی ما وتی راجی شھیداں یات کنگ ءَ ایں کہ آیانی دیمونی بے سیت نہ اَنت۔ ما اے نہ زان ایں کہ مئے پدریچ بلوچستان ءِ آجوئی ءَ گند ایت یا ناں بلے پہ آجوئی ءِ جھد ءِ سوبمندی ءَ مارا وتی تْرامگیج داں وسے روت مگیم کنگی اَنت۔