نیدر لینڈز ءِ شھر دی ھیگ ءَ چہ بلوچ راجی زْرمبشت ( بی این ایم ) ءِ نیمگ ءَ 28 مئی 1998 ءَ بلوچستان ءِ دمگ چاگے ءَ کنگ بیتگیں ایمٹی تْراکانی بگیری ءَ روانکے کشگ بیتگ ءُ پاکستانی سفارتجاہ ءِ دیم ءَ زھرشانی کنگ بیتگ۔
زھرشانی کنوکاں کاگد ءُ جرنبشت ( بینر) گون بیتگ کہ آیانی سر ءَ بلوچستان ءَ ایٹمی چکاس ، زورگری ءُ مردمی اگبالانی لگتمالی ءِ سر ءَ اوگام نبشتہ اَت۔ زھرشانی ءَ بھر زیروکاں ایٹمی تْراک ، بلوچستان ءِ زورگری ءِ بگیری ءُ بلوچستان ءِ آجوئی ءِ اگبال ءِ پلہ مرزی ءَ اوگام جتگ۔
چہ زھرشانی ءَ بی این ایم نیدر لینڈز تک ءِ سروک مھیم عبدالرحیم ، ڈاکٹر لطیف ، واحد ، عصا بجار ، زھرہ ءُ پشتون پانک زْرمبشت ( پی ٹی ایم ) ءِ باسک زرخان ءَ گپ جتگ۔
دمگ ءِ مردم دنیگت چہ تابکاری ءَ سانمند اَنت۔ گْوشتانک دیوک
گْوشتانک دیوکاں گْوشتگ چاغی ءِ کوھی دمگ ءَ بیتگیں اے تْراکاں پد زمین ،آپ ءُ گوات ءَ تابکاری ءِ کچ ترسناکیں رنگے ءَ گیش بیتگ۔آیانی رد ءَ ، اے دمگ ءِ نندوک دنیگت چہ تابکاریاں سانمند بیگ ءَ اَنت۔ آ اود ءَ پوست ، دم ، چمانی نزور ءُ شیمک رنگیں نادْراھیانی تہ ءَ بے تاھیر کنوکیں گیشی گندگ بیتگ۔
آیاں گْوشتگ چہ سانمند بیتگیں ھلک ءُ میتگاں نہ چہ تْْراکاں پیش ھال دیگ بیتگ ءُ ناں چہ آیاں پد پہ آیانی جاندْراھی ءُ گھبود ءَ گامگیج زیرگ بیتگ۔بازیں کھول چہ تابکاری ءِ ترس ءَ پہ ناچاری لڈ اتگ۔گْوشتانک دیوکاں اے گپ ءِ سر ءَ بژن درشانتگ کہ داں مروچی جھانی تْرامگیج یا مردمی اگبالانی گلے ءَ اے تْراکانی آزات ، زانشتی ءُ ناپتیں پٹ ءُ پول نہ کرتگ۔
جھان ءَ پاکستان ءِ ایٹمی تْراکانی سر ءَ نشتگ ءُ سیل چار اتگ ۔ تْرانکارانی ایراد
گْوشتانک دیوکاں چد ءُ دیم گْوشتگ جھان ءِ دگہ ڈیھاں وھدے ایٹمی چکاس بیتگ گڑا آ اود ءَ پھریزی گامگیج ءُ شیشاریں پٹ ءُ پول کنگ بیتگ بلے بلوچستان ءَ ناں ایوک ءَ چکاس کنگ بیتگ اَنت بلکیں لھتے گزارشانی رد ءَ پاکستان ءَ وتی ایٹمی سلحہ ھم بلوچ سرڈگار ءَ انبار کرتگ اَنت۔ اگاں کجام ھم وھدے تابکاری ڈن ءَ در اتک چہ ایشی ءَ درساں گیش بلوچاں تاوان بیت ، کہ چہ ساریا گزرانکی ، سیاسی ءُ مردمی جیڑھانی آماچ اَنت۔
آیاں جھانی تْرامگیج گچینی راجانی سنت ءُ میان راجی اٹامک انرجی ایجنسی ءِ سر ءَ ایراد گپتگ ءُ گْوشتگ کہ آیاں پاکستان ءِ اے ایٹمی گامگیجانی سر ءَ ایوک ءَ نشتگ ءُ سیل چار اتگ ناں داشتگ ءُ نے کہ داں انی جست ءُ پرس کرتگ۔
