11 اگست سوگند سرسبزی روچ ( بلوچستان ءِ چہ برتانیا ءَ آجوئی ءِ روچ ) ءِ درگت ءَ چہ بلوچ راجی زْرمبشت ( بی این ایم ) ءِ نیمگ ءَ 10 ڈاؤننگ اسٹریٹ ، لندن ءَ زھرشانی کنگ ءُ بلوچ زْرمبشت ءِ پلہ مرزی ءَ روانکے کشگ بیتگ۔
زھرشانی کنوکاں برتانیا ءِ دلگوش پرینتگ ءُ گْوشتگ اگاں برتانیا راجمستری ءِ منوک اِنت گڑا آئی ءِ اے گْوستانکی زمہ واری بیت کہ آ مئے پلہ مرزی بہ کنت۔اگاں برتانیا پہ راستی آجوئی ءِ منوک اِنت گڑا بلوچ راج ءِ جھد ءَ بہ من ایت ءُ زور بیگواھیانی بگیری ءَ توار چست بہ کنت۔
گْوشتانک دیوکاں گْوشتگ 11 اگست 1947 ءَ برتانیا ءِ چہ دمگ ءَ درکپگ ءَ پد بلوچستان ءَ آجوئی ءِ جار جتگ۔ راست اِنت کہ بلوچستان پہ کمیں ماہ ءُ روچاں آزاد اَت ، بلے اے میان ءَ بلوچ راج ءَ وتواکی ، راجمستری ، وتی زبان ، ربیدگ ءُ رواجانی پد ءَ آزادیں زندے گْوازینت۔ مارچ 1948 ءَ ، بلوچ راج ءِ واھگ ءِ چپگان ءَ پاکستان ءَ لشکرکشی کرت ءُ بلوچستان زور گپت۔
آیانی گْوشگ اَت کہ پاکستان ءِ زورگری ءَ پد ھزاراں بلوچ زور بیگواہ کنگ ءُ آزار دیگ بیتگ۔ بلوچ نودربر، زانتکار ، ندکار ءُ سیاسی کارکنانی بے توار کنگ ءَ مھترھندی زوراکی کارمرد بیگ ءَ اِنت— ھما مردم کہ زوراکی ءِ نشانگ اَنت آیانی یکیں میار اِنت کہ وتی پہ راھیں اگبال ءُ راجی آجوئی ءِ لوٹوک اَنت۔
گْوشتانک دیوکاں درائینتگ 1947 ءَ بلوچستان ءِ بنجاھی شھر کلات ءَ ’ خان بلوچ ‘ ءَ بلوچستان ءِ مھترھند ءُ بلوچ راج ءِ جھگیری کنان ءَ آجوئی ءِ جار جتگ اَت ، ءُ پاکستان ءِ لشکر ءِ بیڑ ءَ پپش جھان ءَ مارا آجوئیں راجے ءِ بستار ءَ من اتگ اَت۔ چہ ایشی ءَ پد مئے سرڈگار زورگری ، مڈیانی لٹ ءُ پل ، مردمانی زور بیگواھی ، کشت ءُ کوش ءُ ربیدگانی گمساری ءِ دیمپان اِنت۔
آیاں گْوشتگ مئے پہ جھان ءَ ھمے کلوہ اِنت کہ بلوچستان ءِ آجوئی وابے نہ اِنت بلکیں گْوستانکی اگبالے۔ ما لوٹ ایں کہ بلوچستان ءَ پاکستانی زوراکیانی جھانی تک ءَ جست ءُ پرس بہ بیت ، پاکستان ءِ لشکری کمک بند کنگ ءُ مئے وتواجھی ءِ اگبال منگ بہ بیت۔
